好驚中左…

一路都有食開事前避孕藥,準時前後1個鐘食,今個月29/7 突然間仲有6粒粉紅色藥片未食就有啡色分泌物,仲有血絲,因為始終今個月既12/7(新開避孕藥第2粒粉紅色) 同男朋友有發生性行為(用安全套,外射),所以30/7 早上 就買左曼秀雷敦驗孕棒check,較暗啲好似見到啲印咁…(尿有淋濕顯示窗),之後四小時後再用clearblue digital check 係no pregnant , 再喺31/7 早上再買曼秀雷敦check,係完全白板。
我到依家4/8都仲流緊啡色分泌物同血絲… 亦都好驚係咪中左…

Hello~多謝你嘅發問!

首先見到你話你一直都有食開避孕藥,但係今個月呢就喺29號嘅時候,未食粉紅色嘅藥片就有呢個啡色嘅分泌物同埋有血絲,由於你上面冇講你食事前避孕藥嘅時長係幾耐,咁所以我唔清楚會唔會係食避孕藥身體仲未適應所導致,因為服用避孕藥初期都需要比身體大概三個月至半年嘅時間適應,而服用初期有機會出現常見嘅副作用,例如流啡/點狀出血。

第二係你講話你7月12號嘅時候同男朋友有發生性行為,但係你哋係有用安全套嘅,咁樣嘅話懷孕嘅機率其實都唔太大,而你喺30號朝早都用驗孕棒檢測過,第一次好似有一個印咁,但係你喺4個鐘之後,亦有再用另外一種驗孕棒檢測過,結果係No pregnant,喺第三次再檢測嘅時候都係顯示冇懷孕跡象,咁樣其實都唔需要太過擔心,因為都見到你驗孕嘅日子,其實係進行性行為之後超過左最準確嘅驗孕日子,所以準確度都會較高,如果你下次再擔心使用安全套有機會懷孕的話,建議驗孕係最後一次性行為7日後(大概會有初步嘅結果),性行為11日或以後(會更加準確),呢個會係比較好嘅驗孕時間,同埋呢由於女性懷孕之後呢,身體係會產生一種荷爾蒙(人類絨毛膜促性腺激素),簡稱HCG,係懷孕先會出現嘅一種荷爾蒙,如果太早驗孕又或者 HCG濃度唔夠嘅話,驗孕棒亦都唔會顯示到結果,又或者你可以喺完成性行為之後,入水去測試一下避孕套有冇穿或者漏水嘅跡象,咁樣你下次就可以更加安心。

第三個問題係你由嗰日到8月4號,依然有啡色嘅分泌物同血絲,有機會係上一次經期排得唔夠乾淨,又或者有機會接近下一次經期嘅開始,或者你最近會唔會有服用過其他嘅藥物,又或者打咗其他嘅針?如果呢個情況再繼續持續一段長時間嘅話,都建議你可以去睇醫生睇吓醫生點樣幫你解決呢個問題:see_no_evil:因為呢一個方面我都唔係特別清楚,相信醫生可以幫你解決到呢個問題:see_no_evil:

希望以上嘅答覆可以幫到你!

(Intern同學 Yee)

我食左藥差唔多一年啦:lying_face: 係第一次流啡 尋日再驗多次 都係negative 今早開始有啲似黎M 但量好少… 都仲係好擔心第一次驗既result…

仲有我係尋晚驗既 會唔會hcg唔夠?但距離上一次性行為已經有24日…

Hello~多謝你嘅發問!

首先第一個你話食咗差唔多一年啦,你係第一次有流啡呢個現象,如果你係初期嘅話有機會係未習慣,你已經食咗咁耐嘅話有機會係呢隻避孕藥唔適合你去食,都建議你每一年都去搵醫生檢查一下會唔會係唔適合咁樣。

第二個問題就係你係三次檢測之後,琴日再檢測多次都係Negative,而今日開始有少少好似嚟M咁,有機會係食避孕藥嘅副作用(流啡),又或者係準備嚟M之前嘅一啲分泌物,你之前都已經檢測過幾次都係顯示冇懷孕跡象,咁樣其實都唔需要太過擔心,因為都見到你驗孕嘅日子,其實係進行性行為之後超過左最準確嘅驗孕日子,驗孕係性行為11日之後準確度都會較高,女性懷孕之後呢,身體係會產生一種荷爾蒙(人類絨毛膜促性腺激素),簡稱HCG,係懷孕先會出現嘅一種荷爾蒙,大概喺受精卵著床(6-9日)如果太早驗孕又或者 HCG濃度唔夠嘅話,驗孕棒亦都唔會顯示到結果,係因為你已經距離上一次超過24日,所以如果真係懷孕嘅話,HCG濃度係唔會唔夠,如果你琴日再驗咗都係顯示negative嘅話應該就真係冇懷孕,呢個方面你可以放心,如果你都仲係唔放心嘅話可以去睇醫生再作進一步檢查。

希望以上嘅答覆可以幫到你!

(Intern同學 Yee)