yaz事前一問

Hello,我一直都有食開yaz嘅習慣,大概都食咗一年幾。食開之後都冇乜問題,但係下面一直都冇水,要靠ky先可以啪到。我以前其實都幾多水,唔洗用ky。請問如果係咁,我係咪唔適合食yaz?定係我身體有其他問題先冇水?因為我平時下面都有啲異味。我有睇醫生,不過佢話我嘅化驗報告冇問題。謝謝你。

Hello
如果你已經食咗一年幾嘅yaz避孕藥,都想問下你有冇去搵醫生檢查下你仲適唔適合繼續食呀? :face_with_monocle:即使食開都冇乜問題,都建議服食避孕藥期間每年搵醫生檢查下,睇下身體情況有無改變,需唔需要轉藥等等。有需要可以去家計會診所/母嬰健康院/私家診所/你睇開嘅醫生嗰度預約返見下醫生呀。 :woman_health_worker:t2::man_health_worker:t2:

而你所講嘅「水」,其實係「巴氏腺分泌物」,陰道嘅分泌物。本身性行為過程中有幾多分泌物、「夠唔夠濕」,都係有好多因素影響嘅。例如放鬆嘅程度、環境、身體水份、荷爾蒙水平、年齡等等。冇話每人每次都一定會有幾多分泌物先為之正常,分泌物嘅多少同感情嘅親密程度亦冇關係。 :blush:

而yaz係極低劑量嘅荷爾蒙避孕藥,通過人造荷爾蒙去抑制排卵、增加子宮頸分泌物嘅粘稠度、同埋改變子宮內膜嘅環境,從而達致避孕嘅功效。而有啲人係服用避孕藥期間陰道分泌物會變得比較黏稠,好似「冇水」咁,亦有機會分泌物嘅量咁少咗。所以性行為期間可能會唔夠潤滑,需要使用潤滑劑。而呢樣嘢並唔代表你嘅身體唔適合服用yaz :relaxed:

欣賞你哋有使用潤滑劑,唔夠潤滑嘅情況下,安全套同埋陰道都有機會因為磨擦而破損,所以建議可以使用潤滑劑。
而都想俾多啲關於潤滑劑嘅資訊你。唔建議使用油性嘅產品,因為會導致安全套破裂,而且油性產品可能會破壞陰部嘅酸鹼平衡,影響陰道健康。建議使用水性/矽性/水矽混合性嘅潤滑劑。你可以根據自己嘅需要同喜好去選擇適合你嘅潤滑劑。可以參考:Login • Instagram :wink:

關於下體異味嘅問題,見你喺另一個post都有問到,我哋係呢到:妹妹成日有陣味 已經回覆咗,你可以參考返。
而服用避孕藥都可能會令分泌物嘅狀態、氣味、顏色改變,如果你擔心嘅,可以睇醫生嘅時候同醫生講下,睇下需唔需要做個檢查。 :wink:

而如果你擔心陰道發炎或者感染嘅,都可以留意下潤滑劑方面,避免使用一啲有致敏成分嘅產品。同埋保持潤滑劑樽口乾淨,以免細菌滋生。或者你可以購買一啲單次獨立包裝嘅潤滑劑,每一細包大概係一次嘅份量。
同埋雖然你有用避孕藥作為避孕措施,不過避孕藥並唔能夠好似安全套咁,有減低性病傳播同埋其他感染(例如尿道炎、陰道炎、念珠菌感染)風險嘅作用。所以你都可以考慮發生性行為嘅時候配合埋安全套一齊使用。安全套嘅正確使用方式可以參考:Login • Instagram

有其他問題歡迎隨時搵我地呀 :smiling_face_with_three_hearts: