關於漏食避孕藥

本身有食開避孕藥既(Yaz 28粒個種),食左兩年左右。因為平時身體都幾好所以冇特別咨詢過醫生。但今個月我漏食左最後一粒粉紅色既藥,然後依加M遲左四日。因為平時食開藥每次都好準時黎,食左差唔多一年既時候有停過一個月,嗰個月都係準時既,所以依加好驚係咪有左。呢一個月月中既時候有性行為,但係射係外面既,然後大概漏食藥既兩日前都有,但男朋友係冇射到既。今日我買左驗孕棒黎驗(萬寧個隻),係冇事既,但係我驚係太早驗/網上有人講萬寧個隻牌子唔係好準。雖然聽落機會好似好微但係我都仲係好驚:pleading_face:所以想問下你意見:pray:t2:

你好呀~首先了解到你係今個月漏食咗最後一粒避孕藥,出現咗月經遲咗嘅情況,以及可能對驗孕棒都知得比較少。

見到你有講有食開yaz兩年,即使身體冇乜特別,都建議每年睇下醫生,檢查下身體仲適唔適合繼續食呢款藥。有需要就可以去家計會診所/母嬰健康院/私家診所或者你睇開嘅醫生嗰到預約返見醫生呀。同埋見你講中間有停過藥一個月再食返,都想問下有冇啲咩原因呀?建議停藥再食返之前都諮詢下醫生意見。

首先講返有關你係今個月漏咗食最後一粒避孕藥嘅情況,了解到你其實都食咗兩年左右嘅時間,所以藥效已經係你嘅身體入面建立咗,所以食漏咗而你之後都有keep住食嘅話,其實並唔會帶嚟啲乜嘢問題嘅~另外其實都想問下漏食哥日知道之後有冇補食返?因為其實每一個品牌都會有佢哋指定嘅補食時間,所以都會建議如果出現漏食/遲食嘅情況,可以根據返品牌都説明書進行補食(yaz呢款避孕藥嘅話,漏食24小時內補食返都唔會影響到避孕功效)。避孕藥係通過人造荷爾蒙去抑制排卵、增加子宮頸分泌物黏稠度、同改變子宮內膜環境,從而達致避孕功效。如果服食其間冇漏食嘅話,避孕成效係好高嘅。同時亦都建議如果擔心嘅話補食後7日使用返阻隔性安全措施,例如安全套。

另外都了解到你今個月月經嚟遲咗4日,好怕會唔會係有咗。其實了解到你指出自已平時都有食避孕藥以及冇內射嘅情況,其實都已經有一定嘅避孕成效,畢竟避孕藥本身就已經有多過九成嘅避孕成效。不過都會想建議返使用安全套嘅,首先因為你近日內都有出現漏食嘅情況啦,同時安全套除咗可以避孕之外仲可以預防性病及其他感染嘅風險,例如尿道炎、陰道炎、龜頭炎,等等。咁大家都可以安心啲~
Yaz係極低荷爾蒙劑量嘅避孕藥,服用唔定時嘅情況下係有機會令經期有變化;而長期服用亦有機會出現經血減少甚至冇月經出現嘅情況。因為食避孕藥而月經量減少甚至冇咗其實對身體係冇乜影響嘅,不過如果你覺得比較擔心,可以見醫生嘅時間講返,睇下有冇需要轉藥。同埋如果想安心啲,都可以考慮驗孕嘅。

另外了解到你兩日前有出現性行為,今日就進行咗驗孕,但怕驗孕嘅結果唔準確,所以以下有啲要點想分享返,避免導致驗孕失敗~首先係唔好過早驗孕(性行為7日後驗孕會有初步結果,而11日後會有相對比較準確嘅結果)、記得要跟從説明書的指示驗孕(避免以下情況:驗孕時間錯誤、浸泡尿液時間太短、直接將驗孕棒浸於馬桶內、超過有效時間後閲讀結果)及切勿使用已過期嘅驗孕棒!市面上嘅驗孕棒普遍都有好高嘅準確性,所以有正確使用同埋距離性行為有足夠日子嘅情況下,驗孕結果係可信嘅。你可以計算返日子再進行驗孕呀。

(Intern同學 Ken Ngan )

個陣停藥係因為覺得M血好少,同埋上網睇過半年停一個月好似好d。而今個月因為隔左幾日先發現漏食,發現個陣都就黎到黎M既個一日,怕補食返會推遲黎M既時間,所以冇補食到。但上Yaz個網寫話如果有漏食而又冇黎M建議未確定有冇懷孕之前唔好開新一包藥,所以冇接住食阿。然後上網search男仔興奮個陣流出黎既水都有可能帶有精子,所以依加好驚會有Bb​:pleading_face::pray:t2:

你好呀~首先想解釋返其實除非醫生有特別建議,否則係冇必要每食半年避孕藥就停一個月嘅。因為其實每次停一個月後又食返藥身體都需要重新去適應藥物來嘅人造荷爾蒙,重新調節體內嘅荷爾蒙水平同月經週期,變相會令藥效係身體上嘅建立變得唔穩定。如果係擔心身體嘅情況,其實一般都會建議使用荷爾蒙食避孕法嘅人士每一年都去進行身體檢查,以確保自己嘅身體係繼續適合服用避孕藥嘅~而經血量變少其實係一個常見服用避孕藥後會出現嘅情況,有啲人甚至連經血嘅顏色都會變得較淡,亦會變得比較稀,係正常嘅情況,唔需要太擔心係身體出現咩問題呀。

而針對你今次嘅情況,你漏食咗呢包藥物嘅最後一粒藥,而發現嘅時候亦已經過咗幾日。其實每個牌子都會自己指定嘅漏食藥補食時間,例如Yaz就係24小時,只有喺指定時間內成功補食先可以維持避孕功效。而你發現嘅時候已經過咗幾日,即使補食亦對避孕功效無幫助。不過,因為你係漏食咗最後一粒有藥性嘅藥丸,而且你已經持續食藥一段長時間,其實避孕藥嘅原理係透過人造荷爾蒙去抑制排卵,所以理論上你漏食咗最後一粒藥係唔會令身體即時開始返自然嘅排卵。而雖然陰莖喺性興奮時會分泌嘅尿道球腺液當中都有機會含有精子,但由於本身你今個月食嘅藥已經成功抑制咗排卵,所以即使喺漏食藥前陰莖有插入過陰道都唔會因此而導致懷孕。

至於月經遲咗到其實都仲有好多可能性,例如生病、食過其他藥物、有壓力、生活作息有改變等等,唔一定係因為懷孕。現時既然你無接著開一包新藥繼續食,咁都不妨等到月經出現時再開始重新開始食藥。不過,喺食新藥嘅頭七日如果要發生性行為都需要使用返安全套安全措施。另外,都想建議返你重新開始食用前去家計會約醫生做身體檢查,避孕確保自己真係適合食藥先重新開始食藥。而且喺家計會買藥嘅價格會比較平,一旦食藥後有咩身體不適都可以隨時返去覆診,仲可以每年去進行身體檢查確保身體適合繼續服用避孕藥~

(Intern同學 Ken Ngan )