關於yaz 事前避孕藥一問

SEX:: 有關性的
1

我係第一次食yaz 避孕藥
都食左22 日（今日會食埋23 日，食到第四行第二粒）
每次食都好凖時
我規定自己15:00 食
有時就14:59，15:01，15:09 食
只係試過有一次遲咗40 分鐘
一醒起即刻食返
第二日都係規定時間食返
平時同另一半做愛佢亦全程有戴套
大家實行雙重保護避孕

但自己都有關於避孕藥既問題想問下:

  1. 前兩個月我都係月尾29、30 黎m, 最近月經週期大概32-35 日，我見食埋明天第24 日粒紅色藥丸，之後果4 日就係白色藥丸，我之前爬文見寫食果4 日白色藥丸是但一日就會黎m，想問第一次食既話係唔係會將我月經提早到？

  2. 以往我黎m 前，果2 星期或一星期前都會覺得胸漲痛、便秘、腰有少少痛，但我見就快食到白色藥丸，suppose 都就快黎m, 好似個胸都完全唔痛咁，但都仲有便秘同腰痛，想問下食左避孕藥係唔係會令到m 前既身體不適度減低？

  3. 我睇返幫我記錄m 期個app, 指今個月16 號係預測排卵日，係16 號當日或前後幾日，都見到多左透明嘅分泌物，我13 號同16 號都有同另一半做愛，佢係全程有戴套，我唔肯定個套有冇穿，13 號果日佢冇射係個套入面，係下面蚊出黎除左再射係我個下腹位，想知假如個套穿左，又唔知會唔會我果幾日排卵，我地做愛前，我唔小心飲左一啖有葡萄柚成份既果茶，但我平時有凖時食藥，想問下懷孕機率會唔會好高？
    而16 號佢就隔住個套射咗係入面，個懷孕機率都高嗎？我有少少擔心，19、20 號時覺得個肚扯住扯住痛，20 號晚時去廁所抹到有少少血色，偏啡偏粉咁，21號同今日已經再見唔到，同埋今日個肚已經冇早2 日扯住痛咁，唔知會唔會係著床出血或有懷孕先兆？:cold_face:

  4. 我平時有飲開豆漿，會唔會同yaz 相沖？我試過食完藥之後，可能隔5-10 分鐘就飲奶茶/豆漿，會唔會影響個避孕效果？

希望有人解答到我，謝謝

2

Hello～多謝你嘅發問！

睇翻你上述所講嘅問題,首先回應第一個問題,食避孕藥嘅白色藥丸會唔會提前月經到,因為避孕藥嘅人造荷爾蒙,係會取代咗你本身嘅月經周期,所以月經通常會係食白色冇藥性嘅藥丸嘅時候出現,由於你係啱啱開始食事前避孕藥,所以有機會喺白色藥丸期間嚟,又或者係開下一盒新嘅藥嘅時候先會嚟,你每日定時食返藥就冇問題,懷孕嘅風險都會大大降低。因為一般啱啱開始食用嘅時候,身體係需要適應藥物裏面嘅荷爾蒙,所以頭幾個月嘅月經時間未必會好穩定,等身體適應咗藥物嘅荷爾蒙嘅時候,來經嘅日子就會變得規律。

第二個問題,關於食避孕藥係咪可以緩和嚟M前身體不適嘅程度,係有機會可以緩和到既。因為本身避孕藥係一個人造嘅荷爾蒙,取代咗我哋本身嘅月經周期,相對地,都可以緩和到月經前嘅不適,不過呢樣嘢就因人而異,因為每個人體質都唔同,所以未必個個人都適用。

第三個問題，你同男朋友喺預知排卵期嘅日子,但係食咗避孕藥之後,其實已經會抑制排卵，同取代咗我哋原本嘅月經周期啦,就唔會再有所謂嘅排卵期。有使用安全套,但係唔清楚有無破裂,驚會有左,喺呢度我有少少建議,如果下次你完成性行為之後,怕安全套有破損,你可以嘗試加啲水落去睇吓會唔會流出黎,如果冇嘅話安全套係冇破損嘅,可以減低你驚懷孕嘅風險。但如果係排卵期期間,安全套有破裂,即使你男朋友冇內射喺子宮裏面,都係有懷孕嘅風險,你都有提及到有飲咗葡萄柚成份嘅果茶,由於避孕藥公司嘅一啲影響藥效嘅情況，都提及葡萄柚汁都係會對藥效有影響嘅，而另外葡萄柚同避孕藥係會產生交互作用,容易引起血栓,由於你今次淨係飲咗一啖葡萄油汁嘅含量都唔高,所以應該對藥效嘅影響都唔大,你都唔需要太擔心,不過亦都唔建議服用避孕藥嘅時候,食或者飲同葡萄柚相關嘅食物,你亦都可以參考吓以下嘅網址:Grapefruit and Birth Control: Understanding the Link?

另外你話19、 20號個肚扯住扯住痛,去廁所嘅時候有啲血色,偏啡色同偏粉色,但係21號已經冇呢個現象,有機會準備嚟M之前嘅徵兆，亦都有機會係啱啱開始食避孕藥,仲未習慣同埋未適應,而另一個因素可能係黃體囊腫破裂,而出現呢個現象嘅原因好大機會係因為性行為時撞擊所引起,如果輕微出血,下腹部有少少悶痛,但冇其他唔舒服嘅話,過一段時間,啲出血俾人體吸收左之後,悶痛嘅感覺就會逐漸消失。所以你依個情況唔一定係同懷孕有關係嘅,可以先觀察多一段時間,如果好擔心建議去睇醫生了解返身體狀況。

第四個問題, 飲豆漿會唔會同事前避孕藥相沖,咁豆漿對某啲藥物係有影響,但係呢喺官方網址度呢就冇話過豆漿同避孕藥會相沖,所以暫時未有認證避孕藥同豆漿之間會唔會影響到佢嘅藥效,不過有某啲食物或者某啲情況底下係會影響到藥效,你可以參考返以下呢個網址(係呢一個避孕藥公司嘅網址):YAZ®優悅 - 避孕藥常見問題, 你可以禁入去了解清楚有咩情況有機會會影響到藥效。不過如果你真係好擔心會影響藥效嘅話，建議你食任何藥之前唔好飲豆漿,又或者飲完豆漿隔咗一段時間先服用任何藥物。

希望以上既內容可以解答到你既問題
如果有其他問題 歡迎提問

（Intern同學 Yee）

1個讚
3

好多謝你咁用心答我！
解釋得好詳細！:blush:
令到我對於避孕藥同性有更多認識