其實「全程使用安全套」即係幾時開始戴？前戲口交/用手嘅時候要唔要戴？
如果唔使的話，前戲個段時間有分泌物會唔會有懷孕風險？
同埋如果前戲手掂過對方性器官，有機會掂到分泌物，係唔係要先洗手再戴安全套？
前戲個段時間分泌物會唔會透過手指入左陰道？
問呢啲問題好白痴，但因為從來無人會仔細解釋一般性愛嘅步驟係點，上網嘅資料又籠統，av又信唔過，所以覺得好迷茫，希望有人解答我啦thank you:(
Hello,好多謝你願意分享你嘅疑問啊
「全程使用安全套」最理想係由陰莖勃起時就開始使用，因為陰莖喺性興奮時會分泌透明嘅尿道球腺液，當中都有機會含有精子，如果直接接觸到陰道都有機會造成懷孕。不過一般人都會喺前戲後，陰莖準備插入前先用安全套，直到射精為止。安全套個作用係降低感染性病，細菌感染嘅風險，增加陰道或者係肛門嘅衛生，降低懷孕嘅風險。前戲時好多時都係進行非插入式嘅性行為，例如口交或者指交，如果擔心呢啲性行為嘅安全性，其實都有相應嘅安全措施可以使用。如果前戲嗰陣都用嘅話，安全套就會有細菌㗎啦，另外安全套上面都會有潤滑劑，未進行陰道性交嗰陣時，唔多唔少都會令安全套嘅潤滑劑少咗， 增加左安全套同陰道嘅磨擦，令到潤滑嘅能力低左
口嘅話可以用口交膜用喺同進行口交時用嘅，可以舖喺性器官上面，阻擋口部同性器官之間嘅直接接觸。另外，市面亦會有口交套，即係冇儲精囊同潤滑劑嘅安全套，可以用喺陰莖上面去口交。
指交嘅話可以用指套，佢同安全套相似，但尺寸比安全套細。佢係套喺手指度，喺準備用手指插入嘅時候用嘅。減少分泌物或者細菌經手指進入到身體。
以上兩個方法同樣都係為陰道同肛門作出保護，更加衛生而且亦都可以預防到性病傳播。
口交膜，指套主要係性用品商店先會買到，如果一時之間買唔到，可以嘗試用安全套去代替。口交膜嘅話，你將安全套嘅頭同尾剪走，再喺安全套嘅中間剪開，攤平，咁就變成口交膜。當然有潤滑劑嗰邊，向着陰道或者係肛門。而指套方面，直接將安全套套入去手指度，就已經變成指套㗎啦
另外，你擔心前戲期間會唔會因為接觸到分泌物而導致懷孕嘅問題，的確陰莖分泌嘅尿道球腺液𥚃面都會有少少嘅精子喺入面，但其實精子暴露喺空氣之下嘅存活時間好短，除非係即時插入陰道，否則都好難會因此造成懷孕。不過，如果接觸過分泌物，最好都係先清潔一下對手再進入對方嘅身體，盡量將風險減低，亦可以減少細菌進入到身體造成感染嘅機會。
戴安全套嘅情況亦一樣，最好可以清潔一下對手再戴，減低手上可能有分泌物或細菌殘留嘅機率，令自己更加安心。可以考慮係附近放定一啲紙巾或濕紙巾去清潔，咁就唔使特登走去洗手啦。
希望可以解答到你嘅問題啦
（Intern 同學 Dorothy Cheung)