遲左一日開始食避孕藥

hello,想請教一下~我食開美意避21粒嘅事前避孕藥,但今個月數錯日子,遲左一日開始食第一粒而夜晚冇補服多一粒(原本月經第四日開始食,但我第五日先開始食),之後全部日子都準時食曬嘅。
咁樣懷孕風險高唔高?感謝:pray:t2::pray:t2:

你好呀~首先多謝返你嘅提問~

喺食開避孕藥嘅情況下遲咗一日開始食第一粒,但之後每日都有準時食返藥的話,其實原則上對藥效唔會有太大嘅影響~

不過,都想了解一下你已經食咗幾耐避孕藥呢?如果係頭三個月內嘅話,遲咗開始食新一包藥物都會對身體適應藥效有一定嘅影響,可能會需要更長嘅時間先可以令月經周期變得穩定同規律。不過,如果之後都有持續咁每日食藥嘅話,其實問題都不大嘅。

有時候可能真係會唔記得咗食藥,又或者遲咗開藥,其實每一個品牌都有佢哋指定嘅補食時間嘅,通常係藥盒內嘅說明書都有寫明。如果喺指定嘅時間入面有補返嘅話,其實對避孕功效係唔會有太大嘅影響,不過都會建議喺補食後嘅個7日內如果要發生性行為都會額外使用返阻隔性嘅安全措施,例如安全套。

最後因為美意避屬於係有停藥期嘅避孕藥,有時唔小心或者未習慣嘅話都有機會會唔記得開新一包藥物。你可以考慮下載一啲專門記錄食避孕藥習慣嘅apps,除咗紀錄返自己食藥嘅時間,亦可以設定鬧鐘去提醒自己開新藥,避免出現遲咗食新藥嘅問題~
(Intern同學 Ken Ngan)