你好，我有啲關於事前避孕藥嘅問題想問。
第一，想知道事前避孕藥食完之後對身體即時同埋長遠會唔會有唔好嘅影響？因為我今年20歲，其實暫時冇計畫有性生活，只係對自己嘅安全有啲擔心，所以想keep住食，但係怕會傷身。
另外，想問一下如果買市面上例如藥房嘅事前藥會唔會有危險？（因為我知事後丸一定要醫生開）定係建議由醫生開藥好啲，亦都想知如果我問醫生攞藥，會唔會需要做身體檢查先可以攞到？
謝謝你
Hello
多謝你嘅提問～
- 關於服食事前避孕藥身體嘅即時影響，喺服用初期可能會有噁心、頭暈、頭痛、乳房脹痛、水腫及情緒轉變等情況出現，但一般會喺幾個星期內消失。至於長期影響，根據醫學研究顯示：服食避孕丸嘅女性，患卵巢癌及子宮內膜癌嘅機會較一般女性低四至五成，但患乳癌嘅機會就比冇服食避孕丸嘅女性稍高，至於暫時未有研究顯示到避孕丸同子宮頸癌嘅關係。
2.有關避孕丸嘅取得方式，我哋都唔建議喺藥房度購買，因為唔能夠確保避孕丸嘅藥效，而且唔係每個人嘅體質都適合服用避孕藥，例如患有血栓塞、乳癌或性器官癌症、不明陰道出血、嚴重肝病、腦血管或冠狀動脈疾病、嚴重高血壓同糖尿病嘅婦女都唔適宜服用避孕藥。所以為左保障身體起見，無論有無上述情況，都建議先諮詢醫生嘅意見。你可以選擇去家計會嘅診所或者一般婦科診所諮詢醫生嘅意見，市面上嘅避孕藥含有嘅人造荷爾蒙劑量都唔同，醫生會評估你身體狀況下配最適合嘅藥俾你，咁就唔使擔心自己買返嚟嘅避孕藥會唔適合自己身體～
希望解答到你嘅問題