食完抗生素都係好痕

早前睇完醫生驗完,中左加德納菌,食左兩個星期抗生素,但都仲係覺得痕,請問仲會有咩其他性病嘅可能性呢?thx!

Hello~多謝你嘅發問!睇翻你上述所講嘅問題,首先回應第一個問題,之前睇醫生驗過中咗加德納菌,食咗兩個禮拜嘅抗生素,依然覺得痕癢,有機會係加德納菌仲未完全消除,而且食抗生素嘅時候,由於大量服用抗生素,抗生素會改變左陰莖附近既微環境,令其他細菌或者病原體大量繁殖,例如念珠菌。本身我哋嘅身體有少量嘅念珠菌而並唔會對身體有咩特別影響,但係當身體情況出現轉變(例如壓力大、抵抗力差、或者食緊其他藥物),念珠菌就會大量繁殖造成感染甚至唔舒服。雖然陰道念珠菌感染出現明顯症狀嘅機會相對比較多,但係念珠菌都有機會會導致陰莖出現局部既痕癢,所以如果你係食晒所有醫生比嘅抗生素之後,仍然都係覺得好痕癢嘅話,建議你可以再去睇多次醫生,同埋記得要同醫生講,你之前食咗兩個禮拜邊一種嘅抗生素,可以比醫生更加清楚去對症下藥,睇吓會唔會係嗰隻抗生素或者嗰個方法唔適合你,但係就唔好自己亂咁去食其他藥或者搽其他藥膏,因為喺未清楚情況之前亂咁用藥嘅話,有機會令到情況更加嚴重。有陣時私密部份痕癢唔一定係因為你唔乾淨,相反有陣時過度清潔都會令到私密部位痕癢,過度清洗例如過於頻繁地用水沖洗,又或者市面可以買到嘅清洗液,都有機會會破壞到陰部裏面嘅微生物生態平衡,反而會得不償失。建議每日用溫水溫柔地清潔,記得要反包皮清潔同埋唔好忽略陰囊底部,以免污垢、油脂等堆積引起發炎;如果要使用清潔產品,要小心有冇致敏成分,因為陰部皮膚相對幼嫩,其他身體部位冇乜反應嘅沐浴露可能陰部會敏感,同埋記得唔好使用過量清潔產品、記得要用清水沖乾淨。而且建議著透氣棉質嘅底褲、唔好過緊,下身衣物都建議著鬆身嘅。呢排天氣熱同埋焗,陰部係潮濕悶熱嘅環境都可能會出現痕癢不適嘅情況。
第二個問題,仲會唔會有其他嘅性病可能性,其實都要睇返你有冇進行過高風險嘅性接觸。性病嘅主要傳播途徑係透過高風險體液(e.g. 精液、尿道球腺液、陰道分泌物、腸液、血液等)接觸到性器官或比較脆弱嘅黏膜組織(e.g.口腔、肛門、陰道、尿道口),尤其上面有開放性傷口(正在流血),先會有較高嘅機會造成性病傳染。男性常見性病有:梅毒、淋病(流白蜀)、非淋病性尿道炎、衣原體 、性器疣、陰部疱疹同埋愛滋病。呢啲感染都可能造成不適,你可以回想下自己過去有冇發生過高風險嘅性接觸,例如無套陰道交/肛交,如果有嘅話,都不妨進行一次性病測試,了解自己嘅身體情況。性病都會有性病既潛服期,係呢段時間,有機會已感染左病毒,但就冇病徵,很可能會因為延遲治療而導致反覆傳染,所以需要及早做一啲性病檢測。同時,性病測試需要等夠「空窗期」,避免體內病毒量唔夠導致結果唔準確,唔同醫療機構要求嘅空窗期時間可能唔同(社會衛生科同一啲提供快速測試服務嘅機構,例如關懷愛滋、愛滋基金會等,會要求3個月空窗期;而某啲私家診所會提供所需空窗期較短嘅測試),你可以根據需要選擇。驗性病一般可以透過簡單化驗分泌物、驗血,或細胞樣本嚟檢測。如果懷疑自己受感染,無論有冇出現徵狀,都應及早搵醫生幫手診斷。一般既性病測試,都會包括一啲常見既性病,例如驗梅毒、驗愛滋等,不過如果你係有疑問,自己有其他嘅性病嘅可能性,都比較建議你可以去做一個全面測試,檢查一下自己有冇可能有呢啲問題,因為我哋都唔係特別清楚你而家目前嘅情況,同埋我哋都唔係醫生所以唔可以根據你嘅病徵,就判斷你係邊一種感染:see_no_evil:如果你之後再有不適,建議你去再睇多次醫生:see_no_evil:希望我嘅解答可以幫助到你。

如果有其他問題 歡迎提問

(Intern同學 Yee)