我第一次食Yaz，上次月經20/5-24/5，月經第10日食(29/5)，已經食左8日，除左第一日7:45pm食之外，其餘日子都9:00pm食，都冇乜副作，冇嘔，係有一兩滴啡色分泌物。
想問下我非經期食如無懷孕，下次黎經係會同上個月差不多定係食白色藥丸既時候黎？
另外，今日同男朋友有性行為冇用套內射左，想問下懷孕風險如何，有冇需要食事後丸？但好擔心事後丸傷身。我自己睇過今日都算係危險期。但其實我知危險期未必準，因為上個月因為亂經問題，醫生開過藥比我調經，已經唔知幾時會黎m，唉 好擔心。
另外仲想問，啱啱先feel到有啲secretion，係粉紅色既，之後抹抹下見到鮮血，點解會咁？好驚，其實之前性行為之後都會流血（我第九次有性行為，同對上一次隔左一個月），但上個月check左柏氏抹片，細胞正常，我應該再去多次？
好驚 衣加又驚有左，又驚身體有事。
Hello
想知道你第一次服用避孕丸有冇諮詢過醫生嘅意見。因為避孕藥唔係個個體質都可以服用（例如有心臟、腎臟、肝臟或者免疫系統問題嘅人就未必適合食）。而且市面上每款避孕藥都有唔同嘅人造荷爾蒙成份同劑量。所以，第一次服用嘅話，最好諮詢返醫生嘅意見，搵一個適合自己嘅避孕藥或者係避孕方法
而副作用，因為身體要適應第一次服用嘅避孕藥，所以第一次服用Yaz嘅避孕丸岀現輕微副作用係好正常，例如不規則嘅陰道出血(子宮內膜脫落）想嘔，頭痛。而副作用通常喺你服用1-3個月後身體適應咗就會消失，有啲可能會耐少少，大約6個月。視乎每個人嘅身體適應情況
仲有另一個原因可能你每日服用嘅時間唔定，都有可能令你出現不規則陰道出血。我見你第一日服用嘅時間同之後食嘅時間唔同。所以，每日服用時間最好係同一時間食，例如你第二日係夜晚九點食，每日就keep住夜晚九點食，咁樣可以降低不規則陰道岀血嘅情況如果漏食嘅話，要喺二十四小時內補翻。
Yaz嘅副作用係短暫同暫時嘅，如果係持續出現，陰道出血情況嚴重咗等等，就要去搵醫生做返個詳細檢查
Yaz避孕藥係低劑量嘅人造荷爾蒙去抑制自身嘅荷爾蒙分泌，抑制返排卵、增加子宮頸黏液嘅粘稠度、同埋改變子宮內膜環境，達致避孕嘅效果。而入面有分活性成份嘅藥丸(24粒粉紅色藥丸)同埋非活性成份嘅藥丸(4粒白色藥丸)。粉紅色藥丸裏面有上面所講嘅低劑量人做荷爾蒙。而食冇荷爾蒙成份嘅白色藥丸係令體內嘅荷爾蒙水平下降，唔可以維持到子宮內膜嘅厚度， 令到子宮內膜脫落，從而出現月經。所以 當你服用Yaz避孕丸，月經嘅出現唔會同上一次嘅時間差唔多，而係服食白色藥丸之後先岀現。
服用避孕藥
醫生通常建議月經頭五日開始服用，家計會嘅話通常建議第五日先開始食第一次，第一可以確保你服藥時冇懷孕、第二副作用會相對少啲啲因為月經初期開始服用嘅話，可以慢慢調節體內嘅荷爾蒙水平，從而令避孕效果會好啲。但係非經期服用的話，子宮內膜厚度可能已經達到一個水平，擾亂自身荷爾蒙嘅分泌，延遲月經出現。會令到自己身體唔舒服，可能會有相對比較明顯嘅副作用。
另外都想你明白，「危險期」其實即係「排卵期」，避開「危險期」其實都唔能夠作為有效嘅避孕措施。因為排卵好容易受到其他身體因素影響。
但係你而家食緊避孕藥，理論上係唔會排卵嘅，所以服藥嘅情況下亦都唔會有所謂「安全期」或者「危險期」。
不過由於你啱啱開始食藥，身體需要時間適應人造荷爾蒙，去建立避孕功效。通常建議如果經期頭5日內服用第一粒藥，咁食藥嘅頭7日如果發生性行為都要使用安全套作為額外嘅安全措施；而如果經期5日後先食第一粒，就要食藥嘅頭14日如果發生性行為都要配合安全套。
再睇返你嘅情況，係月經第10日先食，你喺服食避孕丸嘅頭14日內都係需要安全套，如果冇用到安全套嘅話，懷孕嘅機會都會有。
所以你可以考慮性行為72-120個鐘內搵醫生同埋服用事後丸。但係唔建議用事後丸作為長期使用嘅避孕措施，因為事後丸裏面嘅荷爾蒙劑量比較高，長時間服用嘅話會導致身體出現唔良好嘅副作用，例如係作嘔，頭痛，荷爾蒙紊亂，從而出現水腫等等。不過如果只係單次使用，會出現副作用，但唔會對身體有好大嘅影響嘅。有某啲事後丸食完之後同一個月經週期內唔可以食避孕藥。所以建議你如果決定要進行緊急避孕，要用醫生講清楚你嘅服藥情況。
如果你衡量完風險，決定唔進行緊急避孕，而你又擔心嘅，你都可以考慮驗孕。喺性行為7日後（6月13號）驗孕會有初步結果，而11日後（6月17號）驗孕就會有相對準確嘅結果。
對於你最新遇到嘅問題。有粉紅色嘅分泌物，然後有鮮血，可能係分泌物入面有血液溝埋一齊，所以會有粉紅色嘅分泌物。可能係喺插入式嘅性交依個過程入面，潤滑方面可能唔夠，增加咗磨擦，從而岀現陰道破損出血情況。唔夠潤滑嘅話可以用潤滑液，減低陰道同陰莖磨擦（關於潤滑劑嘅資訊，可以參考：Login • Instagram ）。因為有岀血嘅情況，個人衛生方面要更加注重，減低細菌感染嘅機會。另外，知道你上個月做左柏氏抹片，細胞正常。但係岀現非經期岀血，要多啲留意依排嘅情況。如果情況冇變好，或者嚴重咗，最好搵醫生更做詳細嘅檢查
最後，避孕藥只可以有避孕嘅功能，但係最好都用埋避孕套，可以預防性病傳染或者其他感染（例如陰道炎、念珠菌感染）嘅可能
希望可以解答到你嘅問題啦
（Intern同學 Dorothy Cheung ）
決定淨間去睇醫生食事後，想問:
-
食完事後唔可以再食Yaz? 我洗唔洗繼續食Yaz?
-
好驚事後會失敗，上網睇排左卵食事後就會冇用，咁我食完之後懷孕機會大唔大？
好擔心好擔心。
食左120小時個隻，爬過文見到唔可以再食避孕藥，點解既？因為如果係我今晚9點就要食Yaz
究竟洗唔洗食咖？thanks
唉就算食完都好驚會冇效，但又唔知幾時先黎m，又要過多好多日先驗到。
呢個問題請你參考返：
呢個問題請你睇返：
緊急避孕藥係用高劑量嘅荷爾蒙去抑制排卵、阻礙卵子同精子結合、同埋阻礙受精卵著床。無論有冇排咗卵，只要喺時效內（72小時或者120小時）喺醫生處方下服用，服食之後冇嘔吐或者嚴重腹瀉。咁避孕成功率係好高嘅。
120小時嗰款係「黃體激素受體劑」緊急避孕藥，會影響yaz嘅避孕功效，所以食咗事後丸之後，唔建議再食yaz。
呢個亦都係點解我哋喺上一次回應講：
如果你真係好擔心嘅，可以進行驗孕，可能你親眼見到驗孕結果會安心啲
嘗試放鬆下心情，做下其他有興趣嘅嘢分散下注意力啦。