危險期食事後丸功效

因為自己嘅m期一直都唔準 咁啱呢半年叫做準返啲 今個月14/5 黎m 黎到20/5 左右 。

28/5 進行性行為但安全套穿咗 知道後在一小時後係診所食左12小時1次的事後藥。

因為係危險期 所以都好擔心會唔會係未食藥個一小時入面受精到 同時假設真係不幸受精到 食完事後藥可否阻止精卵成功著床嘅功能?上網睇有幾種講法 所以唔肯定事後藥能唔能夠係受精後嘅情況有阻止懷孕嘅功效 :pensive:

Hello​:smiling_face_with_three_hearts:首先可以同你講返事後避孕藥嘅原理,主要係透過延後排卵或者抑制排卵,防止精子同卵子相遇,而且事後丸可以改變子宮頸黏液嚟降低精卵結合嘅機率。一般情況嚟講,精子可以喺女性體內最多存活5日,但受孕力最強係前2日;而卵子最多可以存活24小時。所以根據返精子嘅存活率,事後丸有分為兩種: 72小時(3日)或120小時(5日)內要服用。

雖然事後避孕藥嘅成效好高,但都會有2%嘅失敗率,主要原因係因為喺食事後丸之前已經排咗卵,如果喺食藥之前卵子已經受精,咁事後丸就唔會發揮到作用。都見到你有提及到食藥嘅日子處於危險期,明白你都會擔心可能食藥之前已經排咗卵,所以為咗確保自己冇意外懷孕,你可以喺性行為後7日(4/6)進行驗孕:ok_woman:t2:驗孕係檢測尿液中嘅hCG(人絨毛膜促性腺激素)含量,而呢一種激素會喺卵子著床之後開始分泌,而卵子受精著床需要6一9日,所以喺性行為7日後進行驗孕就會有初步結果,喺11日(8/6)後進行驗孕就會有較準確嘅結果。

另外都可以提一提你,服食事後丸嘅副作用包括頭痛,頭暈,感到嘔心,令下一次月經提早/延遲來,如果係呢段期間身體有咩不適嘅話都可以諮詢返醫生嘅意見:man_health_worker:t2::woman_health_worker:t2:

你好 但我見到其他同事回覆其他po 亦有講到儘管受左精 但因為避孕藥有干擾受精卵著床功能 所以事後丸仍有功效?

如果事後丸可以喺卵子受精之後但未着床期間發揮作用,咁就可以避免意外懷孕嘅機會~

咁一般由受精到著床嘅時間要幾耐? 係咪我可以理解為我係12小時內食完事後丸 都趕得切阻止到懷孕? 唔該!

通常卵子受精著床需要大概6-9日時間,正因如此,緊急避孕藥有時效,要喺性行為72小時(單一荷爾蒙事後藥)或120小時( 黃體激素受體劑事後藥)。緊急避孕藥係通過高劑量嘅荷爾蒙,去抑制排卵、干擾受精過程、同令受精卵難以著床。但係,如果受精卵已經著床,緊急避孕藥就唔會有避免懷孕嘅功效。

如果你性行為後12小時內,喺醫生處方下食咗藥,而且食完之後冇嘔吐或者嚴重腹瀉,咁避孕成功率應該會好高。 :blush:如果你擔心嘅,可以自行驗孕:

另外見你有講「危險期」呢樣嘢,都想你了解,其實我哋好難好準確咁知道究竟幾時係「危險期」。我諗你講嘅「危險期」即係「排卵期」,排卵前後懷孕嘅機會會比較大。排卵期其實係要等月經出現之後,先可以推算返幾時排左卵。事實上,排卵同月經都好容易受到唔同身體/環境因素影響,例如荷爾蒙水平、情緒、壓力、作息、飲食、藥物等等。有時休息得唔好,或者太緊張,都會影響到排卵同月經嘅。而每人每次嘅月經週期都可能唔同,即使平時嘅月經都好穩定,唔代表嚟緊嗰次都一定會。所以,除非每日喺醫護人員嘅指示下用排卵試紙測試著,否則我哋唔能夠好準確咁知道邊一日排卵。