我同男朋友6月7號做咗有帶套性行為+體外射
加上我同佢咩之前已經有一個月冇嚟M
同埋已經喺性愛後7日同14日用朝早第一次屙尿去驗孕都係冇懷孕 嚟緊仲諗住過多幾日驗多次
我上次嚟M係4月8號 已經有多過兩個月冇嚟M
好驚會唔會有咗
Hello 好多謝你嘅提問
首先，見到你話你7/6發生咗有戴安全套加上係體外射精嘅性行為啦，咁使用安全套避孕係有85-98%嘅避孕效果嘅，如果有正確使用安全套，而且檢查過安全套係冇任何穿窿嘅情況，其實無需咁擔心會懷孕嘅。
加上你話係發生性行為嘅7日後同14日後都用咗驗孕棒check，咁你使用驗孕棒嘅日子係正確嘅，即係發生性行為嘅7日後，而11後就會有比較準確嘅驗孕結果。唔知你驗個兩次有無用到唔同牌子嘅驗孕棒呢？如果有嘅話，其實正確使用嘅情況下，驗孕棒都有好高準確度嘅，所以應該就係無懷孕啦。如果都係好擔心都可以去醫院驗血檢查有無懷孕嘅。
睇到你話經期已經有大概3個月無嚟，咁其實好多因素都可能會令經期唔穩定㗎，例如：休息時間唔夠、大壓力、長期熬夜、生活習慣改變、食藥、長期處於擔心狀態 等等。你可以調理返自己嘅作息、心情。另外亦都可能係因為卵巢多囊綜合症導致某啲女性月經周期紊亂，出現「雙月經」或「四季經」嘅情況。如果你發現近年來身體出現變化，例如肥胖、身體多毛、多暗瘡等嘅臨床症狀，建議你可以去婦科診所做身體檢查，睇吓會唔會有機會係卵巢多囊綜合症。
（Intern同學 Fionn）
我係分邊用咗萬零嘅某一隻驗孕棒+clearblue都顯示一條線
但係我仲係好驚
因為唔係心理作用定係咩事
成日都有胃氣 等等嘅懷孕徵兆
但係我又未成年所以真係唔知點算
個人又覺得我中經前症候群嘅徵狀比懷孕徵狀多
所以都唔知係啲咩
同埋我想知道如果滿咗16歲要終止懷孕嘅話 係咪一定要父母一方簽名 即係一定要父母知道… 我真係好擔心
Hello
想了解一下你而家嘅情況係點樣呢？係咪發生咗唔安全嘅性行為令你擔心自己可能會懷孕？現時除咗有家計會診所之外，政府醫院同埋部份嘅私家醫院都有終止懷孕嘅服務
終止懷孕係一個醫療程序，原則上未夠18歲嘅話，都需要由家長或者法定監護人去簽紙同意，你先可以進行呢一個程序。而法定監護人係指當家長無法履行照顧者嘅責任時，法庭會指派一個特定嘅人去作為你嘅監護人，直到18歲成年為止，並非任何一個社工或者係醫生護士就可以為你決定
撇除法例上嘅考慮，如果真係要進行終止懷孕，其實通知屋企人都會比較好。一嚟，進行終止懷孕程序需要錢。二嚟，終止懷孕雖然有分藥物引產或者手術引產兩種，但各自都會有一定嘅風險。如果係手術期間或之後有不良反應，屋企人咩都唔知都會比較危險。如果係喺家計會尋求幫助嘅話，佢哋會尊重你嘅意願，唔會喺冇得到你嘅同意就聯絡你嘅屋企人。但係，家計會都會建議你最好話比屋企人知，保障你嘅人身安全。
去家計會尋求有關終止懷孕嘅流程係：首先要同護士見面，同你做返個人病歷同埋尿液驗孕，之後就會向你去提供相關終止懷孕嘅基本資料同埋輔助。終止懷孕係一個好重要嘅決定，所以，佢哋都會建議喺初診之後重新去考慮係咪要進行終止懷孕。如果真係決定咗進行終止懷孕嘅話，家計會護士就會安排再次約見醫生，同埋商議仲有評估終止懷孕嘅風險，亦都會為你去做身體同盆腔檢查，去確認返係唔係適合喺家計會進行終止懷孕而且，選擇喺家計會進行終止懷孕，係有一定嘅要求。只會為懷孕週數十周內，而且身體健康，無任何長期病患等嘅人士提供服務。如果唔適合喺家計會嘅醫療中心內進行相關程序，佢哋亦會將你轉介至其他公立或私家醫院跟進。另外，家計會輔導員亦會佢哋主要係為你提供情緒疏導同埋支援，協助你同你另一半以及屋企人溝通同討論有關終止懷孕嘅決定。同時亦會提供醫療、法例、社會服務等資源嘅資訊。如果你另一半或屋企人都想接受輔導服務，都可以向家計會求助。
如果呢一刻你係懷疑緊自己係咪懷孕，可以係先進行驗孕，喺性行為發生7日後已經可以透過驗孕棒得到初步結果，而係11日後或者預計月經嘅日子驗結果就會更加準確。利用科學嘅方式檢測自己係咪懷孕，知道結果之後你亦可以更快尋求適當嘅協助，同埋為自己選擇最適合嘅決定。即使驗孕結果顯示真係懷孕，都唔等於世界末日架。其實可以有嘅選擇係好多，糖不甩亦會係度陪伴同支援你。如果有需要，你可以WhatsApp或者Signal 60773941我哋會為你提供協助或者轉介。
嘅話，
你亦可以考慮直接聯絡以下嘅機構去求助
母親的抉擇 https://www.motherschoice.org/get-help/
家計會嘅意外懷孕熱線：51736313 終止懷孕 - 香港家庭計劃指導會
青躍 Home Page ZH - Teen's Key Hong Kong
無論發生咩事都好，大家都會一直係度陪住你，唔使驚！
（Intern同學 Dorothy Cheung）
唔該晒 你哋咁有耐心去回覆我啲問題吖
我今日終於嚟咗m啦
唔好意思呀 今日係性愛後19日然後我朝早驗咗孕係一條線 然後我琴日開始嚟咗m 我想問下會唔會係懷孕出血而唔係嚟m 因為呢兩日嚟m都有血塊 同埋個血量唔多
雖然好似係嚟咗m 但係我仲好擔心🥲
但係我又冇其他懷孕徵狀 可能係我純粹太擔心
懷孕期間出血嘅情況多數會稱為著床出血，係指當受精卵着床喺子宮壁嘅時候有機會造成嘅少量出血，通常只會有幾滴或者最多一塊護墊可以承載到嘅血量，而且係一次性，唔會持續地出血幾日，血嘅顏色亦會同月經嘅唔一樣。一般由受精到着床大概係性行為後六至九日就會發生。而着床性出血並唔係一個常見嘅現象，即使真係因為懷孕都係只有少部分女性會出現嘅情況。 再加上你今朝驗印嘅結果係陰性，所以基本上可以排除着床出血，所以都唔使太擔心啊～
所以係咪我可以完全放心我唔會懷孕吖
我今次月經嚟咗6日 所以應該冇事架嘛
Hello~ 就好似 @Feii_StickyRiceLove 咁講，懷孕後有機會出現嘅著床性出血通常只會有幾滴或者最多一塊護墊可以承載到嘅血量，亦唔會持續地出血幾日，所以照你所講嘅情況，可以排除著床性出血嘅可能性，而月經出現就代表無懷孕，所以唔洗太擔心阿
我而家雖然嚟完M
但係仲會成日ying住ying住嗰肚好似好脹咁
唔知係食飽咗所以肚脹定係點
因為朝頭早起身又會平返
之後又成日都有胃氣
但係乳頭又冇變黑或者深色
然後分秘物又冇話好多 都係正正常常
同埋之前又已經係性愛後7日、14日、19日用晨尿去驗過都係一條線 仲要係用過唔同brand嘅
好似越嚟越焦慮咁
成日都好驚。。
甚至嚟完m都仲懷疑係咪有咗
係咪我太緊張
呢個係我19日後驗過嘅
1個讚
加上我25/6至30/6 嚟m嘅血量都算多
Hello
明白你嘅緊張，但因為你已經嚟咗月經，而且多次嘅驗孕結果都係陰性，所以可以排除意外懷孕嘅機會呀～而你出現腹部脹痛或者有胃氣嘅情況，明白好多月經前症狀同懷孕初期症狀好相似，但我哋都唔可以根據呢一啲症狀去判斷自己有冇懷孕。而且係有好多因素影響月經周期，例如生活作息，飲食習慣，運動量，情緒壓力，都會影響出血量，出血日數，經前症狀等。所以你可以試吓讓自己情緒放鬆落嚟，可能腹部脹痛嘅情況都會有改善阿
我今朝即係性愛後28日用clearblue驗孕棒驗過係一條線
咁係咪就確認咗我冇懷孕 我好驚會check唔到
因為我keep住都有腹脹問題 好對唔住吖 我都知道我問過你哋好多次
同埋我雖然又嚟咗m 但係都仲係超級驚 因為好似話會有懷孕後都可以有月經 所以真係超級擔心
同埋如果用驗孕棒驗嘅話 如果係宮外孕嘅話就唔會驗到