食完事後丸副作用keep住有係咪有咗

女朋友17/6 嚟m,同女朋友2/7有性交有戴套發現陰莖根部有啲白色野所以同日去藥房買咗事後丸食,5/7左右有頭暈,到咗8/7陰部流啡開始有乳房腫脹同埋頭痛,流咗兩日,11/7買咗驗孕棒驗咗陰性但係啲症狀一直有乳房腫脹頭痛頭暈,會唔會有咗:cold_sweat:

見到你講有戴套不過陰莖根部有啲白色嘢,白色嘅液體可能係陰道分泌物,喺摩擦期間混入空氣所以變咗白色(就好似發蛋白咁);
不過如果安全套冇正確佩戴(例如冇戴落陰莖底部)或者尺寸唔啱,有機會係精液流出,有機會接觸到陰道口/陰道,有懷孕風險。

不過想你明白緊急避孕藥係用高劑量嘅荷爾蒙去抑制排卵、阻礙卵子受精、同埋令受精卵難以著床,達致緊急避孕嘅作用。所以事後藥係有時效嘅,要喺性行為72小時( 單一荷爾蒙)或者120小時(黃體激素受體劑)內食。如果有正確服用,而且食完短期內冇嘔吐或者嚴重腹瀉,避孕成功率係好高嘅。

但係喺香港,事後藥係處方藥物,即係要睇醫生,由醫生處方。而且由於事後藥含有高劑量荷爾蒙,並唔係每人嘅身體都適合食,醫生會檢查身體,詢問病史,認為情況適合先會處方。如果唔適合食事後藥可以性行為120小時內置入子宮環作為緊急避孕嘅方法。

如果係藥房買嘅事後藥,有機會係來源不明、成分不明,或者冇有效成份嘅假藥。 :confounded: 由於唔係食由醫生處方嘅時候藥,並唔能夠肯定係咪有避孕功效。 :x:

「流啡、乳房腫脹、頭暈同埋頭痛」全部都唔可以作為判斷係咪有懷孕嘅症狀,因為有好多其他因素,例如壓力大、荷爾蒙變化等都會導致呢啲現象出現。

由於而家已經過咗服用事後藥嘅時效,你哋可以考慮驗孕。驗孕係檢測身體有冇hCG呢種受精卵著床之後先會產生嘅荷爾蒙,而卵子受精著床需要大概6-9日時間。所以,性行為7日後(7月9號)驗孕會得到初步結果,而11日後(7月13號)驗孕就會得到相對比較準確嘅結果。 11號嘅初步結果顯示冇懷孕,如果你哋仲係擔心,可以考慮7月13號或之後再次驗孕,結果會比較可靠。

排除咗懷孕嘅可能,就可以放心等月經出現:blush:
月經係由身體幾個繁複嘅系統互相配合而形成,所以好容易受到其他因素影響,例如荷爾蒙水平、作息、飲食、壓力、藥物等等。每人每次月經週期嘅情況,包括月經週期長度、流血日數、流血量、經血顏色同質地、經痛程度、經期/經前不適情況等等,都可能會有唔同。

最後俾返啲關於正確使用安全套嘅資訊你哋,性行為全程正確使用安全套,咁就可以更加安心啦 :wink:
正確佩戴方法:Login • Instagram
安全套尺寸:Login • Instagram
導致安全套失效嘅原因:Login • Instagram

如果撤退性出血會唔會只係留兩日

多謝你解答:pray:t6:

Hello~ 撤退性出血多數係持續服用口服避孕藥嘅情況下出現,因為人造荷爾蒙取代自然週期,欺騙身體「已經排卵,已經令子宮內膜增厚」,所以喺停藥期間,荷爾蒙水平下跌,就會刺激子宮內膜出血。至於服用事後丸後,因為含有高劑量荷爾蒙,所以服用後有機會出現有點狀出血或者令下一次嘅月經出現變化,例如日子上提早或延遲,或者血量以及顏色上有改變,所以的確有機會出現月經量比過往少嘅情況。