您好！
由月經來的第一日7月24便已經開始服用優悅避孕藥，29號開始服用doxycycline 抗生素，一直服用到8月4號，在6號時有沒有安全套的性行為，但沒有在體內射精，其後分別在8號和12號也發生了同樣的性行為，今日才得知這種抗生素也有可能影響避孕成效，昨天和今天也有點滴岀血，出血狀況在服用避孕藥物月經一周後便沒有再發生，不會是臨床岀血吧？請問會有大機會懷孕嗎？
某啲抗生素可能會影響避孕藥嘅藥效，所以建議如果日後需要食藥，記得同醫生講清楚你有食緊避孕藥，詢問你喺食藥期間甚至療程之後需唔需要使用安全套作為額外嘅安全措施，需唔需要錯開服藥時間。 
睇返你嘅情況，由於我哋唔肯定你識嘅抗生素對於避孕藥嘅影響有幾大，建議你可以問返俾藥你嘅醫生。如果抗生素對避孕功效有影響嘅話，你發生嘅性行為可能都有一定嘅風險，雖然相比冇食藥嘅情況係會低咗。
你可以考慮驗孕，驗孕係檢測身體有冇hCG呢種只有受精卵著床身體先會產生嘅荷爾蒙，卵子受精、受精卵著床需要大概6－9日時間，所以性行為7日後驗孕會有初步結果，而11日後驗孕，就會有相對準確嘅結果。你可以根據最後一次發生性行為嘅時間計算日期進行驗孕。
而「著床性出血」其實係受精卵著床係子宮壁嘅時候有機會出現嘅出血情況，但唔一定每個人懷孕都會出現呢個情況，受精卵著床大概係性行為之後嘅6至9日嘅時間，而且著床性出血嘅血量比月經少好多，通常係一塊護墊承載到嘅量同埋一日就會流完。
睇返你嘅情況，著床性出血嘅可能性比較低，呢啲出血現象可能係因為身體適應緊避孕藥。如果你擔心嘅，都可以詢問下醫生，了解下身體情況。 
而如果你繼續食藥，去到服用不含有人造荷爾蒙嘅非活性白色藥丸嘅時候，身體會出現「撤退性出血」，喺避孕藥控制下出現嘅類似「月經」嘅出血現象。如果有出現嘅話，都可以排除懷孕嘅可能性。 