Hello，我同我女朋友無套做愛，我feel到想射前列線液，我蚊左出黎先開始漏，但我都驚已經有啲係入面。所以想買事後丸食，我女朋友話就黎M，等多一日先算，咁最後係發生性行為後44小時係藥房買左事後丸食，但我上網睇越遲食越易出事。
1.24-48小時內食事後丸得85%作用，但家計會又話72小時內食失敗率得2-3%，想問邊個先係準確？
2.因為我女朋友係性行為後44小時食事後丸，會唔會呢段期間，其實精子同卵子已經結合左，係埋個床到？
3.另外，因為我啲藥係藥房買，我見藥係香港有注冊，但唔係咩大路牌子，上網搵都搵唔到，同埋係粉紅色，唔知係咪真嘅呢？
Hello
首先想你知道，前列腺液係精液嘅一部分，並唔會獨立存在。你所講嘅應該係尿道球腺液，即係陰莖喺受到刺激嘅時候會分泌嘅透明液體。亦有可能嗰時你已經射緊精。
「月經」同「排卵」係好容易受到唔同身體因素影響，例如荷爾蒙分泌、飲食、作息、壓力、藥物等等。而且「排卵期」其實要等月經出現之後，先可以推算返幾時排左卵。而每人每次嘅月經週期都可能唔同。
所以，無論係月經週期嘅邊一日，只要陰莖／陰莖分泌物（精液同尿道球腺液）同陰道／陰道口有接觸，就會有一定嘅懷孕風險。
緊急避孕藥係用高劑量嘅荷爾蒙去抑制排卵、阻礙卵子受精、同埋令受精卵難以著床，達致緊急避孕嘅作用。所以事後藥係有時效嘅，要喺性行為72小時（ 單一荷爾蒙）或者120小時（黃體激素受體劑）內食。如果有正確服用，而且食完短期內冇嘔吐或者嚴重腹瀉，避孕成功率係好高嘅。
喺香港，事後藥係處方藥物，即係要睇醫生，由醫生處方。而且由於事後藥含有高劑量荷爾蒙，並唔係每人嘅身體都適合食，醫生會檢查身體，詢問病史，認為情況適合先會處方。如果唔適合食事後藥可以性行為120小時內置入子宮環作為緊急避孕嘅方法。
如果係藥房買嘅事後藥，有機會係來源不明、成分不明，或者冇有效成份嘅假藥。 
由於唔係食由醫生處方嘅時候藥，並唔能夠肯定係咪有避孕功效。 
建議女朋友可以考慮盡快預約家計會診所／母嬰健康院／部分私家診所睇醫生，食返藥。
食事後藥其中一種副作用就係食完事後藥之後1－2個月經週期嘅情況，包括月經週期長度、流血日數、流血量、經血顏色同質地、經痛程度、經期／經前不適情況等等。 不過由於唔肯定佢究竟食咗咩「藥」，再加上月經都會受好多其他因素影響，所以唔會話月經一定會遲嚟。
你哋都可以考慮驗孕。驗孕係檢測身體有冇hCG呢種受精卵著床之後先會產生嘅荷爾蒙，而卵子受精著床需要大概6－9日時間。所以，性行為7日後驗孕會得到初步結果，而11日後驗孕就會得到相對比較準確嘅結果。 
最後提提你哋，體外射精並唔可以作為安全可靠嘅避孕方法，建議每次性行為都全程正確使用安全套，關於正確佩戴安全套嘅資訊可以參考：Login • Instagram
或者可以同女朋友商議，考慮使用避孕藥／避孕針／子宮環呢啲避孕方法。選用適合你哋嘅安全措施並正確使用，咁就可以安心啲啦 