一直有食開yaz，每次都會食到紅色藥丸剩2到3粒黎M。今個月已經食完紅色開始食白色都未黎M，會唔會中招？一直有做安全措施⋯
Hello ~多謝你嘅問題！
避孕藥嘅原理係透過人造荷爾蒙抑制排卵，所以如果你係正確咁服用所有藥片，冇嘔吐或嚴重肚瀉等，而且冇服用任何其他藥物，都相對係安全嘅。加上都見你都有提到一直有做安全措施，其實懷孕嘅風險都好低。
你提到服用YAZ嘅避孕藥期間冇出現到月經，有機會係因為藥物中嘅荷爾蒙成份稍為減少左子宮內膜嘅厚度而形成，而令經血量變少，服食超低劑量嘅荷爾蒙避孕藥(例如Yaz)亦都有機會出現停經，呢一個情況都係正常嘅，不過如果擔心嘅話，建議去睇醫生了解下身體狀況同埋係唔係適合繼續服用避孕藥。
另外，月經出現嘅日子未必每次都會好準確，月經周期會受好多其他因素影響，例如荷爾蒙失調、情緒起伏、飲食習慣、服用藥物等，都會影響到我哋月經出現嘅時間。
如果你都係好擔心嘅話，呢度都建議你可以根據最後一次進行性行為嘅7日至11日後用驗孕棒進行驗孕。驗孕棒係透過檢測尿液中嘅人絨毛膜促性線激素(hCG)濃度去判斷有冇懷孕，只有受精卵成功着床嘅女性身體先會開始分泌hCG，着床所需嘅時間係6至9日，所以喺最後一次進行性行為之後嘅第7日會可以有初步嘅結果，而11日後就會有相對準確嘅結果。
希望以上嘅資訊可以幫到你！