女朋友第一個月食事前避孕丸
在家計會評估後
叫她月事5天食
我想在他吃的第八天不帶安全套做性行為
想請問事前避孕丸是不是在七天已經生效
還有如果我在不內射情況下
意外懷孕的機率是不是比用安全套
還要細？
如果喺月經頭五日內服用事前避孕藥，其實即時已經有避孕效果。如果完美使用嘅話，會有99.5-99.7%嘅避孕效果。但值得留意嘅係，如果係月經第六日或之後服用事前避孕藥，一般都會建議之後七日嘅安全性行為都配合返安全套。但如果女朋友係第一次食事前避孕丸，即使係月經頭五日內食藥，我哋都會建議之後七日嘅安全性行為都配合返安全套，原因係第一次食藥嘅話每個人嘅身體反應都唔一樣，為咗避免因為出現嚴重副作用或者嘔吐而令藥效喪失，我哋都會建議頭7日要額外使用安全套嘅。不過你哋食到第6日如果身體都無出現咩嚴重副作用的話，基本上都代表身體適應緊藥效，即使發生無安全套嘅性行為都唔需要擔心，避孕藥嘅藥效已經可以做到避孕嘅效果。
回應你對於安全套同埋體外射精嘅問題，如果睇返數據，體外射精嘅避孕效果係78%，而男用安全套呢，完美使用有98%嘅避孕效果。所以而且安全套係可以同時避免意外懷孕，同埋感染性病。但如果個前提係女朋友已經服用緊避孕藥，咁其實體外射精，或者內射而導致意外懷孕嘅風險都比較低。所以的確係服用事前避孕藥嘅效果比較好，最安全就係事前避孕藥+男用安全套一齊用，咁就最安心啦。
留意到你話女朋友第一次食避孕藥，提返你哋，如果漏食藥，係12-24小時內補食返，唔同牌子嘅避孕藥有唔同嘅補食時數，詳情可以問返家計會。
（Intern同學 Fionn）