求解 好驚😭

3/5黎咗M,之後25/5 同男朋友有Sex,有帶套同外射。之後7/6 都有Sex,但係冇帶套只係入咗一下,到而家都未黎M,平時最多只會遲五日,前嗰幾日開始胸部脹,會唔會有咗?🥲

Hello 好多謝你嘅提問~ 首先,睇到你話3/5嚟咗M,到到今日都未嚟M。雖然你以往可能留意到最遲都只係會遲5日,其實好多因素都可能會令經期唔穩定㗎,例如:休息時間唔夠、大壓力、長期熬夜、生活習慣改變、食藥、長期處於擔心狀態 等等。亦無話遲嚟係會有一個特地嘅數字嘅,所以其實可以唔洗擔心咁多。

睇到你話只係入咗一下,懷孕風險相對比較低嘅,但其實性器官有直接接觸,都可能會導致懷孕嘅。因為性興奮個時陰莖流出嘅透明液體(尿道球腺液)都可能會有精子係入面,所以最好就做好安全措施或者全程都戴足安全套啦。

睇到你話胸部都有啲脹,如果7/6之前無再發生無做安全措施嘅性行為,咁胸脹都唔會係懷孕嘅症狀,因為卵子受精著床需要6-9日嘅時間,而今日距離你上次發生性行為都只係得2日。同埋其實都唔應該用身體嘅症狀去判斷係咪懷孕,因為有好多其他因素都會導致呢啲情況㗎。相反地,胸脹都係常見就嚟嚟M嘅症狀,不如調理返個心情先,等多幾日睇下會唔會嚟M先啦~

如果都想求個安心,最快可以係有性行為嘅7日後用驗孕棒做測試,而11日後呢就會有比較準確嘅測試結果。如果真係好擔心,就可以係性行為72小時後/120小時內經醫生處方食事後丸,進行緊急避孕。

最後,如果唔想之後再好似咁樣擔心,就要全程都用足安全套,由陰莖勃起或者接觸陰道之前就已經要戴,或者可以做返其他安全措施。例如:事前避孕藥、避孕針、避孕貼、子宮環 等等,按照自己嘅需要去做選擇。

(Intern同學 Fionn)