事後推遲排卵期

食咗事後 隔咗5日 下面好多好似排卵期先會有嘅白帶係咪正常

咁係咪即係我而家係排卵期?

Hello Debbi :otter:多謝你願意去分享你嘅情況同疑問。

事後丸即係緊急避孕藥。佢係一隻含有高劑量荷爾蒙嘅藥物。而事後丸會透過抑制排卵或者增加子宮頸黏液分泌等嘅方式去阻礙到精子遊向子宮或者係輸卵管,防止精子同卵子結合然後成為受精卵,達到緊急避孕嘅功效。事後丸便唔會可以幫你推遲排卵期,不過服食事後丸之後,有機會出現唔同嘅副作用,例如多咗白帶分泌物、陰道點狀出血(流啡)、胸痛或者頭痛等等。所以,你而家見到有較多分泌物都係常見服食事後丸嘅副作用,唔使擔心:two_hearts:除非,分泌物除咗量有增加,仲好似出現顏色或者氣味嘅變化,甚至性器官出現痕癢或者刺痛,咁就要留意會唔會係有發炎或者感染嘅情況,要盡早求醫檢查。另外,事後丸熱會影響嚟緊呢次嘅月經,例如係月經嘅長短,月經嘅血量同埋月經嘅開始日期。:otter:

最後,事後丸係香港係屬於醫生處方藥物,因為唔係每個人嘅身體同情況都適合透過事後丸作緊急避孕。如果你事前冇諮詢過醫生意見就食藥,而且有部份藥房可能會售賣假藥或者唔係事後藥嘅藥物去避免警方放蛇,變相就會有一定嘅危險。擔心的話,可以去預約家計會診所,見醫生作詳細評估同檢查。

希望可以解答到你嘅問題啦:two_hearts:
(Intern同學 Dorothy Cheung)

但係我今日流啡
量唔算多
咁計唔計係經期第一日
因為我平時經期第一日都係啡流的

你可以觀察多一兩日,因為一般嚟講,流啡嘅血量係一塊護墊可以盛載嘅量,而且唔會超過2日。如果係月經嘅話,咁大機會係因為事後丸其中一個副作用:令月經提早/延遲嚟。