第一次食yaz 月經第五日開始食 食左5日 今日做愛嗰時冇戴套外射左 請問食藥第五日有藥效了嗎 擔心懷孕
補充返 今日係嚟乾淨m嘅第2日
再補充返 有抑鬱症 食左ssri約兩個月
Hello～多謝你嘅發問
首先，見你係第一次食避孕藥，都想了解下你食藥之前有冇睇醫生檢查身體先？雖然避孕藥好容易自己買到，不過唔係每人嘅身體情況都適合食，而且每款避孕藥含有嘅人造荷爾蒙成份同劑量都唔同。所以建議食藥前提下醫生，睇下你嘅身體係咪適合、適合邊款避孕藥。而一般會建議你如果係月經周期嘅頭五日開始食第一粒藥，咁就建議喺開始食藥嘅頭7日內如果發生性行為嘅話，要配合埋安全套，因為第一次食藥，頭五日嘅避孕功效都未必好穩定，身體需要時間建立避孕功效。
都見到你提到你喺食藥嘅第五日內發生咗無套性行為，雖然係外射，但喺性行為發生期間，陰莖係性興奮時會流出透明嘅尿道球腺液，尿道球腺液有機會含有少量精子，所以如果尿道球腺液直接接觸到陰道都係會有懷孕嘅機會。
雖然你嘅懷孕風險相比起冇食藥嘅情況係低啲，不過如果你擔心嘅，都可以考慮性行為72小時／120小時內進行緊急避孕。可以去家計會診所／母嬰健康院／部分私家診所睇醫生食事後藥。記得同醫生講清楚你有食緊避孕藥，因為如果你係服用黃體激素受體劑呢種事後藥，同一個月經週期內就唔可以再食避孕藥，你可以詢問醫生你需唔需要停避孕藥。
另外，你提到你有食抗抑鬱藥，就住呢一點都建議你詢問下醫生嘅意見，睇下你食緊嘅ssri會唔會影響避孕藥嘅功效。同時，因為避孕藥係初期身體適應緊嘅時候有可能影響情緒，所以真係好需要向醫生資訊下。
如果你衡量完風險決定唔進行緊急避孕，而你如果擔心會懷孕嘅話，都可以考慮進行驗孕。驗孕係檢測身體有冇hCG呢種只有受精卵著床後身體先會產生嘅荷爾蒙，而因為一般卵子受精、受精卵著床需要6-9日，所以性行為7日後（8月23號）驗孕就可以得到初步驗孕結果，而性行為11日後（8月27號）進行驗孕結果就會較準確及可靠。
呢度都同你普及下避孕藥嘅原理，其實避孕藥係通過人造荷爾蒙去抑制排卵，改變子宮頸黏液嘅粘稠度，同埋改變子宮內膜環境，從而達致避孕嘅功效。
最後都提醒返，除咗無性接觸之外，冇一種避孕措施嘅成功率係100%，而且避孕藥唔可以好似安全套咁樣降性病傳播嘅風險或其他感染風險（例如念珠菌感染、尿道炎等），所以都建議你可以選擇適合自己嘅安全措施，咁樣可以保障到自己，亦都保障到你嘅伴侶。希望以上嘅答覆可以幫到你！
(Intern同學 Nicole)
係喺家計會配的 暫時情緒冇大問題 係乾左好多 但上網做完搜集 好似只要係嚟m第6日前開始食 如果冇乜大副作用例如嘔吐 就已經會有效？ 其實我呢個情況懷孕機會係咪應該都低？唔該曬
Hello~多謝你嘅發問！
首先避孕藥係月經黎嘅頭5日開始食就會有即時嘅避孕效果嘅，而要額外使用安全套係因為驚係服用避孕藥之後身體唔適應而會有唔舒服，例如嚴重屙嘔肚痛個啲，令個藥效減少，但睇翻你所講都冇呢啲副作用，咁唔洗太擔心，你嘅懷孕機會都係好低嘅。
另外避孕藥嘅人造荷爾蒙的確有機會令陰道分泌減少，如果情況有引起不適嘅話，可以向醫生查詢睇下有無需要轉藥/停藥。
(Intern同學 tommy)
唔該曬你