同女朋友9號開咗房，係尼期間全程有戴套，之後射完果陣我又喐咗幾下，發現根部嘅毛有精液，同埋啲床單有，我有同女朋友講去食事後藥，但係佢話應該冇精液流入，可能出嚟果陣先漏咗出嚟。
隔咗咁耐，我都係覺得有少量精液流入佢體內，加上佢28號嚟m，我驚我哋開房果日係排卵期，更加容易中。日日睡覺前都係諗尼個問題好內疚。
我想問如果真係有咗，去家計會係不通知家長的情況下可唔可以落咗佢？同埋排期要等幾耐？
我女朋友22歲
你好呀～首先多謝你嘅問題先～
了解到你地全程都有戴安全套，呢個行為其實係好好嘅～可以阻止性器官之間直接接觸，同時亦都可以阻止精子（包括係尿道球腺液及精液內嘅精子）進入陰道，而且亦都有好高嘅成效～完美使用可以達到98%，而平常使用亦都可以有85-92%。所以其實只要有喺整個性交過程都正確使用安全套係可以得到好大嘅避孕成效㗎～
咁另外聽到你講見到陰毛上面有精液，同埋床單都有，有機會係係因為安全套嘅尺寸唔適合，導致有精液倒流，或者除套嘅時候未有小心處理而令精液流出。係完事/射精後，要盡快緊握安全套底部再將陰莖退出身體，而除套時最好係遠離對方身體，而且用紙巾包住安全套前端，再連同紙巾將安全套除落，避免入面嘅分泌物係過程中飛賤出嚟。其實都仲有其他會導致失效嘅原因，可以參考一下我哋嘅ig post～ 了解有關正確使用安全套嘅步驟同令安全套失效嘅原因～
選擇適合尺寸嘅安全套：Login • Instagram
安全套正確使用方式： Login • Instagram
令安全套失效嘅原因： https://www.instagram.com/p/CM4ereiDmIl/?igshid=YmMyMTA2M2Y=
如果因為以上原因而導致有分泌物意外直接接觸到陰部，的確係會有導致懷孕嘅風險。但如果分泌物係如同女朋友所講，只係喺除套過程中意外濺出，並無接觸到陰部，咁其實係唔構成懷孕風險嘅。不過，事後其實可能準確地回想起當時情況嘅細節，而且而家亦已經超過咗可以進行緊急避孕嘅時間（性行為後120小時內可以透過處方事後丸或子宮環緊急避孕），所以現時你哋可以考慮驗孕。最快喺性行為發生7日後已經可以用驗孕棒測試去得到初步結果，而喺11日後或者預計月經嘅日子驗結果就會更加準確。如有需要，記住跟從説明書的指示驗孕及避免使用已過期嘅驗孕棒去進行測試。
另外你提及關於排卵期嘅問題，其實一個月經週期係由嚟月經當日開始起計，直至下一次月經前一日為止。而因為有太多外在及內在因素會影響月經周期以及排卵嘅日子，例如；情緒波動、荷爾蒙變化、生病、服用藥物、生活作息有改變等等，所以雖然經常會聽到話「一個月經週期係28天，會係第14天排卵」其實並唔可以代入去每一個人嘅情況。一般都只可以係月經出現後先可以大概推算番上一個週期係幾時排卵，無辦法準確推算下一次排卵嘅日子。加上卵子係體內最長可以生存1-2天，而精子係體內一般最長可以生存2-3天，所以單憑一紙有時只係差咗一日都會不同嘅風險程度，所以並唔建議大家單憑計算日子去評估會唔會懷孕嘅風險，亦唔建議以安全期作為避孕方法。
而如果真係意外懷孕，因為女朋友已經超過18歲，已經年滿香港嘅合法性交年齡，亦係一個成年人，如果需要係家計會進行終止懷孕手術的話，原則上都係唔需要得到家長同意嘅。不過如果真係懷孕，係情況許可下，我哋都會建議大家同屋企人商量一下，始終終止懷孕手術都係一個醫療程序，有屋企人嘅理解同照顧都會比較安全。如果去家計會求診，一般由第一次面診直到進行手術大概需要2－3星期時間，但實際情況都要視乎當時求診嘅人數安排。而且家計會只會接受身體健康良好、無任何長期病患、而且懷孕期係十周之內嘅人士求診，如果情況唔適合喺家計會診所進行終止懷孕，家計會會將個案轉介去其他醫院。所以，如果真係發現自己意外懷孕，而又確定自己唔想繼續懷孕，盡快去求診會比較好。
咁其實睇完你嘅描述之後，你哋懷孕嘅機會都係比較低嘅～不過如果都係覺得好擔心嘅話，亦都可以同對方溝通下，嘗試去使用驗孕棒進行驗孕、。日後都要小心留意安全套嘅正確使用方法，咁就可以令性行為過程變得更安心，事後亦唔駛提心吊膽啦。
(Intern同學 Ken Ngan)
多謝你嘅詳細解答，依家就等7日後驗孕
你好啊，17號係我哋開房後嘅第八日，我女朋友係朝頭早驗咗係冇中嘅，咁依家係咪唔算最準確？定係唔需要再驗過？
如果性行為後7日進行驗孕就會有初步嘅結果， 11日後就會有較準確嘅結果，你可以同伴侶商量之後睇吓需唔需要喺11日後再進行驗孕
驗咗啦 係冇中嘅