Hello 你好
我同伴侶商量好係食避孕藥+戴避孕套雙重保護嘅
食緊Yaz 24+4 首次服用 第一個月
第一日食係月經期第三日 30/5
首先先問避孕藥嘅問題
跟住到避孕套嘅問題
請問如果假設男方合適嘅避孕套尺寸闊度為52-54mm
如果選擇過另一款避孕套為56mm
有少少唔貼服 稍微微寬鬆
（有試過一次 精液都冇係側面漏出黎）
係咪都唔建議用56mm呢款？
Thank you！
Hello
首先，欣賞你同你伴侶有做好安全避孕
如果係第一次服用避孕藥嘅話，一般都建議喺服用第一次避孕藥之前諮詢醫生嘅意見睇吓服用嘅避孕藥係咪適合自己。因為每一種避孕藥所含嘅荷爾蒙種類同劑量都係唔同嘅，如果服用咗一隻唔適合自己體質嘅避孕藥，係可能會引起嚴重嘅副作用。而且如果本身或者過往有血栓塞、不明的陰道出血、嚴重嘅肝病、腦血管或冠狀動脈疾病、嚴重高血壓和糖尿病等等嘅人，係唔適合服用避孕藥。所以最好就諮詢醫生嘅意見，睇吓自己嘅體質啱唔啱服用同埋搵一個合適自己嘅避孕藥
&
服用避孕藥嘅話，可以空肚服用或者係食完嘢之後先食。但係普遍都會建議食完嘢之後食。咁樣可以降低胃部嘅唔舒服會建議大家每日都要準時喺同一個時段食避孕藥係為咗令身體更快適應有人造荷爾蒙進入身體，特別係食藥初期嘅時候，不過，只要唔超過每個牌子嘅指定補食時間（喺藥盒內嘅說明書會寫明，通常係原定食藥時間嘅12或24小時內）都唔會有問題嘅，所以其實遲咗一個鐘頭之後食都唔使擔心會影響藥效嘅
Yaz嘅避孕藥入面有24粒嘅粉紅色含藥性藥丸（入面有低劑量嘅人造荷爾蒙）同埋四粒白色嘅非活性藥丸（入面冇任何嘅荷爾蒙）。白色藥丸嘅作用係令到身體嘅荷爾蒙水平下跌，導致出現子宮內膜輕微脫落，而成月經通常月經都會喺服食無藥性藥丸期間出現，不過因為仍然有好多外在內在因素會影響荷爾蒙，而頭幾個月身體亦未必咁快適應好避孕藥嘅藥效，所以唔一定喺個4日內嚟月經。一般情況下即使未嚟月經都好，只要你完成晒28粒藥物，就要開一排新嘅避孕藥服用，去令避孕功效持續喺體內建立。但如果食咗新藥7日後仍然未出現月經，咁就要盡快求醫，做翻一個詳細嘅檢查，睇吓自己個身體嘅情況。另一方面，Yaz嘅避孕藥係低劑量嘅荷爾蒙避孕藥，長期服食會令經血量減少，來月經嘅日子或者經血嘅顏色都會比未食藥時唔同。
而安全套方面，最好都揀返貼合陰莖嘅尺寸，咁樣就可以避免到有鬆脫而出現精液溢出，或者有空氣進入安全套內，係磨擦下導致安全套破裂嘅情況因為安全套嘅用途始終都係為咗可以達到高避孕嘅作用同埋預防性病嘅傳染所以你哋嘅情況就最好避免使用呢隻56mm嘅安全套啦。不過，除咗尺寸，其實唔同質料嘅安全套喺體感上都會有所不同，即使量度嘅尺寸係一樣，因為PU物料（製造0.02 0.01厚度嘅安全套）比起乳膠嘅彈性會少啲，所以PU造嘅安全套感覺上都會比乳膠造嘅安全套貼身同緊。所以除咗尺寸，實際用起上嚟嘅體感都係使用安全套時要考慮嘅地方。所以，嘗試新款式或牌子嘅時候可以購買較少份量嘅安全套，例如係3片裝，試一試套喺陰莖上嘅感覺再衡量。
（Intern同學 Dorothy Cheung ）