5月9日13日同男朋友有安全性行為（全程帶套，蚊出嚟先射，射水灌水檢查冇漏）
之後我5月20-27日嚟M
之後我個次嚟M冇乜特別 係痛少咗同感覺個量少咁 血係暗紅到鮮紅再之後就變啡色野 全程7日 同平時差唔多
之後5月28日同男朋友有安全性行為 措施如上 但做完之後嘅一星期有胸痛 係按壓先痛 平時都冇 通常係過咗排卵日先開始有
之後再過幾日 我就有深啡色嘅分泌物 用紙巾抹先有鮮紅嘅血 胸亦慢慢唔痛
之後我嘅6月12號突然好似嚟M咁 有流出嘅感覺 有血 鮮紅嘅 或者有啲好細粒嘅血塊咁嘅嘢？但唔痛又冇感覺 一直用護墊都足夠 但14號突然好多咁 但用M巾又係用唔哂
完全唔似嚟M
一直到今日嘅6月16日 早上去厠所只有淺啡色嘅分泌物但之後得返黃色嘅分泌物 冇咗血 但分泌物好水 冇張力
如果照返正常時間我好似仲有3-7日先嚟M
但宜家感覺有少少胸痛（其實都唔知有冇） 小腹好漲少少抽住痛 同埋好攰咁 同平時M嚟前除咗胸之外都好似
所以我會唔會可能係月經失調？
我哋做嘅措施好小心係細心 亦避免有我同佢嘅性器官有接觸 機率應該接近0？
我出血會唔會其實只係排卵期出血？
多謝你嘅提問～明白月經遲嚟係會令人好擔心嘅。首先，因為你進行性行為嘅時候有用安全套，同埋有灌水檢查，所以懷孕嘅機率係好低嘅，唔需要緊張。至於12號嘅出血比好大機會係陰道或者子宮出血。女性喺非經期子宮出血，就屬於陰道出血。 而子宮異常出血或陰道不正常出血，可能係子宮頸發炎、壓力大、荷爾蒙失調等原因造成。亦有可能係性交嘅時候陰道同陰莖磨擦，造成傷口。正常情況下，只要暫停進行性行為，畀傷口有愈合嘅時間，大約3-5日就會好返。既然你16號已經冇再有唔正常嘅出血，咁應該係唔需要睇醫生嘅。月經之後出現啡色嘅分泌物有可能係因為月經後期出血量少，經血排出不暢，喺宮內淤積時間長所導致，所以有機會喺排卵期同分泌物一齊排出。排卵期嘅出血量一般唔會太多，出血的時間都唔會太長，大概持續三日左右。喺呢段期間，仲可能會伴隨輕微肚痛嘅感覺，呢種情況唔需要特殊的處理，儘量注意保暖，飲多啲暖水就ok。而如果你最近精神壓力過大，就有機會導致內分泌失調。而內分泌失調亦係引發月經失調的元兇之一，同時亦會導致啡色分泌物嘅出現。
暫時嚟講，如果你下一次月經遲嚟一個星期以上，咁先需要考慮去驗孕，而如果分泌物冇任何異味，亦冇咩唔舒服感覺，就應該唔會係炎症，唔需要太擔心。但如果你之後性交嘅時候覺得痛，或者陰道壁痕癢，有灼燒感，或者分泌物有魚腥味，咁就有陰道炎嘅風險，需要去睇醫生啦！
咁係咪即係我之前係排卵期出血咋
因為我怕係着床個啲
上網睇話只係好量少好似一兩點咁
而且只係一兩日左右
但係我又出咗血三四日 出血量都多
而且有個好好好好細嘅血塊
咁其實會唔會係我黎M
如果照常計 我宜家好似遲咗一天啦已經
我胸又唔係痛得好厲害 肚又唔係好漲
其實會唔會好大機率有
首先想同你解釋返，排卵同月經其實好容易受到唔同身體情況影響，例如荷爾蒙分泌、作息、壓力、飲食、藥物等等。所以，每人每次嘅月經情況，包括月經週期長度、流血日數、經血量、經血質地、經痛程度、經前不適症狀（例如胸部脹痛、腹部脹痛）等，都會有所不同。你會唔會呢排比較大壓力或者休息得唔好？有冇唔舒服或者食過藥？呢啲因素都會影響到月經嘅。 
用APP或者日曆並唔能夠好準確咁預計到究竟邊日會排卵、邊日會嚟月經，因為APP同日曆只係用你過往嘅月經數據去預測，唔會考慮到你嘅所有身體環境因素。不過有記錄同留意月經情況嘅習慣係好嘅，如果連續幾個月經週期都有好大嘅轉變，都可以考慮睇下醫生，檢查下有冇啲病理性嘅原因（例如荷爾蒙分泌系統／子宮／卵巢問題）導致，了解下自己嘅身體狀況。 
著床出血同排卵出血都會係血量比較少，而且出血日子都會比較少。所以，你上次3－4日血量多嘅情況應該係月經。
如果你哋每次性行為都有全程正確使用安全套，而且過程中安全套冇穿冇漏，咁懷孕風險係好低嘅。而冇任何一種身體症狀可以準確咁話比我哋知有冇懷孕，如果你擔心嘅，不妨驗孕。可能親眼見到驗孕結果你會安心啲。
驗孕係檢測身體有冇hCG呢種受精卵著床之後身體先會產生嘅荷爾蒙，而卵子受精、受精卵著床呢個過程需要6－9日時間。所以，性行為7日後驗孕會得到初步結果，而11日後驗孕就會得到相對準確嘅結果。 
見到你有提及擔心安全套嘅避孕成功率，同埋月經唔穩定嘅情況都令你好擔憂。你可以考慮食避孕藥。避孕藥係通過服用人造荷爾蒙去抑制排卵、增加子宮頸分泌物粘稠度、同埋改變子宮內膜環境，從而達致避孕嘅功效。而且服用一段時間身體適應藥效之後月經會變得規律、經血量減少、而且經痛情況亦會減少。
雖然避孕藥好容易自己喺市面買到，不過每款避孕藥都有唔同嘅人造荷爾蒙成份同劑量，而且並唔係每個人嘅身體情況都適合食，例如有肝臟、心臟、腎臟、免疫功能或血壓問題嘅人就未必可以食。所以我哋會建議，食藥之前睇下醫生，等醫生檢查下你嘅身體狀況，睇下係咪適合同埋適合邊一款避孕藥嘅。如果有需要，可以去家計會診所／母嬰健康院／部分私家診所預約睇醫生呀。
同埋想提下你，避孕藥並唔能夠好似安全套咁，有減低性病傳播同其他感染（例如尿道炎、念珠菌感染、陰道炎等）嘅作用，所以你都可以考慮服用避孕藥嘅同時配合安全套一齊使用。 