想問如果幫男友打完飛機之後，我哋都用咗紙巾抹了。但是之後大概兩分鐘，我亦都去了廁所，擔心自己隻手因為冇洗手的關係而用紙巾抹了陰道，會導致不少心中咗…
後來男友亦都用了他的手指插入在我的陰道(大概一節中指)，不過期間都應該過了五分鐘。他幫我用手指插在我的陰道後的第二天，我下面感覺到有少少痛，亦都有肚痛。這件事亦都不知如何解決…
自己對上一次的經期是7月1號至7月4號，而這個事情發生是在7月9號（大約6:00pm-7:00pm）。想問咁樣會唔會中… 真係害怕了… thank you
對唔住 自己對依方面嘅常識唔夠多…
Sor for 1999
Hello 多謝你信任我哋，同我哋分享你嘅疑慮 
首先想你知道，要卵子同精子相遇、卵子受精、受精卵著床，先會懷孕。
精子需要媒介（包括精液同尿道球腺液，尿道球腺液係陰莖受到刺激之後分泌嘅透明液體）提供養份先生存同移動到，精子唔會離開咗精液或者尿道球腺液自己移動。當精子離開咗體外暴露係空氣入面，精液或者尿道球腺液會揮發，精子好快就會死亡，亦移動唔到。
如果你隻手接觸精液之後有抹干淨、而且已經過咗2分鐘，咁精子會死亡，你隻手再接觸陰道口係唔會導致懷孕。 
至於指插之後覺得下體痛，可能係因為指甲／手指摩擦導致有輕微破損，或者陰道唔習慣有嘢進入；
而肚痛有好多原因導致，例如消化系統問題或者情緒壓力大。
放鬆下，休息幾日睇下情況有冇改善 
如果情況冇好轉甚至嚴重咗，就要去睇下醫生呀！ 
下次再發生性接觸嘅時候，可以接觸性器官之前清潔乾淨雙手；亦可以考慮使用指套，或者即使唔係發生陰道陰莖插入式性行為都使用安全套，咁就可以避免陰莖分泌物意外接觸到陰道／陰道口。而且使用指套亦可以避免手指／指甲唔乾淨，減少陰道受到細菌感染嘅風險。 
安全套嘅正確使用方法可以參考：Login • Instagram
關於指套嘅資訊：Login • Instagram
有咩問題歡迎隨時搵我地呀 
另外想問，其實處女膜會唔會因此而破，雖然到現在仲未有見到一啲血，但係都係擔心。
仲有呢，精液佢接觸空氣，大概幾多分鐘後會死？
呢個問題我都問咗我男朋友, 佢同我講基本上我哋都用咗紙巾抹咗一次, 之後有隔多一陣先再指插，基本上係冇可能生存到。但係唔知點解自己都係唔係幾相信
之後如果下面仲痛嘅話，需唔需要搽啲cream？定係唔好搞佢，等佢自然好？仲有需唔需要食止痛藥？
仲有我而家有少少腰背痛
同埋我想問7月9號咁樣做咗依啲嘢，其實我都算安全期？(7月1號至7月4號M come)
我相信自己應該要等到八月月經來嘅時候，先能夠安心。只求希望有月經來…
最後真係多謝你哋有一個網站可以俾我哋呢啲唔係幾識性方面嘅嘢，去問你地問題
你所講嘅「處女膜」，其實係「陰道冠」，係陰道前端嘅結締組織，而其實並唔係一塊完整嘅「膜」，而係本身已經有開口嘅，如果陰道冠封閉，經血或者分泌物排出唔到，係需要求醫嘅。陰道冠嘅神經同血液分佈比較小，而且因人而異。所以，唔係話發生過插入式接觸就一定會流血，有啲人就算第一次發生陰莖陰道性行為，都唔會有流血現象。關於陰道冠嘅資訊可以參考：【圖輯】沒有「處女膜」只有「陰道冠」：錯誤命名誤導我們對「第一次」的想像 - The News Lens 關鍵評論網
精液如果就咁擺係空氣入面，入面嘅精子幾分鐘左右就會失去活性，不過究竟要幾多分鐘到仲有好多其他因素影響。而你哋當日已經抹乾咗手，亦都等咗幾分鐘，手上係唔會有精子，正如我哋之前所講
我哋都唔知點解你都唔係好相信，希望你會嘗試理解到，精子並唔係「生物」。
至於下體痛，唔建議自己揸藥或者cream，因為陰部嘅肌膚相對比較脆弱易敏感，而且陰部有弱酸性嘅酸鹼平衡，擅自揸嘢可能會導致皮膚敏感或者破壞酸鹼值，反而影響陰部健康，導致感染或者發炎。如果真係好痛，甚至去到需要食止痛藥嘅程度，我哋都建議盡快去睇醫生。
至於「腰背痛」，可以有好多原因導致，例如姿勢唔正確，坐／企得耐，但腰背痛並唔能夠代表你係懷孕。
另外想你明白「月經」同「排卵」係好容易受到唔同身體因素影響，例如荷爾蒙分泌、飲食、作息、壓力、藥物等等。而且「排卵期」其實要等月經出現之後，先可以推算返幾時排左卵。除非喺醫護人員嘅指導下每日用排卵試紙測試，否則我哋好難準確咁知道究竟幾時排卵，亦都唔會知道究竟幾時係「安全期」。每人每次月經週期都可能會唔同，如果休息得唔好、個人比較緊張，可能都會影響到月經嘅。
或者你可以考慮驗孕。驗孕係檢測身體有冇hCG呢種受精卵著床之後先會產生嘅荷爾蒙，而卵子受精著床需要大概6－9日時間。所以，性行為7日後（7月16號）驗孕會得到初步結果，而11日後（7月20號）驗孕就會得到相對比較準確嘅結果。可能你親眼見到驗孕結果係陰性，即使月經未出現，都會安心。
見到你就算發生指交都好擔憂，建議你同男朋友商量並取得共識，喺你身心準備好之前，唔好發生任何性接觸，但你覺得ready之後，先再嘗試性接觸。
有咩問題歡迎再問呀