女朋友20/6嚟咗一次M
而我哋嘅性行為分別係3/7同10/7
3/7嗰次只係插咗一分鐘多啲而且冇內射
10/7嗰次有使用殺精劑作為避孕方法
佢話呢個星期都有啲子宮痛、頭暈、冇乜胃口、腸胃不適同埋想嘔
不過我都諗緊會唔會係因為就快嚟M先至有呢啲朋友症狀
例如係子宮痛，佢話持續咗六、七日都有斷斷續續咁痛，所以應該未必係着床痛？
想問下通常妊娠反應係第幾週會出現架？
上網見話快極都一個月
計計下數其實都只係兩個禮拜嘅時間
心急人上
救解
Hello～多謝你嘅發問！
睇返上述你講嘅嘢， 當中兩次嘅性行為分別冇內射同有使用到殺精劑，但始終喺進行冇套性行為嘅時候，陰莖受到刺激嘅時候會分黏性透明嘅液體（尿道球腺液），有機會帶有殘留係陰莖嘅精子，所以有一定嘅嘅風險。而對於殺精劑嘅成功率，現時都仲未有統一嘅數據，而且唔係100%可以避孕。另外，無論喺月經週期嘅邊一日，只要喺冇使用安全措施嘅情況下，陰莖同陰道有接觸，都會有懷孕嘅風險。所以都建議以後發生性行為嘅時候都做足安全措施，例如：使用避孕套、事前避孕藥、避孕針、子宮環等。
文中你提到「子宮痛、頭暈、冇乜胃口、腸胃不適同埋想嘔」，呢啲有可能係因為就快嚟月經而出現嘅症狀，但亦有可能由其他原因導致，例如壓力大，中暑等。。現時並冇任何一種特別嘅症狀可以用嚟判斷女性有冇懷孕，有部份人喺懷孕嘅過程中，並唔會有特別嘅唔舒服或者反應；同時都有部份嘅人有機會係懷孕期間有不適。以下有少少關於懷孕症狀嘅資料，可以俾你參考吓：懷孕初期嘅症狀會喺懷孕後嘅六週之後，大約持續三個月，但並非每人都會出現。一般嚟講，卵子受精、受精卵著床需要6－9日時間，著床有機會伴隨着輕度腹痛同少量出血，腹痛持續時間會短，出血量亦會好少，係一塊護墊可以裝載嘅量。不過每人體質唔同，會唔會出現症狀同症狀嘅程度都會因人而異。
喺呢度都重申一次，並冇任何一種特徵可以用嚟斷定有冇懷孕
所以如果覺得擔心嘅話，可以嘗試用驗孕棒進行驗孕。驗孕棒係透過檢測尿液中嘅HCG(人絨毛膜促性腺激素)濃度，去判斷有冇懷孕。只要受精卵着床成功，女性嘅身體就會分泌HCG，正如上面提到着床嘅時間係6-9日左右，所以通常喺進行性行為嘅七日之後（7月17號）會有初步嘅結果。而11日後（7月21號），會有比較準確嘅結果。你提到距離你同伴侶上一次進行性行為嘅日子都已經係七日之前，所以都建議你哋用驗孕棒檢查一次，咁樣就唔使成日心掛掛啦！
見到你過往都有問過類似嘅問題，你都可以參考返我哋之前俾你嘅諮詢同建議，選用返適合你哋嘅安全措施
有其他問題歡迎再搵我哋。
（Intern同學 Nicole Lai）