食完事後 谷M?

話說食咗事後第二日今日有啲好似谷M嘅感覺
即係平時嚟M 前五日會胸脹同埋腰痛
但係我上一次嚟M係6月1號
正常來講要差唔多七月先嚟
定係呢個係食事後嘅副作用
定還是食完事後會提早嚟M

我哋喺呢個post: 點算會唔會有咗! - #9 Ching_StickyRiceLove 同你講過:

「好似谷M嘅感覺」、「胸脹同埋腰痛」都可能係因為食完事後藥嘅副作用。通常2-3日會消退。
由於你食過未經醫生處方、不能確切知道當中成份嘅藥房買嘅「事後藥」,我哋好難知道你第一次食嘅藥對於你嘅身體有咩影響。如果你覺得唔舒服嘅情況加強咗,就要盡快睇醫生。 :woman_health_worker:t2: :man_health_worker:t2:

而月經係由身體幾個繁複嘅系統互相配合而形成,本身都好容易受其他因素影響,例如荷爾蒙水平、壓力、作息、飲食、藥物等等。所以每人每次嘅月經情況都可能會唔同。你自己都有不停咁講你月經唔穩定。你食咗緊急避孕藥,同埋你而家緊張嘅心情都可能會影響你嚟緊嘅月經。但係我哋都好難去估計究竟月經係會因為咁樣早啲定係遲啲嚟。

希望你睇晒呢幾次post嘅所有資訊,慢慢消化理解完之後會安心啲。嘗試做下你有興趣嘅人分散下注意力,放鬆下心情。有問題隨時搵我地。 :wink: :sparkling_heart:

但係上網有人話 會過兩三日嚟m=粒藥生效

同埋 如果我食過事後 下一次嚟m 可唔可以開始食事前
我打算book 家計會

呢樣嘢並冇科學根據。只要食完藥,冇嘔吐或者嚴重腹瀉,粒藥經過消化吸收就會生效。

欣賞你有嘗試用其他安全措施嘅諗法,可以更加安心。 :blush: 避孕藥喺正確使用嘅情況下有99%避孕成功率,而且都會有令到月經規律嘅功效。如果你月經唔穩定呢樣嘢都對你困擾,可能食避孕藥都係一種解決方法。

食避孕藥之前建議要睇下醫生,因為唔係每個人嘅體質都適合食嘅,而且避孕藥有好多款,每款嘅人造荷爾蒙成份同劑量都唔同。所以要俾醫生評估下你係咪適合/適合邊一款避孕藥。如果你食完事後藥,嚟咗月經之後再開始食避孕藥,事後藥係唔會影響事前藥嘅功效嘅。

你可以月經第一日打去家計會預約睇醫生,或者用佢哋嘅網上預約系統預約。 :woman_health_worker:t2: :man_health_worker:t2: 記得同醫生講清楚你嘅身體情況,同埋記清楚醫生教你點樣食藥,有咩疑問記得同醫生詢問清楚。

同埋想提提你,避孕藥唔能夠可以好似安全套咁,有減低性病傳播同其他感染(例如尿道炎、念珠菌感染等)風險嘅作用。所以如果你將來會食避孕藥,都可以考慮發生性行為嘅時候配合安全套一齊使用。 :relaxed: