驚有bb……

本人就7月22同男朋友最後一次性交啦,咁就係又戴condom嘅,但係自己琴日開始無啦啦有啲深啡色嘅血,今日都有,下腹有少少痛,唔知係咪懷孕症狀,同埋自己本身就夜瞓嘅,通常兩三點,印象中七月開始好似有兩次扑嘢都掉轉咗帶,但係未插入去就掉轉返嘅,6月26號開始嚟M,但係到今日都未嚟,好驚係咪大肚,其實從七月頭開始就一直好驚自己大肚,唔知係咪因為壓力大搞到咁樣

Hello~多謝你嘅發問!

首先,你同男朋友最後一次進行性行為期間有帶到安全套,而過程中安全套冇穿同漏嘅話,咁懷孕嘅風險都比較低。但係你提到七月頭有兩次性行為係掉轉咗安全套,雖然最後調返轉,但呢度都要同你解釋一下,安全套接觸左陰莖之後再調返轉使用嘅話,會有一定嘅懷孕風險。因為陰莖係受到刺激嘅時候會分泌透明嘅尿道球腺液,當中有機會含有少量精子,當反轉咗嘅安全套接觸到尿道球腺液,再反轉使用嘅時候,就會有機會令精子進入女性體內而導致女性懷孕。所以,當真係發現掉轉咗安全套嘅時候,就要開過個新嘅安全套嚟用啦!

呢度有一個關於正確戴套分正反面嘅post,你可以參考吓,避免再次發生同樣嘅情況~https://www.instagram.com/p/B4EX0FVFLUf/?igshid=YmMyMTA2M2Y=

由於你哋之前掉轉安全套使用嘅性行為有一定嘅風險,相信你都因為非常擔心會懷孕而搞到自己好大壓力,你可以用驗孕棒進行一次驗孕,排除左懷孕嘅可能先。咁我見你最後一次進行性行為都已經有7日,所以你可以先進行驗孕,初步咁睇吓自己有冇懷孕。如果都唔係好放心嘅話,亦可以喺最後一次進行性行為嘅11日後,在進行多次驗孕,咁樣會得到一個準確啲嘅結果。因為驗孕棒係透過檢測尿液中嘅人絨毛膜促性線激素(hCG)濃度去判斷有冇懷孕,而只有受精卵着床成功嘅女性身體先會分泌hCG,卵子受精著床嘅過程需要大概6-9日,所以通常最後一次性行為七日後會有個初步嘅結果,而11日後就會有一個準確啲嘅結果。排除咗懷孕嘅可能性,就可以安心啲,耐心等月經出現。

另外,你亦都提到「有啲深啡色嘅血」及「下腹有少少痛」,都令你擔心係懷孕症狀——「著床性出血」。著床性出血其實係受精卵著床係子宮壁嘅時候有機會出現嘅出血情況,但唔一定每個人懷孕都會出現呢個情況,受精卵著床大概係性行為之後嘅6至9日嘅時間,而且著床性出血嘅血量比月經少好多,通常係一塊護墊承載到嘅量同埋一日就會流完。但同時,呢啲都有機會係經前症狀,會隨住月經嘅出現而慢慢消退,建議你可以觀察幾日身體嘅情況,睇吓出血嘅情況有冇持續。

另外都想提及一下,月經同埋排卵係由身體幾個繁複嘅系統互相配合而形成嘅,所以好容易受到其他因素影響,例如:荷爾蒙分泌、飲食、作息、壓力、藥物及生活習慣等等。而正正係因為月經好容易被影響,所以每個人都唔能夠好準確咁預計到嚟月經嘅日期、質地、血量、顏色等,而你上述講到嘅情況都未必係懷孕嘅徵兆,因為懷孕徵兆同經前不適嘅症狀都好相似,亦有機會係因為其他因素而造成,所以我哋唔可以單憑呢啲症狀去判斷自己有冇懷孕。

希望以上嘅答覆可以幫到你~
(Intern同學 Nicole)