本人對呢安全性行為同性病問題認知唔多 想了解清楚 Sorry如果問題係低能
1.性病係會傳播但其實性病既病毒本身係點樣形成？關性器官既分泌物？
如果關分泌物事咁會唔會發生係冇感染過性病但進行性行為冇戴套既伴侶？
性病（eg AIDS etc）係由性交同埋血液之類既途徑而傳播
2. 想問一問唔同性病係唔係有唔同途徑傳播？
冇進行安全既性行為就會感染性病（冇安全套etc）
3. 如果雙方伴侶都冇感染過性病但進行性行為冇戴套會唔會感染性病 （同第一條問題好似有關？？）
本人14歲有大量唔理解sorry
Hello
多謝你嘅提問
1.首先性病係屬於傳染病，不分年齡、性別、種族，一般透過性接觸，不論係性交、肛交、口交或生殖器之間皮膚接觸，就有機會經由血液、精液或其他體液感染性病。而性病一般可以分為細菌型性病，或者係病毒型性病。前者大多數都可以完全根治，而後者大多數未有藥物可以完全根治，但可以控制病情，例如愛滋病，性病疣（椰菜花）。所以你提及到嘅情況：情侶喺發生性行為嘅時候冇帶安全套，的確係會增加感染性病嘅風險。
2.至於傳播途徑，除咗上述提及到嘅，性病主要以血液、精液、陰道分泌或其他體液作傳播媒介。性病一般經性接觸 (包括口交、肛交、陰道性交) 傳染，有時亦可經性接觸以外嘅途徑傳播，包括：母嬰感染、輸血過程或共用針筒等。而且溫暖潮濕嘅環境適合大部份性病病原體存活，所以性病較常感染口腔、直腸及性器官 (陰道、外陰、陰莖、睪丸)。例如由細菌引致嘅性病：衣原體、淋病及梅毒；同埋由寄生蟲引起嘅性病 ：滴蟲，都會通過口腔或者性交傳染。
3.有關呢個問題，就好似上述講到，即使冇同任何人發生過性關係，但有機會以前通過母嬰感染、輸血過程或共用針筒而患上性病。咁可能你會諗如果被人傳染咗病毒，點解會冇病徵？係因為唔同嘅性病都有唔同嘅空窗期同埋潛伏期。空窗期係指，當你感染咗性病 ，就算立即進行性病檢測，都唔會得到陽性嘅結果。係因為當病毒或細菌等進入身體後，需要一段時間先可以達至可檢測嘅水平，而喺身體感染咗病毒但未能夠測試到陽性結果嘅嗰一段時間，就稱為空窗期。而潛伏期係指，感染性病到發病中間個段時間，因為感染性病後，並唔會立即出現病徵，當潛伏期過後身體就會出現相關病徵。有啲性病嘅潛伏期可能只係幾日，但有啲可能係10幾年，所以我哋都建議無論有冇發生過性行為，都應該恆常做性病檢測。
希望解答到你嘅問題
即係終結而言
戴安全套進行性行為係就安全啦
除咗完全唔發生性接觸之外，暫時並冇一種安全措施可以做到100%安全。
不過如果性接觸全程都正確使用安全套，同埋即使唔係發生插入式性行為都使用安全套嘅話，係可以有效減低性病傳播或者其他感染（例如念珠菌感染、尿道炎等）風險嘅。 
關於安全套嘅正確使用方法可以參考：Login • Instagram
如果擔心嘅，都建議如果有發生性行為可以恆常進行測試，了解自己嘅身體情況，咁就更加安心啦！ 