處女膜問題

平日自慰個陣感覺到陰道口有條肉卡住,令陰道好窄,仲分開左2個洞。其中一個洞勉強放到2隻手指,但男朋友唔入到。
參考返網上資料自己好似係中隔處女膜,係米應該手術剪開佢?我應該邊到睇醫生?

Hello~多謝你嘅提問:heart: 聽你嘅描述,你陰道中間嘅肉條好大可能係中隔處女膜,但因為單憑文字我哋唔能夠確定,所以建議你都係去做返個詳細嘅婦科檢查先,等醫生畀進一步嘅指示。

以下係家計會嘅婦女檢查服務:

婦女健康服務 - 香港家庭計劃指導會

根據網頁嘅資料,嗰度嘅醫生應該唔會幫你做手術切除,但係可以幫你寫轉介信,去可信賴嘅專科醫院做手術。

另外,你都可以去私家醫院或者公立醫院嘅急症室求助。因為呢個手術並唔繁複,如果一旦確認係中隔處女膜,你可以要求醫生立即幫你切除。過程會打麻醉藥,基本上係冇痛嘅,但都要睇醫生嘅指示決定需唔需要留院檢查。

現階段建議你進行性行為嘅時候唔好強行突破處女膜。因為中隔處女膜有好多微絲血管,如果整斷咗有可能會大量出血,唔好好處理傷口嘅話可能會感染,導致陰道炎等等嘅疾病,咁就得不償失啦!