手交會唔會中HIV (AIDS) ?

11號個日我一時色心起,走左去揼邪骨。:pensive:

揼的過情佢冇瞓落黎,大家的性器官冇直接同隔住衣服互相接觸,對方全程都著住底褲。
而對方只係提供手交服務,冇口交陰道交個D,全程冇用安全套。我冇留意對方雙手有冇流血或有冇傷口。

跟住20號個陣開始出現少少頭暈頭重重,我心諗唔通中左HIV,出現急性症狀? 跟著我又醒起18號個日啱啱開始食保康絲呢隻藥物,會唔會係藥物敏感而唔係HIV呢? 我27號開始停藥,但到依家都仲係有少少頭暈。

我好困擾同好擔心係中左HIV,請問手交會唔會有呢種風險?:dizzy_face::dizzy_face:

Hello 好多謝你嘅提問

首先,HIV 病毒主要會係血液、精液、陰道分泌物中有啦,亦都有極少量藏在唾液內。而啲病毒好難穿過完整無缺嘅皮膚侵入人體嘅,但就可以穿破較薄嘅口腔同埋直腸內嘅黏膜。佢嘅主要傳播途徑係:

1.無使用安全套嘅性行為,並接觸到愛滋病帶菌者的精液、陰道分泌物或著血液。

2.受愛滋病毒感染嘅母親,懷孕、分娩個陣,或授乳時將病毒傳染畀嬰兒。

3.經有損傷的皮膚、眼睛、口腔同鼻腔等黏膜而受感染,或者同愛滋病帶菌者共用針筒、輸入受愛滋病毒感染嘅血液或血製成品等。

睇返你嘅情況,你同對方發生性行為嘅時候雖然有著底褲,但都有可能對方嘅分泌物滲透咗底褲而接觸到你。亦都唔知道進行手交嘅時候對方有無流血而接觸到佢嘅血液,就好似上面嘅情況1咁。而HIV受感染嘅初期時,患者可能會出現以下嘅徵狀:

好似感冒嘅徵狀

發燒

體重下降

疲倦

淋巴腺腫脹

但係愛滋病病毒帶菌者都可能會毫無病徵㗎,外表同普通人無咩分別,感染愛滋病病毒之後,潛伏期仲可達10至15年添。

如果擔心自己受感染,可以透過血液檢驗嚟測定。但病毒係感染後嘅首三個月內係無法檢驗出嘅,即係愛滋病毒測試中的所謂嘅「空窗期」。係哩種情況下,驗血人士需六個月之後再進行覆驗,先可以確定檢驗結果。直至目前為止,醫學界仲未有完全根治愛滋病嘅方法,但已經有好多唔同嘅輔助性藥物,可以減低病患者受其他細菌同病毒嘅侵襲,從而改善病患者嘅健康同生活質素。

如果唔想再咁樣擔心以後都係避開唔安全嘅性行為,每次進行陰道性交、肛交或口交個陣都用返安全套啦。

最後,如果唔清楚自己有無藥物敏感,或者適唔適合服用一啲藥,最好都係問過醫生或者做返過敏測試再服用啦。另外都可以提醒返其實身體有好多因素會導致頭暈,除咗服用藥物之外,可能一啲飲食習慣同埋生活作息都會導致到,所以我哋都好難靠某啲事情去作判斷~

(Intern同學 Fionn)