人生第一次叫完雞,驚到訓唔著

個人好孤單,膽粗粗去叫左一次雞:disappointed:
所有野都黎得好快,上酒店之後沖涼開始
我冇帶套比佢用個身磨左幾次,
之後佢用口幫我,大約3、4秒我立即叫停左佢。之後我所有動作都有帶番套。
但就係一開始用個身磨同用酒店毛巾同個3、4秒我宜家驚到死左。我唔會再試咖啦。好驚

補充我有留意過對方應該冇傷口既

如果好擔心好擔心發生行為之後最快幾時去驗先有用,琴日發生我想今個星期去驗係咪會冇用

你好~

性病嘅主要傳播途徑係透過高風險體液(e.g. 精液、尿道球腺液、陰道分泌物、腸液、血液等)接觸到性器官或比較脆弱嘅黏膜組織(e.g.口腔、肛門、陰道、尿道口),尤其上面有開放性傷口(正在流血),先會有較高嘅機會造成性病傳染。如果嗰日冇套性行為只有口交嘅話,感染性病嘅風險都比較低。但同時都有啲性病係會經過口交傳播,e.g.梅毒、淋病、衣原體等。如果對方感染咗呢種病菌,而且有病徵,咁口交就會有一定嘅風險。而毛巾方面,如果冇共用毛巾嘅話,毛巾導致感染嘅風險係極低嘅。

明白到你都好擔心會感染到性病,所以想去做性病檢測檢驗下自己有冇被傳染。但係一般嚟講呢啲性病嘅檢測都建議喺進行性行為後嘅三個月後再去做,因為部份嘅性病都有空窗期,期間嘅抗體量可能不足以被醫學檢驗偵測到,令到檢測結果未必準確,所以要喺三個月後先會有準確啲嘅結果。不過而家有啲私家診所都會提供空窗期比較短嘅性病檢查,如果你比較急切嘅話可以去搵吓呢啲診所,問清楚需要等候嘅空窗期時間,同埋檢測所包含嘅內容。咁呢度都喺度同你解釋吓,正正係因為性病有空窗期同埋潛伏期,所以喺發生過唔安全性行為之後,都可以考慮去做一次全面嘅檢查,了解返自己嘅身體情況。即使檢測到有感染性病,都唔代表一定係同呢一次嘅性接觸相關。另外,現時大部份嘅性病都可以喺藥物嘅治療下痊愈。只有HIV病毒同部份HPV病毒暫時係無法根治,但可以靠食藥或者治療去控制病情,如果及早發現同埋有持續治療嘅話,對生活都唔會有太大影響。所以都唔使咁擔心住!

呢度有啲關於性病檢查嘅資料,有需要可以睇吓:

可以去衛生署社會衛生科診所進行檢查同治療,大約嘅流程有:用身份證登記、見醫生、抽血及性器官分泌物等。合資格人士成個過程係免費、保密並且無需預約。

有提供免費性病檢測嘅機構:「關懷愛滋」、「香港愛滋病基金會」、「香港善導會水銀星3號」等,詳細嘅資料可以喺網上預約或查詢。以上呢啲機構可能只有提供部份性病嘅快速測試(e.g.梅毒、HIV)。所以如果想做全面嘅測試,就要了解清楚嗰個機構有冇呢啲服務,或者考慮去私家診所/社會衛生科檢驗。

如果唔想露面嘅話,都可以選擇自我檢測。常見嘅牌子有:「staysafe安心驗」、「Doctoreyes」、「BioSure」,有部份都可以喺香港屈臣氏網站買到,用法都非常簡單。不過都係要睇清楚,呢啲快速測試可以檢測到邊啲感染情況(例如有啲只可以測試到HIV抗體,而有啲可以檢測埋梅毒等抗體),選擇適合你需要嘅產品。希望以上嘅資料可以幫到你!

都同你普及一下,你擔心接觸性工作者會感染性病,其實係受到現今社會對性工作者嘅歧視同污名化嘅影響,覺得佢哋「污糟」、「有性病」。其實有唔少性工作者為咗生計而接觸呢一份工作,而且佢哋會為咗自己嘅安全同埋健康去做定期檢查,亦都會使用安全套作為保障。另外,其實喺性行為嘅過程中,提出同商議用咩安全措施係自己嘅責任嚟,無論係進行口交/插入性行為,如果你想或者擔心風險嘅,你都需要主動並及時要求使用安全套,咁樣對雙方都有一份保障。

有其他問題歡迎再搵我哋。

(Intern同學 Nicole Lai)