想問性行為後十四日驗孕,結果準確嗎?

由五月開始經期都唔太穩定,一係嚟得好短同血量好少,可能三四日就完,血量都好少。而七月至今都未嚟M。29/7當日有發生安全性行為,安,今日中午驗孕為陰性,睇返說明書話唔一定要用晨尿。需唔需要再驗多次?定其實結果都係可信?

Hello~多謝你嘅發問

首先,你提及到你五月開始經期唔太穩定,但係其實有好多外在因素,會影響到導致出現呢個問題,例如壓力,夜瞓等等…再者,你話關於月經嘅量少同埋時間短嘅問題,睇翻你嚟M既日子其實都屬於正常情況以內,一般月經週期21~35天或長達42天「都係可接受既」,同埋其實三至八日都係個合理嘅嚟M時間,其實每個月都會有唔同,所以如果要擔心嘅話可以問吓醫生嘅意見。

都見到你話你7月29號有發生過安全性行為,你今日晏晝都有驗孕係陰性嘅結果,因為每一隻牌子檢測嘅時間同使用方法都會吾同既,所以建議你根據返驗孕棒上面嘅說明書去驗孕。建議使用晨尿,係因為驗孕棒係透過檢測尿液中嘅hCG (人絨毛膜促性腺激素)含量,呢款激素會係受精卵著床後開始分泌,而晨尿因為比較濃縮,當中嘅激素水平較多,所以如有懷孕會相對容易驗出。

而你提到你所使用嘅驗孕棒嘅說明書標明唔一定要用晨尿,的確有啲驗孕棒喺指定日子使用係唔一定要用晨尿嘅,例如係喺預計嚟M嘅日子驗孕。因為hCG水平會喺懷孕初期隨住日子上升,所以到預計嚟經嘅日子,即使唔係用晨尿都可以驗出,如果你仍然係擔心嘅話建議你可以用多一隻牌子嘅驗孕棒嚟驗,希望我以上嘅回答可以解答到你嘅問題,如果你再有疑問嘅話都可以再留言。:relieved:

(Intern同學 Yee)

1個讚

多謝你嘅回覆啊!