想問下會唔會有左

星期六同男朋友有帶套性行為+外射+檢查過無穿窿 但係過程中避孕套嘅底部向上移咗少少 然後儲精囊都郁咗少少 但係應該係冇流出嚟 想問下會唔會有懷孕機會 嗰日係嚟m後6日

移上左少少之後 男朋友都有用紙巾抹一抹 之後再拉返好個套

自問係超級安全 所有步驟都做足晒:
開包裝嗰陣確認冇搣到避孕套
然後我冇用任何尖銳嘅嘢拎佢出嚟 我係就咁必佢出嚟
帶套之前有抹過手之後先掂避孕套
然後帶嗰陣有確認有冇反轉咗嚟帶
戴咗之後有將儲精囊啲氣必出嚟
同埋都有確認過個套有冇穿之後先至插入陰道
性行為途中 避孕套冇離開陰莖 有少少移位定係唔知係咪拉長咗 但係確認冇精子流出 同埋移位/拉長之後男朋友有用紙巾抹一抹再插入
完事後有用灌水方法確認冇穿
我想問下咁樣係咪正確嘅帶套方法

想問吓避孕套拉長同脫落有咩分別?
因為我唔係好確定我同男朋友嗰時係拉長左定係脫落
係咪只要個避孕套冇離開陰莖就代表唔係脫落?

補充番返:我上次月經嚟咗7日 然後有性行為嗰日係第13日 我月經期都係唔準嘅 不過都係大概41-78日嚟一次m

Hello~多謝你嘅發問!

首先,非常所賞你係進行性行為期間做咗安全措施,保障咗自己同你嘅伴侶。見你都有提到「係過程中避孕套嘅底部向上移咗少少 然後儲精囊都郁咗少少 但係應該係冇流出嚟」,呢度都想問吓你個避孕套係射精前已經移咗位定係射精後?如果係射精後移咗位,唔排除精液有溢出、掂到其他部份嘅情況;如果係射精前,都有機會令尿道球腺液(男性喺性興奮時有機會分泌出嘅透明黏稠狀液體)流出,當中都存有小量精子,如果流入左陰道都有機會造成懷孕。即使有用紙巾抹都有機會有殘留嘅精子流出導致懷孕。不過如果好似你所講,你哋體外係射精,如果整個過程安全套都有包覆龜頭嘅話,因為你並唔係成個套甩咗,所以懷孕風險都相對比較低。另外,喺有全程正確使用安全套嘅情況下,唔需要體外射精都有好高嘅避孕成功率,因為射精好難控制,要射精前抽出陰莖有時反而會有安全套破損/脫落嘅風險。

至於你話「避孕套拉長同脫落有咩分別」,其實我哋係睇安全套底部個圈係咪仲係陰莖底部,如果依然喺底部,儲精囊位置前移可能係因為射精後需要空間容納精液;但如果安全套底部有離開陰莖底部,可能係因為性行為過程某啲體位導致安全套捲起咗,或者尺寸唔啱,呢個情況下,如果有精液或者尿道球腺液流到陰莖底部而接觸到陰道/陰道口嘅話,就會有一定嘅風險。所以建議佩戴安全套嘅時候要戴落陰莖底部,而抽出嘅時候都要記得㩒住安全套底部,以防安全套脫落或者移位。

如果你比較擔心自己會懷孕嘅話,都建議你可以考慮驗孕。驗孕棒係透過檢測尿液中嘅HCG(人絨毛膜促性腺激素)含量嚟判斷有無懷孕,因為只有受精卵成功著床嘅女性身體先會會開始分泌HCG,通常卵子受精著床時間就會係6-9日,咁通常7日就會有初步嘅結果,11日嘅時候就會有相對準確嘅結果。睇到呢到如果你都係擔心自己會有懷孕嘅風險,你可以選擇服用事後丸。事後丸係香港係需要醫生處方嘅藥物,而且有分性行為後72小時或者120小時內服用兩種。你可以選擇盡快去家計會診所、母嬰健康院、普通私家門診或者婦科診所,等醫生判斷適合你嘅緊急避孕方法。

另外,你佩戴安全套嘅方法大致上都正確,你都可以試吓喺開包裝之前,留意吓有冇過期同埋漏氣、另外喺開包裝之後要分清楚正反面,之後先再佩戴落男性嘅陰莖上面,因為調轉左嘅避孕套會接觸到尿道球腺液,如果再反轉使用再發生性行為,就有機會令精子進入體內。詳細嘅使用方法你可以參考吓下面呢條link,了解更多正確使用安全套嘅步驟。糖不甩 Sticky Rice Love on Instagram: "《Stickypedia系列-安全性行為:第一寶》 講起安全套,大家都會直接聯想到「男用安全套」,呢樣產品方便易用,可以避孕又可以預防性病傳播,如果100%正確使用佢嘅避孕率可以高達92%[1]。但世事係無咁完美嘅,男用安全套有大概13%失敗率[2],而最常導致安全套「唔安全」嘅原因包括 🤭掉轉正反面 🤭無將儲精囊內嘅空氣擠出 🤭無戴到最底 🤭唔係整個性交過程都戴住 🤭潤滑度不足 🤭用咗唔啱嘅尺寸 嗯...驟眼睇大部份意外都係戴嘅期間出咗事,所以今次Stickypedia小百科想同大家詳細講下到底點樣「正確使用安全套」。除咗留意圖2同圖3嘅教學,向左滑最後仲有短片(圖4)示範架~ 雖然佢叫做「男用」,但其實唔係只係男性可以用於陰莖上架。安全套可以係指交,探肛,自慰時使用,亦可以用於唔同嘅性玩具。不同形式嘅性接觸都有機會傳播性病,所以係不論性別/性傾向/性行為取向都可以使用安全套去保護自己同他人,仲可以減低刮傷脆弱黏膜造成傷口嘅機會。 潤滑度嘅問題,我哋會係「第二寶-潤滑劑」再同大家詳細介紹同解釋。知道大家都會好好奇咁點先可以揀到最適合自己嘅套套,唔駛擔心,下一期嘅Stickypedia就會圍繞安全套嘅五大要點,仲會講下「女用安全套」呢樣神秘嘅產品~ 📚 [1] Trussell, J., & Guthrie, K. A. (2007). Choosing a contraceptive: efficacy, safety, and personal considerations. Hatcher RA, Trussell J, Nelson AL, Cates W, Stewart FH, Kowal D. Contraceptive technology. 19th revised ed. New York (NY): Ardent Media, Inc, 19-47. [2] Trussell, J., Aiken, A. R. A., Micks, E., & Guthrie, K. A. (2018). Efficacy, safety, and personal considerations. Contraceptive technology. 21st ed. New York, NY: Ayer Company Publishers, Inc. ——————————————— Come talk to us! 糖不甩討論區有性治療師同義工答你問題!識揀,一定揀糖不甩! Discuss.stickyricelove.com #stickypedia #stickyricelove #糖不甩 #stickypediasafersex #stickypedia安全性行為 #condom #安全套 #五大寶品 #缺一不可 #sexeducationhk #性 #性教育 #gender #relationships #sex #hksex #hklove #hkboys #hkgirls"

都想了解一下,喺發生性行為途中避孕套出現移位嘅情況係射精後,陰莖已經軟咗嘅時候?定係喺勃起/同勃起嘅size差唔多嘅時候?如果係後者嘅話,可能避孕套嘅尺寸都唔係太合適,建議可以度下&揀返適合自己嘅尺寸;合適嘅避孕套應該貼緊陰莖唔會有鬆嘅感覺。不過都可能係唔同剪裁嘅分別,如果而家自己用緊嗰隻係啱size嘅話,可以試吓其他牌子睇吓情況有冇好啲。同埋都建議射精後盡快將陰莖抽出,因為過程中陰莖會變軟變細,令到安全套好容易甩,因此抽出嘅時候亦都可以㩒實安全套底部周圍確保精液唔會流出。你可以參考吓以下呢個IG post,了解一下點樣量度同購買一個適合你同伴侶使用嘅安全套。糖不甩 Sticky Rice Love on Instagram: "上一個post分享咗10個容易令安全套失效嘅原因,而用咗唔啱尺寸嘅安全套係其中一個好常見嘅原因🥺,所以今次就同大家分享買安全套之前要點樣量度同揀合適自己嘅尺寸~ 同揀衫一樣,揀安全套都要由量度將要使用安全套嘅物件(例如陰莖或者性玩具)嘅闊度同長度開始📏。要留意返大部份安全套嘅量度單位係毫米(mm),所以使用軟尺量度嘅時候要記住轉換返個單位。  💫 【闊度/寛度 Norminal Width】量度陰莖/物件最粗嘅位置(通常根部)嘅圓周,再除以2(可以想像將安全套㩒偏橫向嘅長度) 👉例子:軟尺上量度嘅圓周係10cm,首先將數字乘以10,10 X 10 =100 (mm)。100 除以二,100/2 = 50mm,就可以得出安全套嘅闊度。  💫 【直徑 Diameter】量度陰莖/物件最粗嘅位置(通常根部)嘅圓周,再除以3.14。 👉例子:軟尺上量度嘅圓周係10cm,首先將數字乘以10,10 X 10 =100 (mm)。100除以3.14,100/3.14 = 31.8,就可以得出安全套嘅直俓。  💫 【長度】由陰莖/物件嘅根部量度到頂點 👉例子:軟尺上量度嘅數字係12cm,就要將數字乘以10,12 X 10 = 120 (mm)。 不過大部份安全套都有足夠嘅延展性,所以好少會有唔夠長嘅情況出現(大家可能都見過有人用安全套嚟吹波,證明係可以包覆到有一定嘅長度嘅)。同一時間,亦唔少安全套牌子係無喺包裝上特別列明長度嘅數字架。  另外安全套所屬嘅品牌國家唔一樣,都會有唔一樣嘅尺寸參考~歐美同香港品牌通常都會標示【寛度】,而日本品牌就通常會標示【直徑】。有時亦會見到個數字後面寫住「± 2mm」「± 5mm」等等,例如:「寛度58±2mm」,就代表呢個安全套可以被量度為56~60mm嘅物件使用。  💫 購買小貼士 1️⃣ 尺寸要預先量度先至會知😏,所以都建議大家係屋企預先度過尺寸至去唔同生活用品鋪頭又或者sex toy shop購買~  2️⃣ 另外都明白大家情到濃時,可能會好突然或者即興要買安全套,又或者啱啱好用完手頭上嘅安全套,想嘗試下唔同新嘅牌子同款式。係呢啲情況下買嘅時候,都建議唔好買太大數量嘅包裝,因為都唔知道自己又或者對方適唔適應😟。而且即使標明係同一個尺寸,唔同牌子或者唔同材質所造嘅安全套係佩戴之後都可能有唔一樣嘅體感🚨。所以都建議買返1~3片裝試一試先,啱用再大手購入~  3️⃣使用安全套嘅時候,佩戴後嘅感覺應該係唔鬆唔緊,啱啱好貼住至係合適🧣~ 如果因為尺寸太大或者太細,就有可能令安全套係過程中破損💥。詳情可以睇返我地上一篇文:10個令安全套失效嘅原因!  4️⃣ 依家有越來越多嘅安全套牌子,有啲未必會係包裝上標明尺寸,例如闊度、直徑、長度... 但好多成人用品商店都會係佢地網站列出呢啲資料,係購買之前都可以自己搜集下資料了解下先,或者直接去門市向向店員查詢🙋🏻。  希望呢個post 可以幫到大家了解量度尺寸都有唔同要留意嘅地方,減低係用安全套嘅時候出現突發嘅意外啦🦺~  TEXT: CLAIRE ——————————————— 糖不甩|性教育|網上性健康平台💛 對性/性別/關係...有疑問?想搵人傾下? 糖不甩討論區隨時ready答你問題!識揀,一定揀糖不甩! Discuss.stickyricelove.com   #stickyricelove #糖不甩 #sexeducationhk #性 #性教育 #gender #relationships #sex #hksex #hklove #hkboys #hkgirls #安全套 #condom #套套 #安全套爛咗 #安全套爆咗 #安全套尺寸 #大碼套套 #SlimFit套套 #SRL安全套"

見你都有提到嚟月經同埋發生性行為嘅日子,可能係想即計算安全期去判斷自己懷孕嘅機率。但其實用計算安全期去避孕並唔係一個可靠嘅方法,因為每個女仔嘅月經周期唔一樣,而且月經好易受外在因素影響(例如荷爾蒙水平、飲食、壓力等等),週期亦會隨之而改變,變相亦較難準確推算出一個絕對『安全』的日期。你自己都有提及自己嘅月經週期好唔穩定。而排卵期係要等月經出現之後先可以推算返幾時排左卵,月經週期比較短嘅情況下可能月經期間或者月經完就會排卵,所以無論月經週期嘅邊一日,都要做好安全措施呀。

希望以上嘅答覆可以幫到你~

(Intern同學 Nicole)

咁我想問下懷孕風險大唔大

睇番你嘅情況,懷孕風險相對比較低。

但係都想你明白,除咗完全唔發生任何性接觸之外,冇一種避孕措施會100%避孕。
如果你擔心嘅,你可以考慮緊急避孕或者進行驗孕。

咁係咪必須食事後丸 因為事後丸都有好多副作用

如果唔係必須要食嘅話 都可能唔會選擇食 始終驚傷身:grimacing:

咁如果係食嘅話 需唔需要空腹食

最後想問下如果我聽日食ella事後丸 即係性行為後第4日食會唔會影響藥效 同埋會有啲咩副作用

我喺下午5:00嗰陣食咗ella事後 但係冇明顯嘅副作用 係咪代表冇效

Hello~多謝你嘅發問!

上面都有提到根據你提供嘅資料,睇翻其實你懷孕嘅機率其實都唔係好高,但除咗唔發生性行為之外,世界上冇一種避孕方法係100%避孕,所以你可以根據你自己嘅情況去衡量一下你需唔需要服食緊急避孕藥。

而事後藥含有高劑量嘅荷爾蒙,服用後有機會出現噁心、嘔吐、頭暈、乳房脹痛等呢啲副作用通常2-3日內就會消退;亦有機會影響1-2次月經週期嘅情況,包括週期長度、流血日數、流血量、經痛程度等等。不過每人嘅體質唔同,副作用嘅嚴重或者明顯程度亦唔同,有冇副作用出現唔可以作為事後藥有冇效嘅指標。如果你係經醫生處方食藥,喺時效內食,食完之後冇嘔吐冇嚴重腹瀉,咁就會有好高嘅避孕成功率。

緊急避孕藥嘅原理係用高劑量嘅荷爾蒙去抑制排卵、阻礙卵子受精、同埋令受精卵難以著床,達致緊急避孕嘅作用。所以事後藥係有時效嘅,要喺性行為72小時( 單一荷爾蒙)或者120小時(黃體激素受體劑)內食。服用事後丸嘅時間可以係空腹或進食前後服用都可以。
至於會唔會「傷身」,其實只要唔用事後藥作為長期嘅避孕方法,唔好同一個月經週期使用超過一次,唔好連續幾個月經週期都服用,咁對於身體嘅負面影響係極低嘅。而且你食之前理應係睇過醫生先。不過如果長期服用/服用得頻密,係由機會影響身體,例如子宮嘅健康。

你提到嗰隻ella事後丸係屬於120小時內要服用嘅緊急避孕藥,你係性行為後嘅第四日食,都係有避孕嘅功效嘅。如果有正確服用,而且食完短期內冇嘔吐或者嚴重腹瀉,避孕成功率係好高。

另外都提一提你,喺香港,事後丸係處方藥物,即係要睇醫生後,由醫生處方先可以取得(。ì _ í。)。而且由於事後丸含有高劑量荷爾蒙,並唔係每人嘅身體都適合食用,醫生會檢查身體,詢問病史,認為情況適合先會處方。如果唔適合食事後藥可以係性行為120小時內置入子宮環作為緊急避孕嘅方法。

如果係藥房買嘅事後藥,有機會係來源不明、成分不明,或者冇有效成份嘅假藥。由於唔係食由醫生處方嘅時候藥,並唔能夠肯定係咪有避孕功效。 所以功效方面都要睇返你係點樣得到事後藥。如果你係自己喺藥房買嘅,咁都建議你可以考慮盡快預約家計會診所/母嬰健康院/部分私家診所睇醫生同食返經由醫生處方嘅藥。

希望以上嘅答覆可以幫到你~

(Intern同學 Nicole)

今日有背痛 同埋起身嗰陣有啲頭暈 好熱嘅感覺 同埋都有輕微想嘔嘅感覺 呢啲係咪我食完事後丸之後嘅副作用:pray:t2:

同埋我今朝起身大概9:50嘅時候有屙屎 同埋啱啱夜晚8:00嘅時候都有屙屎 會唔會影響藥效?

仲有而家有少少m痛feel

不過我應該唔會就快嚟M 因為我經期都一直都好遲
所以應該係隻藥嘅副作用?

Hello~多謝你嘅發問!
睇翻你所講嘅情況,呢啲都係食完事後丸嘅副作用,仲有可能會有頭痛,噁心,疲倦,經痛,腹痛,乳房脹痛等嘅副作用,但如果你一直持續有呢啲情況出現,都建議你睇下醫生,了解翻你嘅身體狀況。但其實平時嘅作息,飲食壓力等都會影響嘅,所以唔一定係懷孕,如果太擔心懷孕,都建議你去驗孕。正常嘅排泄係唔影響藥效,除非食左事後丸兩三個鐘內有嚴重嘅屙嘔先會影響藥效。

(Intern同學 tommy)

想問下 如果我聽日朝早驗孕嘅話 個結果會唔會係準嘅