近三-四個月嘅經期都好唔穩定。

其實我唔太知應唔應該睇婦科,由5月時我嚟M只會嚟幾日,而6月開始到依家都仍然未嚟M,不過都有去驗孕,結果係陰性嘅,同其實早幾個月都無性行為,所以應該唔係懷孕而無嚟M。但又好不安,唔知點算好。呢個情況應該搵唔搵醫生好?同應該做啲咩檢查?

Hello~多謝你嘅發問!

見你都有睇到呢幾個月冇進行性行為,而且都有驗孕,而結果都係陰性,而且6月至到而家都冇發生性行為,相信都冇咩懷孕嘅風險。其實月經唔穩定其實都好常見,導致月經遲嚟嘅原因有好多,其中一個原因係荷爾蒙分泌問題,影響咗你月經嘅時間。另外都仲有其他因素,例如:睡眠時間不足、精神過於緊張、服用藥物、生活作息唔定時、壓力大、飲食習慣改變等等,都會影響到我哋嚟月經嘅時間,所以你可以留意吓自己最近有冇因為以上因素而影響咗嚟月經嘅日子。

如果呢種情況之前冇出現過,而且冇受到前面提及嘅因素影響,都建議你可以去婦科睇一睇,醫生都會幫你檢查同視乎情況睇下需唔需要開啲催經嘅藥俾你,亦都有機會會幫你做啲婦科檢查,例如:腹部超聲波、子宮內膜活檢、抽血化驗等,呢啲都係比較常見嘅婦科檢查。有需要可以預約家計會診所/母嬰健康院/私家醫療機構等睇醫生了解下自己嘅身體情況呀。

希望以上嘅答覆可以幫到你!

(Intern同學 Nicole)

1個讚

多謝你嘅回覆啊~近兩個月的確精神壓力好大⋯亦都少訓咗好多,甚至連飲食上都有壓力。