妹妹成日有陣味

我下面成日都有陣味,而且底底每日都係啲分泌物,都係有啲味。我留意過留係底底啲分泌物原本係透明嘅,不過隔咗陣可能會變黃色。我平時每晚都有用女性專用嘅清潔液清洗,如果有性行為,我做之前同之後都會洗。另外,我平日都係著棉嘅底底。不過下面都係keep住臭臭地,有時仲好大陣味添。我有去睇醫生,去拎啲分泌物去驗,但係佢話我冇乜問題,冇菌。點解我下面成日都係臭臭地?有冇啲方法可以改善?要唔要再睇多次醫生?謝謝:pray:

Hello​:otter:欣賞你喺性行為嘅前後都有保持自己私處嘅衛生:two_hearts:但都想了解翻你所講嘅異味係惡臭,魚腥味定係其他?下體有冇痕癢,紅腫嘅感覺?同埋分泌物除咗黃之外仲有冇其他症狀?

陰道所分泌嘅分泌物係白帶,佢係由子宮頸管、陰道、陰道口等生殖器官各部位所分泌,同滲出物混合而成的白色黏稠物質。佢嘅作用係保持陰道內部濕潤,排走廢物,防止細菌侵入子宮等作用。所以,每日都會有分泌物出現係正常㗎:two_hearts:而且分泌物嘅分泌量都會因特定嘅日子而有唔同,例如係懷孕嗰陣,月經前後又或者受到刺激嗰陣,分泌物會比平時多:two_hearts:
一般而言,白帶係清澈或者半透明嘅無味蛋白狀嘅分泌物。而下體/分泌物平時有啲味(可能係小小酸酸地或者輕微腥味)係正常嘅。陰部同陰道內係偏酸性嘅環境,而且陰部皮膚都會分泌油脂同埋排汗,分泌物接觸到空氣、混合咗汗水、同埋皮膚分泌嘅油脂都可能會有味道同埋顏色上嘅變化(氣味上可能會強烈咗,比較「臭」;而顏色方面就通常會係偏向黃色)。有時天氣比較熱/飲水少/飲食習慣改變/著咗比較緊嘅下身衣物,氣味同顏色可能相對明顯。

而有留意自己分泌物狀態嘅習慣係好好嘅,因為陰道分泌物亦都會反映到陰道嘅健康情況。如果有陰道感染,會有異味,而且白帶嘅顏色都會唔同,陰部都會有唔舒服嘅情況出現。而最常見嘅陰道感染係念珠菌,陰道滴蟲。

:one:念珠菌
念珠菌係陰道裏面其實係最常見。一般情況而言佢唔會發病,但係如果陰道裏面嘅酸性開始變鹼,益菌數量比較少,就會輪到佢滋生速度加快,令到陰道微生物生態失去平衡,二令到陰道裏面嘅念珠菌數量增加。一啲高風險患者通常都係孕婦,有進行陰道灌洗,成日着緊身而唔透氣嘅內褲等等,導致出現呢一種陰道感染。病徵方面,白帶會呈白色嘅豆腐渣或者芝士狀。外陰會痕同紅腫,而且陰道裏面會灼熱性交覺得痛,尿道口灼痛同埋排尿有啲困難。

:two:陰道滴蟲
佢係一種單細胞原蟲,主要透過性接觸傳染,然後寄生喺泌尿生殖道。如果陰道受感染,陰部會覺得痕癢而且會有稀、黃同埋帶異味嘅分泌物。

:warning:除咗上面最常見嘅陰道感染之外,仲有其他會令到陰道出現感染嘅原因,例如係淋病,滴蟲,陰道皰疹等等而令到陰部受到感染。所以,如果你留意到自己分泌物係黃綠色/灰白色/帶血,或者有比較濃嘅腥味,或者陰部有痛楚痕癢嘅話,就建議盡快去睇醫生啦。

陰部護理方面,我哋會建議每日用暖嘅清水溫柔溫和地清潔外陰就足夠,唔好灌洗陰道入面。如果你覺得有需要用女性陰道清潔液洗係可以嘅,就要留意成份,避免使用一啲多添加劑、香料嘅產品;亦都要留意酸鹼值,避免破壞陰部本身嘅酸鹼平衡;用量方面記得唔好過量,你可以根據需要調節使用嘅頻率,未必個個都需要日日使用。而且過度清洗,清洗位置係錯嘅話,會影響到你陰部嘅酸值,降低咗天然保護陰道嘅能力同殺菌嘅作用,咁樣就會令到你陰道出現感染機會較高。而且,即使有著棉質內褲,但係內褲長期都係濕,而陰部長期處於悶熱潮濕嘅狀態,都係會令到細菌滋生,從而產生異味同埋痕癢。所以,建議你可以盡量著鬆身嘅下身衣物,保持陰部清爽。如果分泌物嘅量比較多,都可以嘗試用弱酸性嘅護墊,令到陰部清爽,亦都方便清楚。但係,使用護墊唔好一日一片,因為一日一片,入面滋生嘅細菌都好多,都會令到陰部感染嘅機會增加。所以,如果用護墊記得要更換幾次(通常建議2-3個鐘要換,你都可以因應返自己嘅情況調節),降低陰部滋生細菌嘅機會同滋生速率。

:sparkles:細菌最中意喺濕潤同埋溫暖嘅環境滋生,從而會出現異味,分泌物都會有唔同。同埋如果情況都係冇改變,都仲係好擔心又或者係嚴重咗,最好搵返幫你檢查嘅醫生諮詢,或者係再做進一步嘅檢查,了解返自己身體嘅情況:two_hearts:

(Intern同學 Dorothy Cheung )