冇戴套咁拍同un

前兩日同我partner冇戴套咁係pussy度拍同un吓, 冇放入去, 而當時應該係嚟m之前幾日, 個app話係low chance of pregnancy, 佢亦都冇射, 想問咁係咪啫係安全? thanks​:bowing_woman:t2:

你好呀~首先多謝返你嘅提問~

雖然你前兩日同partner無進行陰莖插入陰道或者喺陰道內射精嘅性行為,但其實只要性器官之間有直接接觸過,即使只係體外摩擦,都有機會導致懷孕或者性病傳播。因為陰莖性興奮時已經會流出透明黏稠液體,佢係尿道球腺液 Cowper’s fluid/pre-cum,呢種分泌物當中係有機會含有少量精子。雖然比直接喺陰道內射精嘅精子數量少好多,但直接接觸到陰部或者陰道都仍然有機會導致到懷孕㗎!

至於app內所指出嘅low chance of pregnancy ,其實呢一類apps主要係透過用家自己記錄以往月經週期嘅數據去計算一個平均值,去大概估計下一次月經嘅日子或者排卵期等嘅數字。但因為有唔同嘅外在內在因素都可以影響到月經,例如:病過、食過藥、壓力、心情起復、休息時間有大變動等等,所以其實單憑日子嘅計算並唔可以準確推斷到下一次月經嘅日子,而排卵期其實都可以喺出現月經後先可以計算返過去呢個週期嘅日子。總括而言,呢類apps嘅推斷都只係一個初步嘅計算,並非一定準確,所以都唔好過分依賴app內嘅判斷去避孕。
而如果你真係好擔心會唔會導致懷孕,可以考慮喺性行為發生120小時內去進行緊急避孕,例如係服食經醫生處方嘅事後丸。或者如果你哋喺衡量過之後認為風險唔高,無需要進行緊急避孕,就可以考慮喺摩擦行為嘅七日後進行驗孕,呢個時候驗已經會得到初步嘅結果,而喺11日後或者預計月經日子驗結果就會更加準確。

最後,雖然今次嘅性接觸風險唔算好高,但要造成懷孕只需要一粒精子,所以如果未有懷孕嘅打算,或者想預防感染其他疾病嘅風險,日後再發生性接觸嘅時候最好都採取返保護措施。即使係非插入式嘅行為,都可以使用安全套去覆蓋陰莖,又或者用口交膜舖喺陰部上去阻隔性器官之間直接嘅接觸~

(Intern同學 Ken Ngan)