女朋友未黎M 會唔會係事後丸影響?

上個月同女朋友性交過程帶反咗安全套,然後怕有事去咗睇醫生,食咗事後丸,之後係14/6黎咗一次M。
本身女朋友週期都比較亂,成日會遲黎M,本身預計19/7會黎M,但係到而家都仲未黎M,想問下會唔會係事後丸影響?
呢一個月都有性交,每一次都有帶套,事後都有檢查清楚安全套有無穿:pray:t2:

Hello
事後藥係用高劑量嘅人造荷爾蒙去達致緊急避孕嘅功效,所以有機會影響1-2次月經週期嘅情況。 :confounded:

如果上次月經之後每次發生性行為你哋都有全程正確使用安全套,過程中安全套冇穿冇漏,咁懷孕風險係好低嘅。 :blush:

而都想你明白,月經係由幾個繁複嘅身體系統互相配合形成,所以好容易受到唔同因素影響,例如荷爾蒙水平、壓力、作息、飲食、藥物同生病等等。每人每次月經週期嘅情況,包括月經週期長度、流血日數、流血量、經血顏色質地、經痛程度、經前不適情況,都可能會唔同。你自己都有話女朋友本身月經週期比較唔穩定。佢呢排會唔會壓力比較大或者休息得唔好?除咗事後藥影響之外,呢啲因素可能都會令到佢嘅月經有變化。所以,一啲app嘅預測或者日曆計算未必準確,因為佢哋唔會知道同埋考慮到女朋友嘅其他身體情況。至於佢「成日會遲黎M」,可能代表佢本身月經週期相對比較長。

不過如果女朋友連續幾個月經週期嘅情況都好大變動,如果擔心嘅,都可以睇下醫生,檢查下有冇一啲病理性嘅原因導致,例如荷爾蒙分泌問題、子宮/卵巢問題等。有需要可以去家計會診所/母嬰健康院/部分私家診所預約。 :woman_health_worker:t2: :man_health_worker:t2:

如果你哋真係好擔心嘅,與其擔憂,不如驗孕去了解下身體情況。驗孕係檢測身體有冇hCG呢種受精卵著床之後身體先會產生嘅荷爾蒙,卵子受精、著床需要大概6-9日時間。所以,性行為7日後驗孕會有初步結果,而11日後驗孕就會有相對準確嘅結果。你哋可以睇返幾時最後一次發生性行為,計算返日子進行驗孕。 :relaxed:

建議你哋耐心等待下,月經會出現嘅。
有問題歡迎隨時搵我地。 :smiling_face_with_three_hearts:

Hello今日同女朋友買咗支clearblue驗孕棒黎驗,結果係陰性嘅。
但係我地係2:00左右驗,我見到網上D人話最好係朝早驗,想問下會唔會影響個結果?

另外仲想問下,如果過兩日女朋友都仲未黎M應該去睇西醫嗎?醫生會唔會有藥可以比到女朋友食去催M?:pray:t2:因為女朋友已經過咗好耐都未黎M,有啲擔心健康問題:pray:t2:

如果你今日驗孕距離對上一次性行為已經過咗11日,而且你哋有正確使用驗孕棒,咁個結果係準確可靠嘅。
現時市面上嘅驗孕棒通常都有好高嘅靈敏度同特異性,喺正確使用嘅情況下,檢測有冇hCG嘅準確性都係好過嘅。用晨尿驗孕可能相對容易啲睇到結果,不過除非嗰隻驗孕棒指明要用晨尿,否則無論係唔係朝早驗,都唔會影響到個結果。 :blush:

如果你哋依然擔心嘅,可以考慮使用電子驗孕棒驗孕多次,相對更加容易用同埋準確。 :relaxed:

如果女朋友一直經期唔穩定,覺得擔心嘅,都不妨搵醫生檢查下。醫生會根據佢嘅身體情況判斷需唔需要俾催經嘅藥物佢,或者需唔需要其他嘅療程。 :woman_health_worker:t2: :man_health_worker:t2: