食避孕藥後一直出血

自從食避孕藥之前就一直出血,上網check係正常情況…而且大概會維持三個月左右。

想問下咁係咪陰道出血?
同埋出血期間可唔可以發生性行為?

Hello
想了解返多啲資訊先。你係咪第一次食避孕藥?食咗幾耐?食之前有冇諮詢過醫生意見? 出血情況幾耐?同埋血量多唔多?:face_with_monocle:

雖然避孕藥好容易自己喺市面買到,不過每款避孕藥都有唔同嘅人造荷爾蒙成份同劑量,而且並唔係每個人嘅身體情況都適合食,例如有肝臟、心臟、腎臟、免疫功能或血壓問題嘅人就未必可以食。所以我哋會建議,食藥之前睇下醫生(即使之前有食過,如果中間停過藥,都要再去睇返醫生評估身體),等醫生檢查下你嘅身體狀況,睇下係咪適合同埋適合邊一款避孕藥嘅。如果有需要,可以去家計會診所/母嬰健康院/部分私家診所預約睇醫生呀。 :woman_health_worker:t2: :man_health_worker:t2:

至於出血情況,喺服用避孕藥初期,身體適應緊避孕藥中嘅人造荷爾蒙,係有機會出現點狀出血或者流啡嘅情況,而呢啲情況嘅血量通常唔大。通常1-3個月身體適應咗之後呢個情況就會消退。不過有啲人可能需要更加長嘅時間,例如6個月去俾身體適應同調節;又或者有啲人需要同醫生商議轉藥,甚至要轉幾次藥先搵到最適合自己身體嘅嗰款避孕藥。 :blush:

所以建議你留意返自己嘅出血情況,如果血量都比較大,或者仲有其他比較嚴重嘅不適,都不妨盡快搵醫生檢查下。排除一啲病理性嘅出血原因,例如子宮/卵巢/子宮頸問題。

至於性行為方面,首先想提提你,如果你係啱啱開始食藥嘅話:

  • 如果你喺月經嘅頭5日就開始食第一粒藥,咁喺食藥嘅頭7日如果發生性行為嘅話,建議配合安全套使用,俾身體一啲時間去建立避孕功效;

  • 而如果你月經第6日或之後先開始食藥,咁就建議食藥嘅頭14日發生性行為要配合安全套一齊使用。

如果想安心啲,可以考慮睇下醫生先,再決定要唔要發生性行為。 :relaxed:

1個讚

因為有多囊卵巢症,黎m又唔準,所以睇醫生就介紹我食Yasmin®優思明®,到依家已經食左一盒了:pleading_face:

第一次我係period 第一日食,去到第七日諗住period差唔多完,點知第八九日又開始出血,keep住食完一盒都仲有,但血量唔算多,似差唔多period 完前後既血量:persevere:

明白,你可以繼續食避孕藥,睇下身體適應咗藥物之後出血情況有冇好轉。Yasmin係屬於低劑量嘅避孕藥,所以都有機會導致流啡/出血嘅情況。

如果你擔心嘅,都可以睇下醫生,排除唔係因為食藥而出現出血嘅情況,或者同醫生商量下係應該繼續俾時間身體適應藥物定係嘗試轉藥。 :blush:

1個讚