想問下事後丸同事前丸

你好!
有兩件事想請教下

  1. 我經期係8月6日完,8月7日同男朋友無套內射左,自己擔心,去左睇醫生食事後丸,8月14日有啲出血,16/17號量比較多同有啲M痛既感覺,不過都係平時月經既3分1左右,8月19號就完全冇晒血,依家8月23日又開始有啲血,同埋又有小小M痛既感覺,咁樣正唔正常呢?因為醫生剩係同我講食左會不規則出血。
  2. 我之前睇過家計會,拎左幾盒事前藥,但一路都未開始食(主要係怕水腫)我依家可唔可以開始食呢?定係等多一排等真係月經黎先食會好啲呢?
    謝謝你地解答:pray::pray:

Hello~多謝你嘅發問!
睇翻你嘅問題先,食完事後丸其中一個副作用係會有經痛同出血,但如果你持續都有經痛或者出血量過多,咁就建議你去睇醫生了解翻個原因。因為事後丸有高劑量嘅人造荷爾蒙,所以會擾亂月經嘅週期,有機會令月經提早或者延遲。
而事後丸一般建議月經嘅頭5日內食,因為係頭5日食嘅藥效會即時見效,但每個人食完嘅反應唔同,同埋有機會會未習慣每日食藥而漏服,所以係服食嘅頭7日進行性行為個陣都用翻安全套確保安全。

(Intern同學 tommy)

明白,謝謝Tommy 解答:pray:我去左家計會見姑娘,佢話我上次係撒退性出血,今次係真係月經,比平時早左一星期黎,都係常見事後丸副作用。
但係我想問下今個週期可唔可以都開始食事前藥呢?家計會姑娘話可以,但我自己都驚一個月食得太多藥,定係等下次月經黎先食會好啲?

Hello
其實你呢次月經已經可以開始食避孕藥啦~

避孕藥係通過人造荷爾蒙去抑制排卵、增加子宮頸分泌物粘稠度、同埋改變子宮內膜環境,從而達致避孕嘅效果。現時嘅避孕藥通常都係低劑量或者極低劑量嘅,對於身體嘅影響相對好細,除咗啱啱開始食藥個陣,身體適應緊藥物,可能會有頭暈、作嘔、腹部/胸部脹痛呢啲副作用,當身體適應之後(通常1-3個月),呢啲副作用就會消退。而且,對於一啲人嚟講,食避孕藥可能都會紓緩到經痛、經前不適、經血量大呢啲問題,服用避孕藥亦都會令週期規律。如果你食過事後藥,咁至於家計會護士所講,1-2次月經都會受到影響。你食完事後藥,月經出現後再食避孕藥,理應唔會存在食得太多荷爾蒙藥物影響身體嘅問題嘅。

雖然避孕藥好容易買到,不過每款含有嘅人造荷爾蒙成份同劑量都唔同,所以我哋都建議第一次食藥之前睇下醫生,評估下你係咪適合同埋適合邊隻避孕藥。你可以去家計會睇醫生配藥,佢哋通常會建議你經期第五日開始食藥。家計會配藥嘅價錢相對更加平,而且通常會俾你2包藥試下食先,食完去覆診,如果你覺得食頭2包身體有咩唔舒服可以同醫護人員講返,然後睇下你需唔需要轉藥、定係俾多啲時間身體去適應。不過見你講你而家啲藥係之前拎嘅,建議你食之前都可以問下醫護人員你手頭上嘅藥適唔適合你,定係食其他款嘅更加適合。 :woman_health_worker:t2: :man_health_worker:t2:除咗家計會診所之外,母嬰健康院或者部分私家診所都係可以睇醫生食避孕藥嘅。如果有需要就去預約啦 :wink: