自己平時一直都around 20-30 號黎m,上個月sex完食咗事後丸之後7/14有出血量都幾多,之後做過檢查醫生都話所有嘢正常,又驗左孕仲驗過4次都係negative但係自從上個月出血後到而家一直未黎m 好擔心到底係咩事,有冇人可以解答下
Hello~ 多謝你嘅發問！
睇翻你所講嘅問題，你係發生性行為之後有食事後丸，而事後丸嘅成效亦都高達97至99％，加上你都做過檢查同驗過4次孕，結果都係正常，所以就應該係無懷孕啦。
明白到你可能因為月經到宜家都未黎，所以擔心有咗，首先月經會受到好多唔同嘅因素影響，例如飲食，休息，壓力，生病，藥物或者荷爾蒙分泌，可能係因為你過份擔心自己懷孕而搞到自己壓力都多咗，都有機會會遲左少少黎，亦都有機會因為你呢個月嘅作息時間同飲食唔平衡，都可能會令到月經未黎，加上因為事後丸含有高劑量荷爾蒙，的確有機會令下次嘅月經提早/延遲。所以你上述講過係7月14號出血量都幾多應該就係月經，因為食左事後丸而令到月經提早到左，加上你做左檢查，醫生都話正常，所以唔洗擔心。
可能你擔心緊14號嗰次出血係「着床性出血」，亦即係坊間好多時所講嘅「假M」。著床出血係指當受精卵着床喺子宮壁嘅時候有機會造成嘅少量出血，通常只會有幾滴或者最多一塊護墊可以承載到嘅血量，而且係一次性，唔會持續地出血幾日，血嘅顏色亦會同月經嘅唔一樣。一般由受精到着床大概係性行為後6至9日就會發生。而着床性出血並唔係一個常見嘅現象，即使真係因為懷孕都係只有少部分女性會出現嘅情況。
（Intern同學 Tommy Ng）