吸/撫摸過嘅乳頭係咪唔會變返細

2日前同男朋友sex 比佢吸過乳頭
感覺上今日我個乳頭都仲係比平時大同長
但明明佢都係細力嘅吸左幾下 比佢摸居多

係咪已經回不去以前嘅大細:cry:

Hello 唔使擔心呀,其實乳頭嘅狀況同大小都會隨住唔同嘅因素出現變化,例如荷爾蒙水平變動(例如接近排卵期或月經日子)、溫度變化(例如溫度下降時乳頭會變硬或者變細)、被摩擦或者拉扯過,但一般慢慢都會回復去平時嘅狀況。通常係餵母乳期間因為被嬰兒長期而且持續地吸啜,就有較大機會導致乳頭大小出現明顯變化,亦因為吸啜嘅情況持續過一段長時間,相對會需要較長嘅時間身體先會恢復。

你現時除咗感覺乳頭外觀上比以往大同長,會唔會感覺乳頭有紅腫、刺痛、痕癢或者見到有分泌物流出?如果有的話,咁有機會係乳頭受損或者發炎,除咗要避免再刺激乳頭,亦要盡快睇醫生,檢查一下有冇需要透過藥膏或者藥物消炎。但如果都無的話,基本上都唔需要擔心,乳頭嘅大小慢慢都會回復至以往嘅情況。

另一方面,平日我哋都比較少認真留意或精準地量度乳頭嘅大小,依賴目測未必可以明確地得知乳頭大小嘅變化。見到你對乳頭可唔可以回復以往嘅大小都感到擔憂,你本身係咪對自己嘅乳房或者乳頭嘅外觀特別敏感,或者覺得身體應該要維持某一個狀態先係理想,所以會擔心性行為嘅刺激可能會導致身體有明顯嘅變化呢?其實每個人嘅身體都唔一樣,而身體亦會隨住唔同嘅因素出現改變,係冇一個「完美」嘅標準架!即使出現變化都係平常嘅事,唔需要太過擔心 :relaxed:

1個讚

冇受損或者發炎呀
純粹感覺上乳頭比平時大同凸 覺得有啲核突 :joy:

睇到你嘅回覆,好開心知道你身體上冇出現問題:two_hearts:

乳頭大小有改變可能唔係你預期會發生嘅事,可能呢種突如其來嘅感覺都會令你覺得有啲難以接受。甚至因為同自己以往嘅狀態有分別而令你覺得好似好核突咁。但其實乳頭係我哋身體嘅一部分,佢嘅大小同埋幾凸,就好似上面同事所講乳頭受到一啲外來或者激素刺激而變大同變凸,係身體嘅正常同自然變化,而且隨著時間都會慢慢回復,我哋都可以嘗試下接納自己身體係會係唔同時期同影響下有唔同嘅狀態:two_hearts:

但係如果真係覺得核突之外,已經接受唔到,有一啲想傷害自己嘅想法嘅話,需要去尋求一啲專業輔導,例如輔導員或者係性治療師。當中有啲係私人機構或者係公營機構有提供相關服務。如果有需要嘅話,視乎返你自己嘅經濟能力同個人選擇而去揀一個適合自己嘅專業輔導求助。:otter::two_hearts:

希望解答到你嘅問題啦:otter:
(Intern同學 Dorothy Cheung)