想要做女仔

其實男仔想做女仔正唔正常?

你好呀,首先多謝你嘅提問~

了解到你對於男仔想做女仔正唔正常產生左疑惑。咁其實可以理解到係有關性別認同嘅問題啦~而你所提出嘅問題可能係關於跨性別(transgender)呢個身份概念,亦都即係一個人嘅性別認同/性別表達並唔等於佢嘅原生性別。簡單啲講就係只要認為自己係某個性別,但同生理性別唔一樣,就可以定義自己為跨性別。

咁另外其實都有各種方式去表達自己係跨性別人士,可以透過性別表達,以自己覺得適合的性別生活,或者進行性別肯定手術(Gender Affirming Surgery, GAS) 更改性徵,變成與自己性別認同相同的性別,又或者易服,除咗係一種性別表達方式,亦都可以係一種普通服裝上的選擇,但易服亦都可以同一個人嘅性別認同及性傾向無關。(留意番:跨性別吾係性傾向,,跨性別者可以有自己的性傾向㗎!)

咁至於正唔正常,其實係好正常,每個人都可以有自己嘅性別認同,其實你會有疑問都好正常,因為有啲人的確會覺得跨性別係令人覺得反感同將佢污名化,而點解會有人咁諗呢?其實係起源於醫學和心理學領域,因為錯誤地將所有跨性別者標記為精神病或性異常,所以先會導致到出現呢個情況。另外其實每個人對自己性、性別、性傾向等等嘅探索都係一個過程。「跨性別」只係其中一種身份,如果覺得呢種身份標籤唔可以準確咁去形容自己嘅身份,都係完全冇問題嘅。

另外都想額外再介紹啲額外知識俾你嘅~其實性別都好多元化㗎,除咗二元嘅男女之分,都有非二元/性別流動呢啲身份。非二元性別(non-binary)/性別酷兒(genderqueer),就係指「男」「女」以外;性別流動,就係指在性別認同之間流動。簡單啲講就係你可以覺得自己兩邊都唔係而唔去定義,又或者可以跟你自己嘅諗法去定義。

所以其實男仔想做女仔都可以係正常嘅一件事嚟,每個人都可以有自己嘅性別認同,所以勇敢去做自己就可以㗎啦!如果你仲有啲疑慮想去了解,又或者唔肯定可以搵邊個去傾都可以隨時再我哋㗎~
(Intern同學 Ken Ngan )

2個讚

我覺得好正常,勇於做自己,更何況你鍾意做女仔唔會騷擾到人,同埋別人唔可以操控你自己心裏面所想!

所以你要加油!

1個讚

但係我驚做咗女仔之後俾同學笑

同埋我想知道女性激素邊度可以買到

Hello~:smiling_face_with_three_hearts:好欣賞你有勇氣面對自己嘅性別身份,期望做返最真實自己。

但係喺性別過渡嘅階段之中,我哋都不得不承認會有好多嘅障礙,包括親人同朋友嘅唔認同,其他人嘅目光同質疑等等。性別過渡(gender transition)總共有三個階段。第一個階段係社會過渡(social transition),即係包括改變你嘅穿着,髮型,性格,同埋別人對你嘅稱呼等等(他->她,先生->小姐)。第二個階段先至係生理過渡(medical/physical transition),即係進行變性手術,或者使用激素進行藥物治療。第三個階段就係法律過渡(legal transition),即係通過法律渠道,更改身份證上面嘅性別。呢個過程所需要嘅時間可以好長,由幾年去到十幾年不等。當中要面對嘅唔單單係同學嘅取笑,仲包括父母嘅唔認同,職場上嘅歧視,甚至會被素未謀面嘅陌生人指指點點。:cry::cry:

所以如果你真係下定決心想做一個女仔,咁你要有心理準備去面對眾人嘅唔理解,同埋要有耐性同佢哋溝通,等佢哋接納你。呢個過程係唔容易嘅,需要一個好強大嘅心靈,同埋好堅強嘅意志。香港人雖然自認為思想開放,但係傳統觀念根深蒂固,加上資訊並冇我哋想像中咁流通,法律亦都冇咁包容,所以點解喺香港,即使有啲人對於自己嘅性別身份有唔認同嘅情況,佢哋都唔夠膽講出嚟,或者諗辦法去作出改變。:pensive:

如果你真係好想成為一個女仔,首先你要得到屋企人嘅同意,特別當你未成年,好多處方藥物同埋手術都需要喺監護人嘅同意同簽署下先可以進行。詳細嘅醫療資訊可以參考以下網址:性別重置醫療資訊

至於荷爾蒙藥物同埋激素,因為佢哋都係醫生處方藥物,一般情況下,醫生都會要求你先去做心理咨詢,確保你對自己嘅情況有充分嘅了解,並且建立好一定嘅心理準備,先會處方藥物俾你。要知道性別重置手術係不可逆轉嘅,每一步都需要非常謹慎,千祈唔可以心急。:relieved::leaves:

如果你想得到更多跨性別嘅資訊,或者想聽下跨性別者嘅親身經歷,都可以聯絡以下機構:Gender Empowerment 性別空間 – Transgender Eye for the Gender World

呢個機構喺香港幫助咗好多跨性別人士,佢嘅創辦人都係一位跨性別男性,仲會成日去唔同嘅地方舉辦工作坊同埋講座。我之前都喺裏面認識咗好幾位跨性別女性,佢哋嘅分享都非常有參考價值。如果怕羞嘅話,可以inbox佢哋嘅IG或者Facebook問問題,佢哋一定會好樂意答你嘅:hugs:

希望以上嘅資訊可以幫到你!雖然男跨女呢條路唔易行,但都想你知道有人會一直支持同埋接納你,你並唔孤單:heart:

1個讚

我唔夠膽同父母講

明白要同思想可能相對保守嘅父母講依件事的確有壓力嘅:persevere: 父母知道後,的確有機會反應好大,或者接受唔到,我地講之前都要做好心理準備如何應對,不過亦有父母知道後表示理解,甚至支持子女勇敢做自己:two_hearts: 所以有時情況未必真係好似我地想像中咁差嘅:thought_balloon: 當然如果你覺得自己未準備好同父母講,同處理有可能發生嘅衝突嘅話,都唔需要強逼自己講出黎:speech_balloon: 想成為女仔,除左做性別重置手術外,亦可以先從外觀、衣著打扮著手,體驗下身為女仔嘅感覺:relaxed:

1個讚