每次sex前會摸女朋友豆豆位置，但每次摸女朋友都係話得開頭有感覺，摸一兩分鐘就已經無感覺，有時甚至連開頭摸都無感覺，我同女朋友都係對方第一個伴侶，而佢本身都冇自慰，唔知摸邊到先舒服
我之前試過買支震震棒幫女朋友震下面，但就算放係豆豆附近，佢都冇興奮感覺，如果放正係陰蒂上面佢會覺得太刺激所以唔舒服，所以想問下我可以點樣改善/點樣做先可以幫佢體驗到高潮?
Hello
首先都好欣賞你會喺性行為嘅過程考慮到女朋友嘅感受
首先可以解釋翻你對於豆豆嘅疑問，其實一般我哋所指嘅豆豆其實係講緊女性嘅陰蒂頭，好多人都唔知道其實陰蒂頭引伸落去係一個好複雜嘅性器官結構。陰蒂本身係一個好多神經末梢嘅性器官，由陰蒂頭開始連接住下面嘅陰道口、海綿體、陰蒂腳等，所以大部份人喺性行為嘅前戲都會先刺激女性嘅陰蒂頭，因為的確佢係一個非常敏感嘅部位，當女性性興奮嘅時候，陰蒂同埋陰蒂頭都會充血膨脹，如果係呢個時候繼續刺激嘅話，就會引起性高潮。
頭先都講到好多人因為知道女性嘅陰蒂頭好敏感，所以都會選擇刺激呢個部位先，但其實並唔係每一位女性都會因為陰蒂頭嘅刺激產生高潮🫢見到你有提及你同女朋友都係對方第一個伴侶，而且女朋友都冇自慰嘅經驗，所以如果你想知道女朋友有咩部位會比較敏感，呢方面可能就需要長時間嘅探索
就正如你所講，當你刺激女朋友嘅陰蒂頭時，佢並冇興奮嘅情況，咁可能要嘗試刺激女朋友其他嘅部位，例如陰道，陰道口，陰道附近嘅肌膚，或者未必需要刺激下體嘅部份，有可能耳朵，頸部，乳頭等嘅刺激會令女朋友覺得舒服。除咗肉體嘅接觸，其實好多人都會忽略咗其他因素嘅配合，例如環境佈置，燈光，氣味，音樂等嘅氣氛營造，都會有助二人更享受性行為過程，甚至會增加高潮嘅機會
喺度都可以分享一個台灣嘅IG俾你，佢主要係分享點樣令男女喺性行為過程更加享受，例如刺激嘅方式，前戲，姿勢等等，你哋都可以參考吓～
https://instagram.com/exotica.tw?igshid=YmMyMTA2M2Y=
所以呢個將會係一個漫長嘅探索過程，建議你可以同女朋友一齊探索嘅時候，不妨可以問吓對方「你覺得呢個位舒唔舒服？」，「我再刺激呢個位好唔好？」，一方面可以知道對方嘅感受，又可以確保女朋友冇唔舒服嘅情況。其實喺性行為嘅過程入面，溝通都好重要，希望你同女朋友都可以搵到令大家舒服又享受嘅方法