Hello 我想問下食事前避孕藥係會唔會有谷m情況？
我自己係食優悅 食咗5個月
未食之前個個月都會有下腹漲痛
食咗之後 發現係個個月都唔同 有時有 有時無
而家Suppose仲有7日黎m 又有少少下腹漲
好擔心會係懷孕 定唔知谷m
你好呀，首先多謝你嘅提問～
咁首先我講解一啲避孕藥嘅原理先，亦都即係荷爾蒙避孕法，透過人造荷爾蒙，抑制排卵、增加子宮頸分泌物黏稠度，阻止精子通過，阻止受精又或者改變子宮內膜環境，令受精卵難以著床。
比較常見嘅副作用就會有頭痛、頭暈、乳房漲痛、點狀出血、月經不規律、改變經血量、改變月經長短。通常呢啲副作用都會喺頭1-3個月內消失，月經亦會變得規律，但實際適應嘅時間就視乎每個人嘅體質，有啲人甚至需要6個月嘅時間先會適應到藥效架。所以你出現下腹漲痛其實都係有機會嘅。當然，除咗避孕藥嘅副作用，都仲有其他因素可能導致腹痛，如果你發現情況持續或者痛楚有加劇嘅跡象就要盡快去睇醫生啦。
另一方面，避孕藥係利用人造荷爾蒙取代身體天然嘅荷爾蒙週期，製造一個比較規律嘅月經周期，過程中一樣會有荷爾蒙水平嘅變動，繼而都有機會導致類似谷M嘅症狀（例如胸脹、腹痛、流啡等等）出現。不過無論有冇食避孕藥都好，呢啲谷M嘅症狀都唔一定每個月都會有，亦唔係每次嘅程度都一樣。不論係有定冇出現，都唔能夠用作判斷係咪就快嚟月經或者係咪已經懷孕。
見到你都擔心自己會唔會係懷孕，其實事前避孕藥的成效都係高嘅，完美使用可以有99.5-99.7%，平常使用亦都可以達到91-92%嘅～所以其實成功率都係高㗎，而且你已經食咗5個月，如果一直都係穩定地食藥，好少會漏食的話，其實藥效都已經係體內穩定建立，會懷孕嘅機率係非常微。
其實影響月經嘅因素都係好多嘅～例如：荷爾蒙分泌、飲食、休息、壓力、生病、藥物。所以亦都可以留意多啲自己嘅身體情況，又或者係心理上嘅壓力，可以多啲同伴侶溝通傾訴自己嘅壓力，調整好身心嘅狀態～
當然，如果都係唔安心嘅，你都可以嘗試使用驗孕棒，最快喺性行為7日後驗已經會有初步結果，而喺性行為11日後或者預計月經嘅日子驗結果就會更加準確。用驗孕棒嘅時候亦記得要跟從説明書的指示驗孕，避免以下情況：驗孕時間錯誤、浸泡尿液時間太短、直接將驗孕棒浸於馬桶內、超過有效時間後閲讀結果、亦切勿使用已過期嘅驗孕棒！
（Intern同學 Ken Ngan ）
唔該哂你啊！
我仲有少少野想問
明白咗食避孕藥一樣會有谷m症狀
咁想知係咪都會體溫高？
因為我呢兩日間中都感覺到自己體溫偏高 但又無發燒
想知道食避孕藥期間月經前身體會稍為高溫嗎？
我喺上網睇又話食避孕藥係唔會有高溫期
亦都見到有人話高溫係懷孕症狀之一
所以都有少少擔心🥲麻煩哂你
Hello
高溫都係其中一個食避孕藥嘅症狀，但並唔會出現喺每位女性身上。明白好多月經前或服食避孕藥嘅症狀都會同懷孕前症狀都好相似，但我哋都唔可以用呢啲症狀去判斷自己有冇懷孕。如果驗孕嘅結果係陰性，咁就可以撇除意外懷孕嘅機會啦～