最近同男朋友開始有性行為。由於真係好驚會有咗，所以我哋會雙重防護，同時使用避孕套及避孕藥，並且只會係安全期做愛，外射，做完亦會檢查避孕套有冇穿。但係成日都係網上見到有人雙重防護都中，其實係咪真係咁易中？定係其實只不過係因為避孕套及避孕藥使用不當先會中？因為太驚懷孕，以致心理壓力太大，希望得到解答，謝謝。
Hello~好多謝你嘅提問
明白喺未準備好嘅時候懷孕可以造成好大困擾，可能令你成日擔驚受怕，承受很大壓力。而正如你所講，同時使用避孕藥同埋安全套，如果使用方法正確嘅話，懷孕嘅機率係好低嘅，低過0.1％，基本上係唔需要擔心嘅。不過重點係要正確使用先得～
坊間一直流傳安全套嘅避孕率高達98%，但實際上只有82%。要配合正確嘅使用方法，先可以達致98%。譬如好多人一開頭分唔清安全套嘅正反面，會唔小心將安全套反轉再反轉用。其實陰莖一旦唔小心接觸咗安全套出面，佢就已經被沾污，應該要用過個新嘅。另外，要留意安全套有冇過期，唔好使用過期嘅安全套。而喺撕開包裝之前要檢查包裝有冇漏氣，打開之後要將安全套頂部嘅氣泡擠走先戴上去，留空間畀男性儲存精液，減少破裂嘅情況。絕對唔可以做了一半後才戴套，因為男性喺射精之前已有少量嘅尿道球腺液流出，裏面含有少量精子，都會增加懷孕嘅風險。而做完之後，記得要喺陰莖仲勃起嘅時候抽出陰道，再將安全套拔出。檢查安全套有冇破裂後，再打結扔掉。
而事前口服避孕藥嘅服用方式係，喺經期嘅第一日開始使用，如果係21粒嘅劑型，需要每日吃一粒，吃完21日停7日，下一包喺停藥嘅第8日開始服用，大約依照食3個禮拜、停1個禮拜嘅邏輯嚟服用。
如果選擇28粒嘅劑型，裏面就含有24粒有效錠同4粒無效錠、或者21粒有效錠同7粒無效錠兩種，用法都係由月經第一天開始服用，跟箭嘴指示每日吃一粒，唔需要停藥。一般嚟講，上述嘅低劑量口服避孕藥需要連續服用7至10天，當藥性喺血液中達到穩定濃度，先產生到避孕效果。如果正確服用，可以達到99.9％嘅避孕率。而嗰0.1％嘅好有可能係因為體質因素，或者因為同時服用其他影響避孕藥的藥物，好似抗生素、鎮靜劑等。而避孕失敗，多數係因為服用下一包藥嘅時間太遲、或者連續三日唔記得咗食藥。唔記得服藥都有補救方法嘅，只要喺12小時內盡快補食，並且繼續服用當天嘅藥丸，或者喺第2日連食2粒避孕藥。如果一連2日都唔記得食藥，應連續2天都服用2顆避孕丸，之後再每天服用1粒，直到食哂成包藥為止。不過，呢種避孕效果仍然有風險，最好喺漏食之後嘅7日之內，配合其他避孕方法，例如使用安全套等，確保避孕效果。不過，其實任何藥物都可能影響避孕藥裏面嘅荷爾蒙效力。所以，無論服用事前定事後避孕藥，如果同時服用緊其它藥物，最好配合埋另一種避孕方式。因為服用完抗生素之後，就算隔咗幾個鐘再食避孕藥，都唔能夠保證抗生素嘅藥性唔會影響避孕藥，畢竟藥物喺體內會有半衰期嘅情況，甚至可能影響新陳代謝。除咗感冒藥同抗生素會影響避孕藥效果，一啲精神疾病用藥，例如癲癇、抗憂鬱藥物等，佢嘅影響更大。如果有服用開上述藥物，咁喺服用避孕藥之前，一定要事先查詢婦科醫生，並針對個人情況做調整。
除咗藥物之外，體重都會影響避孕藥嘅功效。曾有經有報導指出，身體質量指數（BMI）大於27.3嘅女性，使用口服避孕藥後卻意外懷孕嘅人數，比起BMI指數標準嘅女性高出60％；假如BMI指數高達32.2，咁意外懷孕的風險就高出70％。因為雌激素蓄積在脂質層，先會降低避孕藥嘅有效濃度，影響效果。體重雖然會影響避孕藥效，但只要唔超出標準體重太多，一般嚟講，對於避孕藥效嘅影響不大。
如果擔心事前避孕藥嘅效果可能受其他藥物或過重的體重干擾，可以考慮使用子宮環呢類較高效嘅避孕方式。
當然，暫時市面上冇100%嘅避孕方法（除非結紮），但只要做足以上嘅措施，即使只用一種避孕方法，個懷孕機率都可以去到98-99％，唔需要太過於擔心
1個讚
多謝你咁詳細回答，得到你嘅回應個心都定啲
1個讚