你好，同女友都係第一次，半年前同女友開始嘗試破處，搞左好耐都叫做插入左陰道，不過感覺只有滑滑的，完全唔覺得舒服，所以好快軟左，壓力越黎越大，搞到硬都硬唔到，之後睇醫生話我一切正常係心理問題，開左低份量嘅藥我。食左幾日，硬就不成問題，但都係一插入陰道就係仍然唔覺得舒服，跟住就好快軟，射都射唔到，非常沮喪，經常聽到人話陰道好舒服，好似得我有呢個問題咁
請問咁樣係咪唔正常，有冇方法可以解決？謝謝。
補多少少資料，我已經無用condom(因為就結婚，女朋友話唔介意都想試)，但每次都冇舒服感覺，好灰唔明點解我會冇舒服嘅感覺，定真係只係唔習慣
Hello 多謝你信任我哋同我哋講你嘅經歷 
的確有時一啲媒體／網上資訊／色情影片都會講陰道陰莖性行為係好舒服咁。但係其實感覺呢啲嘢係好個人嘅，每人喺性呢一方面嘅喜好同埋感覺都可能會好唔同，而且可能隨著時間，又會發生好多變化。正如食嘢咁，人哋話好食嘅嘢你未必會好鍾意食，甚至你係唔食嘅；而可能有啲嘢，你本身未必可鍾意食，但係經過唔同嘗試你又會有興趣、會鍾意食。 
性其實係個慢慢探索嘅過程，喺呢個過程中你會了解多咗自己同埋伴侶，同時亦需要好多嘅溝通、共識同埋嘗試。 
勃起同射精係神經系統同血液循環系統互相配合嘅結果，當陰莖受到刺激會充血變硬勃起，受到一定程度嘅刺激之後會射精，當神經反應消退，陰莖就會疲軟，而短期內亦唔會再對刺激產生好大嘅反應。
如果你之前冇乜試過陰道插入式嘅性行為嘅話，初初嘗試嘅時候唔適應，甚至覺得唔舒服都係正常嘅，而呢個都唔係少見嘅情況嚟嘅。因為陰道帶嚟嘅刺激可能同自慰或者其他刺激好唔同，身體嘅接受程度同埋反應可能都會唔同。再加上你有講話壓力好大，其實壓力都會影響到勃起嘅狀態嘅。除咗壓力之外，當日疲倦嘅程度、環境氣氛等等因素都可能有影響。 
你可以嘗試同女朋友商量，搵一個大家都覺得ok嘅時間，去個安全、舒服、令到你哋放鬆嘅地方，然後慢慢嘗試。一開始唔需要急住插入嘅，可以多啲前戲，例如親吻、愛撫等等。當大家都放鬆嘅情況下，嘗試插入；試下唔同嘅姿勢、唔同嘅郁動頻率同幅度、唔同嘅力度，睇下有冇邊個係令到你哋覺得舒服同埋刺激嘅。就算冇都唔緊要，呢個係一個探索嘅時間，可能一次未必搵到，需要多幾次，最緊要係放鬆地去享受個過程。 
你哋都可以嘗試吓使用唔同嘅安全套，有時有安全套隔著，性行為嘅感覺可能都會好唔同（有啲人一直都有使用安全套進行插入式性行為，第一次嘗試冇套插入嘅時候，都會好唔慣、出現疲軟或者好快射嘅狀況），你可以試下如果有安全套嘅話，你習唔習慣到嗰種刺激。而唔同嘅安全套都可能帶嚟唔同嘅刺激感覺，例如凸點、波紋、冰感、熱感等等。
現時亦都有一啲增加持久度嘅產品嘅，例如有加入可以降低陰莖敏感度嘅成份嘅潤滑劑。如果有需要，都可以去一啲性用品商店選購下。呢啲產品嘅原理都係用一啲可以降低陰莖敏感度嘅物質（類似麻醉功效），去減少陰莖感覺到嘅刺激，從而延長勃起時間同射精所需嘅時間。而如果係物理原理嘅，都有陰莖環呢一種產品，不過一定要按照包裝指示嘅時間去使用，以免箍住陰莖嘅時間過長，對身體造成影響。
另外，都有啲練習可以嘗試下，循序漸進咁堅持慢慢做，都可能會提升到持久度、令到陰莖勃起時間耐啲、對刺激嘅接受程度多咗嘅。
-
第一種係「斷續刺激」，可以喺自慰嘅時候試下練習，當想射精嘅時候就暫停刺激，俾啲時間自己冷靜，當想射精嘅感覺消退／減弱嘅時候，再繼續刺激。如此類推重複幾次，然後先射精。但記得唔好強迫自己長期完全唔射精。
-
第二種係「凱格爾運動」，呢個係一種鍛煉骨盤底肌嘅運動嚟嘅，因為骨盤底肌同陰莖其他嘅器官都有關聯，當你訓練咗骨盤底肌就會可以較為容易啲控制自己肌肉。現時網上都有唔少鍛煉呢組肌肉嘅訓練方法，有啲可能係瑜伽動作，有啲會係健身work-out嘅做法，你可以嘗試下，睇下邊一種運動鍛煉嘅方式最適合。不過都有啲更加簡單、隨時隨地都可以做到嘅鍛練方法。首先要識得搵到呢一組肌肉，其實收縮呢組肌肉嘅感覺係類似忍尿嘅感覺，甚至你可以去小便嘅時候真係試下中途忍住，感受下嗰種感覺。然後就可以隨時隨地去做，做嘅pattern可以因應身體情況去制定。例如一開始可以嘗試收縮嗰組肌肉5秒，然後放鬆5秒，咁樣為之一組，重複呢組動作10次。然後當身體適應咗，可以再加長加多鍛煉嘅時間同次數。
不過要記得嘅係，呢兩種方法同其他鍛煉身體嘅練習一樣，都係要循序漸進唔可以太強求自己嘅身體第一日就做得好好，同埋都需要持之以恆堅持練習呀。當身體覺得唔舒服就要作出相應嘅調整，減少訓練嘅強度／暫停練習，以免傷害到身體呀！ 
都想你自己諗下、同伴侶傾下，插入式嘅性行為係咪一定要係射精先叫做完？對於你哋嚟講陰道插入式性行為係咪好重要？如果你經過好多嘗試都係唔鍾意插入式性行為嘅感覺係冇問題嘅，不過女朋友需要知道你嘅感覺同喜好。咁你哋有冇其他享受歡愉嘅方法？可能你哋傾完之後，都會令你覺得放鬆咗。 
最後，如果你哋覺得呢件事對你哋有困擾，或者依然好擔心，如果去搵醫生／性治療師諮詢下會令你哋更加安心啲，你哋都可以考慮咁做嘅～ 
謝謝。聽人講用軟身嘅飛機杯係咪好過用手，可以習慣陰道，冇咁快軟？
使用飛機杯自慰可以提升持久度係因為一般飛機杯嘅刺激度較用手自慰高，所以當陰莖習慣咗高強度嘅刺激嘅時候，敏感度相對降低，所以到性行為嘅時候就會需要較長時間嘅刺激先達至高潮
市面上嘅飛機杯有好多唔同質感同結構，可以按個人喜好選擇，而使用時記住配合潤滑劑，以免過度磨擦而造成疼痛或者損傷
大部份嘅飛機杯都係矽膠質料，而矽膠質料係唔可以同矽性潤滑劑一齊用嘅，因為矽性潤滑劑會破壞矽膠，令飛機杯容易積藏細菌，所以建議使用水性潤滑劑
情況已經改善左好多，謝謝你們的意見。