講返少少background先～我平時嘅經期都係8-10日先叫完全乾淨冇血。今個月（7月）黎m第一日係7月14號，今日（21號）同男朋友都有發生過性行為，但係血量都得返好少，所以就發生左性行為。性行為期間，我哋都有做好避孕措施（使用安全套），女上男下嘅方式，但係因為係陰莖軟左嘅時候我先至起身，起身發現安全套完全離開左陰莖，但係安全套口係陰道外，並冇成個安全套係陰道內，咁當然男朋友都立刻取出。然後我就用紙巾抹左陰道外，我就拎咗黎聞，發現有精液嘅味，安全套內有少量精液，因為大部份精液都漏曬落床，但係事後都有檢查翻安全套嘅，安全套冇穿，外面亦冇沾上精液，但就係陰道外有少少，抹完一次之後都有再抹多幾次，之後幾次都並沒有精液味，然後都有盡快清潔陰道，請問如果係女上男下嘅方式漏出精液會唔會有機會懷孕？因為網上資料都話食事後丸有副作用，而我本身經痛問題都嚴重，所以都想避得就唔食
另外想問一下，如果係咁嘅情況下，係屬於安全期定危險期？懷孕機率又會唔會好大？
補充多少少，男朋友射精後我仲係上面un緊，但同時男朋友都feel到睾丸有熱嘅感覺（即feel到有精液向下流），到到佢軟曬我先起身，咁我想請問，會唔會只係因為精液已經流出後我繼續un所以先會有精液係陰道外？
Hello~ 照你所講嘅情況，都的確有懷孕嘅風險嘅
男性射精後，通常陰莖會逐漸變軟，所以如果無喺射精之後即時抽出陰莖嘅話，安全套就會因為陰莖變軟而鬆脫，令精液及尿道球腺液 (pre-cum) 外漏，增加懷孕嘅風險。
至於月經快要結束嘅時候係唔係安全期方面，想你知道安全期嘅日子其實係好難準確預測嘅
因爲經期受好多唔同嘅因素影響，例如生活習慣改變、心理壓力大、生病服食過藥物等等，而有時候即使無以上情況，經期都有機會比預期提早/延遲，所以往往要到來經嘅日子先可以推算返幾時係安全期
亦都係因為咁，安全期並唔係可靠嘅避孕方法，建議每次性行為都使用返安全套或其他有效嘅避孕措施，例如避孕藥、避孕針、子宮環等等。
而就你現時嘅情況，你有兩個選擇，第一係盡快去睇醫生拎取事後丸🧑🏻⚕
事後丸分為性行為後72小時內及120小時內服用兩種，兩者各有好處，而常見嘅副作用有頭痛、噁心、頭暈、疲倦、經痛、腹痛、背痛、乳房脹痛等等，不過依啲副作用一般唔會持續超過24小時。因為事後丸喺香港係法例規定必須經醫生處方嘅藥物，所以如果決定服用嘅話，建議到家計會 / 私家診所向醫生拎取，有關事後丸嘅原理、服食方法等詳細資訊，可以參閱以下網站: 緊急避孕 - 香港家庭計劃指導會
而如果唔想服食事後丸嘅話，就可以喺性行為嘅7日或者11日後驗孕，驗孕棒最早可以喺性行為嘅7日後驗出初步結果，而喺性行為嘅11日或以後驗出嘅結果就更準確，如果係陰性就應該係無懷孕架啦
好 唔該晒你，我會去拎藥食
唔好意思想問下，我7月22號就去左家計會拎事後丸食，7月26號晚發現護塾上有咖啡色血。7月27號早上小便時有鮮紅色血，只係抹陰道嘅時候先有，請問咁嘅情況係正常定已經懷孕
照你所講嘅情況，比較大機會係服食事後丸嘅副作用，因為事後丸含有高劑量荷爾蒙，所以服食後有機會出現陰道不規則出血嘅情況，亦都有機會令下次月經比預期提早/延遲。
事後丸嘅避孕功效係好高嘅，所以唔洗太擔心懷孕 如果想確認無懷孕嘅話，可以進行驗孕，驗孕棒最早可以喺性行為嘅7日後驗出初步結果，而喺性行為嘅11日後驗孕嘅結果就更準確，如果結果係陰性就應該係無懷孕啦
1個讚