好驚會有病🥲

沉日發現自己下陰係比較後既位置生左粒野,size好似暗瘡咁,用力禁一禁側面會見到少少白色,按落去都似暗瘡咁少少痛又唔好係痛。想問會唔會係疱疹又或者係其他性病?

係一星期前進行過冇套性行為🥲🥲🥲

補充下
上個月做過婦科檢查 醫生都有睇過下面同埋做過抺片 完全冇事的
性伴侶都冇換過

Hello~多謝你嘅提問!

你睇到下陰較後嘅位置生咗粒好似暗瘡嘅嘢,其實生粒粒嘅成因有機會係同衛生問題,同埋皮脂腺阻塞有關係。陰毛或者陰部嘅部份同我哋一般嘅皮膚一樣,都會生同暗瘡差唔多嘅粒粒。如果內褲唔透氣,或者天氣溫度較高,下體都比較容易會生呢啲粒狀物。建議每日做好日常清潔,用清水溫和溫柔地洗乾淨,著啲棉質底褲同埋鬆身嘅下身衣物。

如果你係擔心自己患上性病,你可以觀察下下體嘅分泌物有冇異常,例如顏色上嘅變化、呈現豆腐渣狀、有類似魚腥嘅味道,如果冇咩特別,只係一粒豆嘅話,好大機會係由細菌或太多油脂而造成嘅。性病疱疹通常係生水泡,會痕癢/痛;而性病疣(俗稱「椰菜花」)就通常係生比較多嘅小肉粒(就好似椰菜花咁)。你所講嘅症狀就應該唔係性病感染造成嘅。

聽到呢度,你都係比較擔心嘅話,都可以去醫院、家計會診所或者私家診所,向醫生詢問你嘅情況並做個全面嘅檢查,咁樣就唔使咁擔心啦!

同埋建議每次發生性行為嘅時候全程都正確使用安全套,咁就可以減低性病傳播或者其他感染(例如尿道炎、念珠菌感染)嘅風險啦

https://www.instagram.com/p/B4EX0FVFLUf/?igshid=YmMyMTA2M2Y=

呢度有個安全套嘅使用方法你可以參考吓~

(Intern同學 Nicole)