月經日驗印孕

原本話23號會黎m,但無黎到,然後喺25號夜晚7點同26號朝早11:00驗孕,結果係陰性。

個結果可靠嗎?

#用咗clearblue 同萬秀雷敦驗孕棒

Sorry 打錯標題

係月經日驗孕

Hello~多謝你嘅問題!

喺呢度先同你講一講驗孕棒運作嘅原理先,係透過檢驗尿液中嘅人絨毛膜促性腺激素(hCG)水平,去判斷係咪有懷孕。當卵子受精着床之後,身體會產生hCG。而卵子受精着床需要大概6-9日。所以都建議你可以喺最後一次進行性行為嘅七日後進行驗孕,就會得到初步嘅結果,而11日之後就會得到一個相對準確嘅結果。

現時市面上嘅驗孕棒都有好高嘅靈敏度同特異性,如果驗孕嘅時候有根據包裝或者說明書上嘅指示,正確咁使用同埋喺限時內睇結果,咁個結果都係可信嘅。

我見你都用咗兩種唔同嘅驗孕棒驗咗兩次,而且個結果都係陰性,咁都係相對可靠嘅。但呢度都要提一提你,正如上面提及咁,最早嘅驗孕時間係喺最後一次進行性行為嘅七日後,咁樣先會有一個初步嘅結果,如果擔心結果唔準確可以喺第11日之後再進行驗孕。如果你係正確地使用驗孕棒,並且距離最後一次發生性行為有11日,咁個結果都係相對可靠嘅,可以唔使咁擔心!

另外,都想問吓你進行性行為嘅時候有冇採取安全措施,如果有,其實懷孕嘅風險都好低。如果冇嘅話,其實都建議你可以選用適合自己嘅安全措施,例如:安全套、服用避孕藥、接種避孕針等。

其實月經嘅出現會受唔同因素影響,例如荷爾蒙分泌水平、飲食、壓力、藥物等等。最近有冇食過藥、有冇均衡嘅飲食、情緒有冇好大起伏、壓力過大等都會導致出現月經延遲嘅情況。其實每人每次月經週期嘅情況都可能會唔同,一啲app嘅預計或者日曆計算並唔能夠準確咁預測幾時月經會出現,因為佢哋唔會考慮你其他身體情況。希望咁樣講你會清晰啲。

如果有其他問題 歡迎提問

(Intern同學 Nicole)

你好。
都有做足安全措施,但驚有漏掉之魚。

然後係2/7發生過性行為

Hello~ 如果喺整個性行為嘅過程中都有使用安全套嘅話,懷孕嘅風險係好低嘅,唔洗太擔心:relaxed: 加上你驗孕嘅日子距離性行為嗰日已經超過11日,驗孕嘅結果係好準確嘅,所以結果係陰性就代表無懷孕架啦:relaxed:

1個讚

謝謝回覆啊。

總係唔放心,過往個個月都會黎m,好少唔到。雖然例牌遲幾日,但唔記得會遲幾多日,
而加都月尾,所以都好忐忑。

會唔會懷孕但驗唔岀?

Hello~喺性行為之後14日,或者月經遲嚟7日之後驗孕,個結果就最準確,唔存在驗唔出嘅問題。至於月經延遲嘅原因有好多,體重過輕,壓力大,生活唔規律…都會導致月經遲嚟。除非月經比起平時遲咗三個星期以上都未嚟,先至需要睇醫生,等醫生考慮會唔會處方荷爾蒙藥物畀你去催經。現階段可以再等下先:smiling_face_with_three_hearts:

1個讚