想請教一下…是懷孕出血、著床出血還是月經？
在7月11日和7月13日有性行為，（全程有用避孕套加體外射精），避孕套沒有穿漏的。
問題1）是月經還是早期懷孕出血？
上個月的月經是6月21日，月經通常是四至五天，週期大約是30至33日，但是今次來月經第一天是7月26日，但是只來了二天，第一天月經，整天月經佔用了兩塊夜用M巾內褲，第二天月經，整天血量只佔用了一塊夜用M巾內褲，在第三天少得幾乎沒有。
問題2）驗尿不是用晨尿，會影響準確性嗎？
在7月27日（最後一次性行為之後第14天，亦是月經後第六天）驗尿驗孕，結果是陰性。可是，驗尿的時間雖然不是晨尿，但是驗孕之前，忍尿不飲水大約7個小時，結果準確嗎？
問題3）我還需要擔心自己懷孕嗎？還是要再等到最後一次性行為後的十八天、二十一天要再驗孕或者要抽血驗孕才可以放心呢？
想補充：兩天天數月經的顏色是鮮紅色
Hello～多謝你嘅發問！
首先睇翻你第一條問題先，早期懷孕出血即係著床性出血，著床性出血其實係受精卵著床係子宮壁嘅時候有機會出現嘅出血情況，但唔一定每個人懷孕都會出現呢個情況，受精卵著床大概係性行為之後嘅6至9日嘅時間，睇翻你出血嘅日子已經超過左6至9日，而且著床性出血嘅血量比月經少好多，通常係一塊護墊承載到嘅量同埋一日就會流完，你流血流左2日，加上著床性出血通常係偏啡色多，而你兩日月經嘅顏色係鮮紅色，所以唔會係著床性出血。而你嘅經血少左有好多因素影響，例如你嘅生活習慣，飲食習慣等都會影響你嘅經血量。
睇翻你第二條問題，首先驗孕棒係透過驗HCG指數，而HCG係人絨毛膜促性腺激素，呢個激素會係懷孕之後會開始上升，點解要用晨尿去驗呢，因為隔左一晚，尿液都會濃縮啲，相對黎講尿液入面嘅HCG水平都會高啲，所以如果有左，用晨尿驗孕會更加容易驗到。但因為每種驗孕棒驗孕嘅指示都唔同，有啲驗孕棒可能會要用晨尿去驗孕，但有啲可能過左某個日子就可以喺一日嘅仼何時間驗，所以建議翻你睇驗孕棒嘅說明書去驗孕。
都睇得出你擔心懷孕嘅風險，見你係性行為嘅過程入面全程都有用避孕套，而且檢查過係冇穿漏，所以懷孕嘅風險都相對比較低，所以你唔洗太擔心會懷孕。
如果有其他問題 歡迎提問
（Intern同學 Tommy）
想請教多一句…
原來到最後，血來了四天，不是兩天，
第一天佔用兩塊夜用M巾衛生褲，第二天佔用一塊夜用M巾衛生褲，在第三天還有血塊，佔用一塊夜用M巾衛生褲，第四天血量開始少，全部顏色都是鮮紅色。這已經可以排除不是早期懷孕出血嗎？
在最後一次行房的第19天已經抽血驗孕，（即是8月1日）結果是陰性的。是否可以完全排除因為7月11日和7月13日行房而懷孕的可能呢？
之後不用再驗尿驗孕和抽血驗孕去排除因為這兩次行房而懷孕的可能嗎？
Hello~再次多謝你嘅發問！
首先，根據你提供嘅資料，其實可以排除係懷孕出血。你可以睇返上邊嘅回覆提到「着床性出血嘅血量會比月經少好多，通常係一塊護墊承載到嘅量同埋一日就會流完」、「著床性出血通常係偏啡色多」，你嘅情況係持續左四日，並且全部都係鮮紅色，其實都可以判斷到呢個係月經，而並非早期懷孕出血。
另外，你喺最後一次進行性行為嘅第19日進行抽血驗孕，經過血液化驗而結果顯示係陰性，你可以嘗試相信個結果，排除因為7月11號同13號發生性行為而懷孕嘅風險！至於驗孕棒方面，你有講到「在7月27日（最後一次性行為之後第14天，亦是月經後第六天）驗尿驗孕，結果是陰性。」因為驗孕棒係透過檢測尿液中嘅人絨毛膜促性線激素（hCG）濃度去判斷有冇懷孕，而只有受精卵着床成功嘅女性身體先會分泌hCG，所以通常七日後會有個初步嘅結果，而11日後就會有一個準確啲嘅結果。只要你係發生性行為嘅11日後，根據說明書嘅程序去進行驗孕，而得出嘅結果係陰性嘅話，你係可以排除因為呢兩次性行為而懷孕嘅可能。如果你都係好擔心自己懷孕嘅話，可以搵醫生進行詳細嘅檢查，了解自己嘅身體狀況。同埋如果你留意到最近幾次經期嘅情況，例如週期長度、經血量、經血質地等都有比較大嘅浮動，你擔心嘅都可以睇下醫生，檢查下有冇咩身體狀況導致呢啲變化嘅出現。
見到你幾時之前都有好擔心懷孕風險，而我哋都有俾到啲建議你，你可以參考返：這個情況我還需要繼續擔心懷孕嗎？ - #2 Kaleo_StickyRiceLove 同埋 懷孕風險和排卵期問題 - #4 Ching_StickyRiceLove 。建議你可以根據需要選用其他安全措施，例如避孕藥、避孕針、子宮環，配合安全套一齊使用，更加安心。
同時你都可以考慮同伴侶溝通，喺你心理上未準備好之前，唔好發生陰道陰莖插入式嘅性行為，甚至唔好發生任何形式嘅性接觸住。等你覺得準備好，先再進行進一步嘅親密行為。
希望以上嘅答覆可以幫到你！
（Intern同學 Nicole）