食避孕藥頭幾日內射

岩岩開始食左yaz避孕藥2日,係食完第二日之後內射 想問會唔會有bb?
好驚因為見周圍都寫頭7日要有阻隔性避孕
諗緊應唔應該食左2日就停左佢:pray:t2::pray:t2:

你好呀~首先多謝你嘅提問~

理解到你係啱啱開始食避孕藥並係食完第二日之後就內射咗。咁解釋返點解會有啱啱開始食藥嘅時候建議如果發生性行為嘅話要配合有阻隔性避孕呢個理論。避孕藥嘅藥效都需要一段時間去建立起,所以一般而言服藥初期都會建議使用返一啲阻隔性嘅避孕方法,例如安全套。另外再補充返,經期頭5日開始服藥就有7日需要配合condom;而如果經期第6日或之後先開始食藥,咁頭14日就需要配合condom,以確保避孕功效。

你可以睇返自己服藥嘅時間係喺經期嘅邊一日,由於你只係食咗兩日藥,身體未必建立到避孕功效,再加上精子可以喺體內存活幾日,可能都會有一定嘅風險如果真係好擔心嘅,可以考慮性行為72小時/120小時內去進行緊急避孕。但要記得一定要去睇醫生先可以進行緊急避孕!可以去預約家計會診所/母嬰健康院/部分私家診所睇醫生食緊急避孕藥。同時亦都要同醫生講清楚自己食緊咩避孕藥,以便醫生建議你應該服用邊款事後藥,因為有啲事後藥食完之後同一個月經週期唔可以再食避孕藥,所以要同醫生詢問清楚~而如果衡量完風險覺得唔想食事後藥嘅,而你都會有擔心嘅咁可以考慮驗孕~驗孕係檢測身體有冇hCG呢種受精卵著床之後身體先會產生嘅荷爾蒙,而卵子受精、受精卵著床呢個過程需要6-9日時間。所以,性行為7日後驗孕會得到初步結果,而11日後驗孕就會得到相對準確嘅結果。你可以計算返日子進行驗孕。

同時亦都想理解返你係食藥前有睇咗醫生先呢,其實都有必要去睇醫生嘅~首先其實避孕藥係適合大部分健康女性,但部分疾病患有/曾經患有嘅人,又或者係有其他情況(例如肝臟/心臟/免疫功能/血壓問題)嘅人都可能會唔適合服用避孕藥,所以我哋都會建議返你哋去睇醫生嘅~有需要可以去預約家計會診所/母嬰健康院/部分私家診所睇醫生。

另外關於應唔應該食咗兩日就停咗佢,其實係唔需要嘅,首先因為中途停服係唔會對身體有好處,因為避孕藥係可以長期使用並唔需要間中停服嘅。另外,如果係未經醫生指示而停服都有可能反而增加意外懷孕的機會,所以其實係唔建議停用嘅~

另外都想建議返,雖然完美使用(詢問醫生意見是否適合使用、每日定時食藥、食藥後冇出現嚴重副作用、確保自己身體適合使用避孕藥)能夠有相當高嘅避孕成效(99.7%),所以期間有冇使用阻隔性避孕,又或者其他安全措施都冇問題,但都會想建議使用返安全套嘅~因為安全套除咗可以避孕之外仲可以預防性病及避免其他感染嘅風險,例如尿道炎、陰道炎、龜頭炎,等等。咁樣大家都可以安心啲~

(Intern同學 Ken Ngan)